Read saamia Ohuchaaka 11 Bible Online

Ohuchaaka 11 - saamia bible

Ohuchaaka 11

¹Bulaanu, abaandu bohu syaalo boosi bali ab'olulimi lulala, nibehoonyera emboosi nasilala.

²Haandi koti lu baandu bali nibawuuya ohutula ebukwe, banyoola esyaalo sy'esipaapi mu Sinari mani nibamenyamo.

³Mani nibaboolanira bati, “Lehe huhubbe amatafwaali hukasaambe bulai muno.” Mani nibehoonyera amatafwaali ako koti amakina neende ewula koti eby'ohwoombahira.

⁴Baboola bati, “Lehe hweyoombahire abeene esiko neende omunaara muleeyi okwoola muukulu, mani hweholere eliita abeene, hu huhae ohusalaanira hu syaalo syoosi.”

⁵Omwaami niyabona atyo yeeha aasi ohubona esiko neende omunaara ku baana b'abaandu bano bali niboombaahe.

⁶Omwaami yaboola ati, “Bone, mbao bali esiindu silala, haandi boosi balomaloma olulimi lulala; haandi sino nisyo esiholwa sichaaka esy'ebiindu bi bachia ohuhola; haandi sibulao esiindu syoosi si babaasa ohuhola esichia ohubahaya ohuhola bulaanu.

⁷Lehe hwiihe aasi, huchie hudoondobanie olulimi lwaabwe olwo, mani bahaye ohumanya bi buli otula sy'aboola.”

⁸Omwaami mani naabasalaania hu syaalo syoosi, nibalehana neende eby'ohwoombaha esiko.

⁹Esiko esyo syalaangwa Bbabbeli olwohuba eyo niyo yi Omwaami yadoondobanisira olulimi lwohu syaalo syoosi; haandi eyo niyo yi Omwaami yabasalaanisira hu syaalo syoosi.

¹⁰Bano nibo abeechuhulu ba Seemu. Seemu niyali neende emyaaka emia ndala (100) eky'obuhuluundu, yeebula Aripakusaadi emyaaka kibiri nikibitireo ohutula amaachi k'ofwomboole nikaweere.

¹¹Seemu n'amalire ohwiibula Aripakusaadi, yayiindira ohumala emyaaka emia chitaanu (500), haandi yeebula abaana baandi abasyaani neende abahaana.

¹²Arupakusaadi niyoosa emyaaka amahumi kadatu neende kitaanu eky'obuhuluundu, yeebula Sela.

¹³Arupakusaadi n'amalire ohwiibula Sela, yayiindira ohumala emyaaka emia chine neende kidatu (403), haandi niyeebula abaana baandi abasyaani neende abahaana.

¹⁴Sela niyoosa emyaaka amahumi kadatu eky'obuhuluundu, yeebula Ebberi.

¹⁵Sela n'amalire ohwiibula Ebberi, yayiindira ohumala emyaaka emia chine neende kidatu (403) haandi niyeebula abaana baandi abasyaani neende abahaana.

¹⁶Ebberi niyoosa emyaaka amahumi kadatu neende kine eky'obuhuluundu, yeebula Pelegi.

¹⁷Ebberi n'amalire ohwiibula Pelegi, yayiindira ohumala emyaaka emia chine neende amahumi kadatu (430), haandi yeebula abaana baandi abasyaani neende abahaana.

¹⁸Pelegi niyoosa emyaaka amahumi kadatu eky'obuhuluundu, yeebula Rewu.

¹⁹Pelegi n'amalire ohwiibula Rewu, yayiindira ohumala emyaaka emia chibiri neende kitaanu-na-kine (209), haandi yeebula abaana baandi abasyaani neende abahaana.

²⁰Rewu niyoosa emyaaka amahumi kadatu neende kibiri eky'obuhuluundu, yeebula Serugi.

²¹Rewu n'amalire ohwiibula Serugi, yayiindira ohumala emyaaka emia chibiri neende kitaanu-na-kibiri (207) haandi yeebula abaana baandi abasyaani neende abahaana.

²²Serugi niyoosa emyaaka amahumi kadatu eky'obuhuluundu, yeebula Nahori.

²³Serugi n'amalire ohwiibula Nahori, yayiindira ohumala emyaaka emia chibiri (200) haandi niyeebula abaana baandi abasyaani neende abahaana.

²⁴Nahori niyoosa emyaaka amahumi kabiri neende kitaanu-na-kine eky'obuhuluundu, yeebula Tera.

²⁵Nahori n'amalire ohwiibula Tera, yayiindira ohumala emyaaka emia ndala neende ehumi neende kitaanu-na-kine (119) haandi niyeebula abaana baandi abasyaani neende abahaana.

²⁶Tera niyoosa emyaaka amahumi kataanu-na-kabiri, yeebula Abburamu, Nahori, neende Harani.

²⁷Bano nibo abeechuhulu ba Tera. Tera yeebula Abburamu, Nahori neende Harani; nae Harani niyeebula Loti.

²⁸Harani yafwa ohutaangirira Tera laatang'ene mu syaalo siyebulirwamo esya Wuri, esyali esy'Abakalidaani.

²⁹Abburamu neende mwaanang'ina Nahori beecha badeehya. Eliita ly'omuhasi wa Abburamu lyali Sarai, nae eliita ly'omuhasi wa Nahori lyali Milika omuhaana wa Harani laatang'ene Yisika yesi.

³⁰Sarai yali omukuumba naabula omwaana yeesi.

³¹Tera n'abukula Abburamu omwaana wae neende Loti omwaana wa Harani omwiichuhulu wae, neende Sarai muhoomwaana wae Abburamu, mani nibatula Wuri esy'Abakalidaani nibachia ohumenya mu loba lya Kanani. Nae niboola Harani, mani nibamenya ao.

³²Tera yayiindira ohumala emyaaka emia chibiri neende kitaanu (205) n'afwiira Harani.