Read saamia Ohuchaaka 13 Bible Online

Ohuchaaka 13 - saamia bible

Ohuchaaka 13

¹Bulaanu, Abburamu yatula Misiri alala neende omuhasi wae, neende emyaandu ki yali nakyo, neende Loti yi yali nae, baachia Negebbu.

²Abburamu yali omuyiinda muno, naali neende amakoondi, embusi, eng'oombe, efeesa neende esaabbu.

³Yakeenda yaatula Negebbu mani niyoola Bbeteli, yi yeema lyae liyataangira ohwoombaha lyali, akatikaati wa Bbeteli neende Ai;

⁴abuundu yi yataangira ohwoombaha alutaari, mani yeenamirao Omwaami.

⁵Loti, owachia neende Abburamu yesi yali neende amakoondi, embusi, eng'oombe neende amayeema, neende ab'edaala lyae beene, neende abahalaabani bae.

⁶Mani obwaayiro nibwaduuduya bwaahaya ohubamala boombi nibamenyere alala, olwohuba emyaandu kyaabwe kyali kingiiye nikitabakanya ohumenya alala.

⁷Bulaanu amayiingi keemao kaakwaao akatikaati w'abaayi ba Abburamu neende aba Loti. (Ebiha ebyo, Abakanani neende Abaperisi nibo abali nibamenya mu syaalo esyo.)

⁸Abburamu yeemao yaboolera Loti ati, “Haba sisilai amayiingi ohukwaao akatikaati wao naange, haandi akatikaati w'abaayi bao neende abaange, olwohuba huli abeebulanwa ab'amabaanga malala.

⁹Eloba lino lyoosi liri mu mahono kao. Leha hukabuhane. Nooyira eloba liri hu muhono mukooda, ese mba njia ohuyira eliri hu muhono muluungi; nae nooyira eloba liri hu muhono muluungi, ese mba njia ohuyira eliri hu muhono mukooda.”

¹⁰Loti yatingaala yaabodoohania emoni, yaabona ehooho lya Yorodaani nilirimo omunyiti buli abuundu nilifwaana koti endalo y'Omwaami, niliri sa koti eloba lya Misiri olwaande lwa Soari. (Ebiha ebyo, Omwaami yali n'asisiiri ohusihirisa Sodomu neende Gomora.)

¹¹Loti yedoolera ehooho lya Yorodaani, mani n'achaaka ohukeenda n'achoomere ebukwe. Mani nibakabuhana.

¹²Abburamu yamenya mu syaalo sya Kanani, nae Loti yaamenya mu biko byomu hooho mani yoombaha eyeema aambi neende Sodomu.

¹³Bulaanu abaandu b'e Sodomu bali abamayaanu muno, nibahola ebyonoono muno mu moni w'Omwaami.

¹⁴Loti n'amalire ohuwaao, Omwaami yaboolera Abburamu ati, “Yema yooli ao mani otingaale noobodoohania emoni, ohutula emukulu ohwoola emwaalo, haandi ohutula ebukwe ohwoola emuumbo.

¹⁵Eloba elyo lyoosi ly'obona njia ohulihuberesa, ewe alala neende abeechuhulu bao, emyaaka kyoosi.

¹⁶Njia ohuhola abeechuhulu bao babe abaangi koti olufu lwohu syaalo, abuleo omuundu yeesi onyala ohubabala koti batahanyala ohubala olufu lwohu syaalo.

¹⁷Siingira okeende webodoohanie n'olambuula eloba lino lyoosi li njia ohuhuberesa.”

¹⁸Abburamu mani yawuuyisa eyeema lyae, yaachia yaamenya aambi neende emisaala myoolerefu kya Mamure, ekiri Hebburoni. Ao niwo haandi yi Abburamu yoombahira Omwaami alutaari.