Read saamia Ohuchaaka 14 Bible Online

Ohuchaaka 14 - saamia bible

Ohuchaaka 14

¹Abatuki bane, Amurafeeli omutuki wa Bbabbilooni, Arioki omutuki wa Elasaari, Kedorilaomeri omutuki wa Elamu, neende Tidali omutuki wa Goyiimu.

²Abatuki bano bachaakisa ebiita neende abatuki baandi bataanu: Bbeera omutuki wa Sodomu, Bbirisa omutuki wa Gomora, Sinabbu omutuki wa Aduma, Semebberi omutuki wa Sebboyimu, neende omutuki wa Bbela (oba Soari).

³Abatuki bataanu bano baholera alala mani babuusira alala amaye kaabwe mu hooho lya Sidimu (Enyaanja y'Omuunyu).

⁴Bali bahalaabaniire Kedorilaomeri hulw'embaka y'emyaaka ehumi neende kibiri, nae mu mwaaka kwa ehumi neende kidatu beecha baahayuha.

⁵Mu mwaaka kwa ehumi neende kine, Kedorilaomeri alala neende abatuki ba yali nabo, baseeta bayiingira Refaimu mu Asiteroti-Karinaimu, Omususimu mu Haamu, Omuemimu mu Safe-Kiriataimu;

⁶neende Abaahoori hu lugulu lwaabwe lwa Seyiri ohwoolera elalira Eliparani, hu lwaaho lw'esiparara.

⁷Bano bakaluuhana baakobola mani niboola Enumisipati (Kadesi). Nibayiingira esyaalo sy'Abameleki syoosi, bayiingira neende Abaamoori abali nibamenya mu Hasasonitamari.

⁸Omutuki wa Sodomu neende owa Gomora, neende owa Aduma, neende owa Sebboyimu, neende owa Bbela (Soari) basiingira mani beengira mu biita byali mu hooho lya Sidimu.

⁹Bali alala neende Kedorilaomeri omutuki wa Elamu, Tidali omutuki wa Goyiimu, Amorafeeli, omutuki wa Sinaari, neende Arioki, omutuki wa Elasaari, abatuki bane nibalwaania abatuki bataanu.

¹⁰Bulaanu ehooho lya Sidimu lyali lyeechulamo ameena k'ewula. Mani abatuki ba Sodomu neende Gomorah nibali nibeeruha, abaandi bakwiichaanga mu meena kano nibaayandamo, nae abadoong'ao nibeeruhira mu lugulu.

¹¹Abatuki bane bano bayaaya emyaandu kya Sodomu neende Gomora, neende obuyiinda bwaabwe bwoosi nibeweerao.

¹²Nae bayiriramo Loti, omwaana wa mwaanang'ina Abburamu, owali niyamenya mu Sodomu, alala neende emyaandu kyae kyoosi mani nibeweerao.

¹³Nae mulala hu baandu bano yaboolera Abburamu Omuibburania owali niyamenya aambi neende emisaala myoolerefu kya Mamure Omuamoori, mwaanang'ina Esikoli neende Aneri. Bano bali abakwa alala neende Abburamu.

¹⁴Abburamu niyawulira ati omunaluyia wae yawaambwa yaayirwa mu buwaambe, yabukula abasaacha bakugu abali nibeebulirwa mu daala lyae, aboola emia chidatu neende ehumi-na-bataanu-na-badatu (318), mani nibabaloondaho ohwoolera elalira Daani.

¹⁵Esiro nisyoola, Abburamu yakabulamo abalwaani bae. Omweene neende abahalaabani bae nibabaseeta mani nibaboongaho ohwoola Hobba, emukulu wa Damasiko.

¹⁶Mani Abburamu n'akobosa emyaandu ki abasuku bali nibayaayire. Yakobbosa neende Loti omunaluyia wae alala neende emyaandu kyae neende abahasi neende abaandu bosi.

¹⁷Abburamu niyakobola n'amalire ohuyiingira Kedoriloameri alala neende abatuki ba yali nabo, omutuki wa Sodomu yachia ohumubukaanira mu hooho lya Safe (Ehooho ly'omutuki).

¹⁸Nae Melikisedeki, omutuki wa Salemu, haandi owali yesi omulaamisi wa Nasaae w'Aakulu Muno, yaleetera Abburamu omugaati neende efiini.

¹⁹Mani Melikisedeki yaberesa Abburamu ehabi n'aboola ati, “Leha Nasaae w'Aakulu Muno aberese Abburamu ehabi, oyo owaloonga ekulu neende esyaalo;

²⁰haandi Nasaae w'Aakulu Muno w'ehabi, olwohuba ateere abasuku bao mu mahono kao!” Abburamu yaberesa Melikisedeki silala sy'ehumi sya buli siindu.

²¹Omutuki wa Sodomu n'aboolera Abburamu ati, “Ngobosere abaandu, nae ewe wedoong'isire emyaandu.”

²²Nae Abburamu yakobola mu mutuki wa Sodomu n'aboola ati, “Malire ohwechubira Omwaami, Nasaae w'Aakulu Muno, oyo owaloonga ekulu neende esyaalo,

²³endi siinjia hubukulaho kata oluwuusi lulala, kata sa olusya lw'ebiraato lwoong'ene, kata sa esiindu silala siti esyao syoosi daawe, ohaye ohuboola oti, ‘Ndakera Abburamu yaaba omuyiinda.’

²⁴Ese haba siinjia hwebukuliraho esiindu syoosi, nae ebiindu bi baraaga balya, neende omukabo kw'abaandu bachia naange, leha Aneri, Esikoli, neende Mamure bayire omukabo kwaabwe.”