Read saamia Ohuchaaka 15 Bible Online

Ohuchaaka 15 - saamia bible

Ohuchaaka 15

¹Ebyo nibyawa, Abburamu yaboneherwa, mani yaawulira Omwaami naamuboolera ati, “Abburamu otatya daawe, olwohuba njia ohuhuwonia mu bidinyu byao byoosi; haandi omukabo kwao kuchia ohuba omuhoongo muno.”

²Nae Abburamu yakobolamo yaboola ati, “Omwaami Nasaae, ochia ohumberesa omukabo siina? Olwohuba mbulaho omwaana yeesi, haandi omusiha yi ndi nae esiha sino yeeng'ene niye Elieseeri owa Damasiko.”

³Abburamu yaboola ati, “Bona, haba siwambaaho olwiibulo lwoosi; mani omwaana muwaambe owebulirwa mu daala lyaange niye sa ochia ohuba omusiha waange.”

⁴Mani bona, emboosi y'Omwaami yeechera Abburamu niyiboola yiti, “Omuwaambe wuno Elieseeri haba siniye ochia ohuba omusiha wao daawe; omwaana wao mweene niye ochia ohuhusihira sa.”

⁵Omwaami mani n'amutusa erwaanyi, naamuboolera ati, “Tingaala aakulu muukulu mani oteemeho ohubala eng'ining'ini, nooba n'onyala ohuchibala.” Mani naamuboolera ati, “Abeechuhulu bao bachia ohuba abaangi batyo.”

⁶Abburamu naamala naafukiirira bi Omwaami yaboola. Sino syakera Omwaami yaamusangaalira, haandi yaamuyira koti omuundu muluungifu muno.

⁷Mani Omwaami yamuboolera ati, “Niise Omwaami owahutusa mu syaalo sya Wuri esy'Abakaludiini, ohuhuberesa eloba lino libe elyao lyeene.”

⁸Nae Abburamu yamuteeba ati, “Omwaami Nasaae, ndaamanye endye ninjia ohuyira eloba lino ohuba elyaange?”

⁹Nae Omwaami yamukobolamo ati, “Ndeetere emoosi y'emyaaka kidatu, embusi subeeni y'emyaaka kidatu, ekoondi miiku ly'emyaaka kidatu, eguugu, neende ebburuuku.”

¹⁰Abburamu mani naamuleetera ebiindu bino byoosi. Ebisolo naabitemamo akatikaati, amahabi kabiri-kabiri; naata buli situundu ni sitiingalire esyaasye; nae amayoni haba siyakaataniamo daawe.

¹¹Nae engosya nichakwichaangaho nichidaha ohubilya, Abburamu yachiirusaanga.

¹²Nae elyuuba nilyali nilikwa, endoolo ch'amaani chadiira Abburamu; nae bone, esiirima sya titititi sy'amaani syakwaao syamwiirimaho.

¹³Mani Omwaami n'aboolera Abburamu ati, “Manya mubwadyeeri bweene oti, abeechuhulu bao bachia ohuba bawalukeenda mu syaalo sitaali esyaabwe; haandi bachia ohuba abawaambe ebweene eyo, haandi bachia ohubayira bubi nibabasaandya hulw'embaka y'emyaaka emia chine (400).

¹⁴Nae njia ohusaandya esyaalo sichia ohubawaamba. Nae ebyo nibyahawe, bachia ohutulayo nibali neende emyaandu miingi muno.

¹⁵Nae ewe hulwao, ochia ohuyiindira ofwe mani osiihwe bulai.

¹⁶Bachia ohukobola ano hu lwiibulo olwohune, olwohuba esibonereso sy'Abaamoori sisisiiri ohuwa.”

¹⁷Elyuuba nilyali nilikwiire, esiirima nisidiirire esyaalo, bone, endamu y'omuliro eyiniooha omwoosi neende esikeenga syaaduha omuliro, byabita akatikaati w'ebiindu byatemwamo ebituundu ebyo.

¹⁸Hu ludaalo olwo, Omwaami yahola endagaano neende Abburamu n'aboola ati, “Njia ohuberesa abeechuhulu bao eloba lino, ohutulira elalira hu mwaalo kwa Misiri ohwoolera elalira hu mwaalo muhoongo kwa Ewufuraate.

¹⁹Haandi njia ohubaberesa eloba ly'Abakeeni, Abakenisi, Abakadumooni,

²⁰Abahiiti, Abaperisi, Abarefaimu,

²¹Abaamoori, Abakanani, Abagirigasiti neende Abayebbusi.”