Read saamia Ohuchaaka 16 Bible Online

Ohuchaaka 16 - saamia bible

Ohuchaaka 16

¹Sarai, omuhasi wa Abburamu yali omukuumba nataamwiibuliraho omwaana yeesi. Nae Sarai yali neende omuhalaabani muhasi ohutula Misiri olaangwa Hagari.

²Sarai yaboolera Abburamu ati, “Bona, mbao Omwaami siyaanganya ohuhwiibulira abaana. Lwasiina sooyira omuwaambe waange muhasi wuno? Awuundi nyala ndanyoola abaana ohumubitiramo.” Abburamu yafukiirisania neende bi Sarai yamuboolera.

³Bino byaliwo Abburamu n'amalire mu Kanani embaka y'emyaaka ehumi. Sarai, omuhasi wae yabukula omuhalaabani wae muhasi olaangwa Hagari Omumisiri, mani naamuberesa Abburamu wamwe abe omuhasi wae.

⁴Abburamu yaba neende Hagari, mani yanyoola amabaanga. Nae Hagari niyabona ati ali aasito, yachaaka ohulekeeresa Sarai omuhoongo wae.

⁵Sarai yaboolera Abburamu ati, “Niiwe okera Hagari niyaambisamo emoni. Ndahuba omuhalaabani waange oyo endi abe naawe, nae niyabona ati ali aasito, yachaaka ohuundekeeresa sa. Leha Omwaami atuheerengeo omusaango ese naawe.”

⁶Nae Abburamu yaboolera Sarai ati, “Bona, omuwaambe wao oyo ali mu bunyala bwao, muholere syosi-syoosi syooba n'odaha.” Sarai yachaaka ohusaandya Hagari muno, mani niyeyiruhira n'awaao.

⁷Nae malaika w'Omwaami yanyoola Hagari mu siparara niyehaale aambi neende esulo y'amaachi, esulo yiri hu ngira yichia Suuri.

⁸Mani malaika yamuteeba ati, “Ewe Hagari, omuwaambe wa Sarai, otula yeena haandi oli ohuchia yeena?” Nae yamukobolamo ati, “Ndi ohwiiruha nindeeyiba hu Sarai omuhoongo waange.”

⁹Nae malaika w'Omwaami yamuboolera ati, “Kobola eyiri omuhoongo wao mani omuwulireenge.”

¹⁰Malaika w'Omwaami yamuboolera ati, “Njia ohwiingiya abeechuhulu bao babe abaangi abatanyala ohubalwa.”

¹¹“Ochia ohwiibula omwaana musyaani, omukulihe Yisimaeli; olwohuba Omwaami awuliire amaliro kao.

¹²Achia ohuba koti esuhiri, achia ohulwaania buli muundu, haandi buli muundu amulwaanie. Haba saachia ohumenya alala neende abanaluyia bae.”

¹³Hagari niyeteeba omweene ati, “Mubwadyeeri bweene, mbweene Nasaae mani ndadoong'a omulamu ohusikaniaayaangaho?” Mani yalaanga Omwaami wali alomaloome nae ati, “Nasaae obona.”

¹⁴Sakira abaandu balaanga esulo yiri akatikaati wa Kadesi neende Bberedi bati, “Esulo y'Omulamu Mweene Owumbona”.

¹⁵Hagari niyeebulira Abburamu omwaana musyaani, mani Abburamu yalaanga omwaana oyo Yisimaeli.

¹⁶Ebiha bi Hagari yeebuliramo Yisimaeli, Abburamu yali neende emyaaka amahumi kataanu-na-kadatu neende kisaasaba eky'obuhuluundu.