Read saamia Ohuchaaka 17 Bible Online

Ohuchaaka 17 - saamia bible

Ohuchaaka 17

¹Abburamu niyoosa emyaaka amahumi kataanu-na-kane neende kitaanu-na-kine eky'obuhuluundu, Omwaami yamubonehera yamuboolera ati, “Niise Nasaae w'Obunyala. Mbulire mani obe omuluungifu.

²Njia ohuhola endagaano yaange naawe, haandi njia ohwiingiya abeechuhulu bao.”

³Abburamu yeenama aasi, obweeni bwegeeng'a hu buloba, Nasaae yaamuboolera ati,

⁴“Bona, mbao hola endagaano naawe, ochia ohuba laatang'ene enjia nyiingi muno.

⁵Bulaanu, soochia hulaangangwa Abburamu, nae ochia ohulaangwa Abburahamu. Olwohuba huholere ohuba laatang'ene enjia nyiingi.

⁶Njia ohuhuberesa abeechuhulu baangi muno, mani njia ohuhutusamo ebyaalo biingi, haandi abatuki bachia ohuhutulamo.

⁷Njia ohutaao endagaano akatikaati waange naawe, neende abeechuhulu bao neende enjibulo chaabwe choosi. Njia ohuba Nasaae wao haandi Nasaae w'abeechuhulu bao boosi. Olwohuba endagaano yino, y'emyaaka kyoosi.

⁸Njia ohuhuberesa, ewe neende abeechuhulu bao boosi eloba lya Kanani lyoosi libe elyeeng'we lyeene emyaaka kyoosi haandi njia ohuba Nasaae waabwe.”

⁹Nasaae haandi n'aboolera Abburahamu ati, “Nae ewe hulwao, oli neende ohuliinda endagaano yaange, ewe neende abeechuhulu bao, olwiibulo lwaabwe lwoosi.

¹⁰Yino niyo endagaano yaange yi ndi ohuhola akatikaati waange naawe, y'ohoyere ohuliinda, ewe neende abeechuhulu bao boosi. Buli mwaana musyaani yeesi yi mwiibula ali ow'ohuhebwa.

¹¹Muchia ohuhebwaanga mani sino sibe esilolero sy'endagaano akatikaati waange naang'we.

¹²Ohutula buti ohwemeeda mu moni, buli mwaana musyaani w'ohuhebwaanga n'amalire endaalo chitaanu-na-chidatu. Kata ayahaba naali omwaana w'omuwaambe otaali ow'oluya lwao.

¹³Abaana boosi abeebulanwa bao, neende abawaambe bachia ohuhebwaanga. Mani endagaano yaange yitaakama yibe hu mibiri kyeeng'we.

¹⁴Buli mwaana musyaani otahebwa achia ohutusibwa hu baandu baange olwohuba achia ohuba afunaake endagaano yaange.”

¹⁵Nasaae haandi yaboolera Abburahamu ati, “Nae omuhasi wao Sarai haba soochia ohumulaangaanga oti Sarai, nae achia ohulaangwa Saara.

¹⁶Njia ohumuberesa ehabi, haandi ochia ohumwiibulamo omwaana musyaani. Njia ohumuberesa ehabi, haandi achia ohuba ng'ina enjia nyiingi, haandi abatuki b'abaandu bachia ohumutulamo.”

¹⁷Abburahamu mani yeenama aasi, obweeni bwegeeng'a hu buloba, nae yachaaka ohucheheerera n'abaasa ati, “Omuundu anyala ohunyoola omwaana naali neende emyaaka emia ndala (100)? Nae Saara anyala ohunyoola amabaanga hu myaaka kyae amahumi kataanu-na-kane.”

¹⁸Abburahamu yateeba Nasaae ati, “Lwasiina haba sooleha Yisimaeli yaaba sa omusiha waange?”

¹⁹Nae Nasaae yaboola ati, “Haba daawe, omuhasi wao Saara achia sa ohuhwiibulira omwaana musyaani mani omukulihe Yisaka. Njia ohuhola endagaano yaange yitaakama akatikaati waange nae haandi akatikaati waange neende abeechuhulu bae.

²⁰Nae Yisimaeli, yesi njia ohumuberesa ehabi mani nyingiye olwiibulo lwae koti lu wundiriire. Achia ohuba laatang'ene abaana batuki basyaani ehumi neende babiri, haandi njia ohuhola mu beechuhulu bae esyaalo sihoongo.

²¹Haandi njia ohutaao endagaano yaange neende Yisaka, yi Saara achia ohuhwiibulira ebiha koti bino omwaaka kwiicha.”

²²Nasaae niyamala ohulomaloma neende Abburahamu, yatula eyiri Abburahamu.

²³Hu ludaalo lweene olwo, Abburahamu yaheba omwaana wae Yisimaeli, neende abaana basyaani baandi abeebulirwa mu daala lyae, alala neende abawaambe beebulirwa mu daala lyae neende abo ba yali naakulire.

²⁴Abburahamu yawulira Nasaae mani yaaheba omwaana wae Yisimaeli naali neende emyaaka amahumi kataanu-na-kane neende kitaanu-na-kine eky'obuhuluundu.

²⁵Nae omwaana wae Yisimaeli yahebwa naali neende emyaaka ehumi neende kidatu eky'obuhuluundu.

²⁶Abburahamu neende omwaana wae Yisimaeli bahebwa hu ludaalo nasilala olwo,

²⁷alala neende abasaacha bawaambe boosi ba yali niyakula.