Read saamia Ohuchaaka 18 Bible Online

Ohuchaaka 18 - saamia bible

Ohuchaaka 18

¹Omwaami haandi yabonehera Abburahamu naali aambi neende emisaala myoolerefu kya Mamure. Yali niyehaale amwiingira w'eyeema lyae esideete omubasu nikufwa muno.

²Abburahamu niyasiingisa obweeni bwae yatingaala, nae bone, abasaacha badatu bali nibeemere mu moni wae. Nae niyababona sa ati, yeeruha n'atula mu mulyaangiro kw'eyeema ohuchia ohubakaanira. Yeenamya aasi, obweeni bwae nibwegeeng'a hu loba,

³mani n'aboola ati, “Abaami, mutabita sa ango waange nimuteemerehoo daawe; ese nduwo ohubahalaabanira.

⁴Lehe mbaleetereho amaachi mweyose amakulu, munyala ohuwuluuhira mu siiniha sy'omusaala kuno.

⁵Njia ohubaleeteraho ebyohulya; mulye hu munyoole amaani, mani munyale ohwemeeda neende olukeendo lweeng'we. Mumbereese oluyaali ohuungeniiya, mani lehe syesi mbahalaabanire.” Nabo nibamukobolamo bati, “Otyo muno, hufukiriire.”

⁶Abburahamu yasiingiriramo yeengira mu yeema yaboolera Saara ati, “Yaanguyirisaho, bukula bwaangu ebipiimo bidatu eby'obusye, okaande mani wuubbemo emigaati.”

⁷Abburahamu yeeruha yaachia mu hoonge, yaabukula emoosi nginu haandi endai, n'ayiberesa abahalaabani bae, abayisiinja haandi bayibaaka bwaangu muno.

⁸Abburahamu haandi yabukula amafuta k'eng'oombe, neende amabeere, alala neende emoosi enginu yibasiinja, mani naabibaberesa nibalya, nae omweene yadoong'a naabahalaabanira mu siiniha sy'omusaala.

⁹Mani nibamuteeba bati, “Nae omuhasi wao Saara ali yeena?” Yabakobolamo ati, “Ali mu yeema.”

¹⁰Mulala hu bakeni abo yamuboolera ati, “Embaka y'emyoosi kitaanu-na-kine ohutula buti, njia ohukobola obutakosa, mani omuhasi wao Saara achia ohuba neende omwaana musyaani.” Nae Saara yali niyeemere emukoongo w'olwiiki n'atekereese.

¹¹Abburahamu neende Saara bali nibakofula nibabitiriire mu myaaka. Saara yali niyaakama ohuchia mu mwoosi.

¹²Mani Saara niyeecheha omweene n'aboola ati, “Ese ndamala ohwetulira hu lwaanyi, haandi omusaacha waange yesi mukofu niye, mani mbula obwekoombi bwoosi obw'omusaacha.”

¹³Nae Omwaami n'ateeba Abburahamu ati, “Lwasiina Saara achehere n'aboola ati, ‘Ndahanyala ohwiibula omwaana mu bukofu bwaange buno?’

¹⁴Sibulao esiindu sihaya Omwaami. Koti lu mboolere, embaka y'emyoosi kitaanu-na-kine ohutula buti, njia ohukobola obutakosa, mani Saara achia ohuba neende omwaana musyaani.”

¹⁵Nae olwohuba Saara yali n'atiire, yayingana n'aboola ati, “Ese haba sinjehere.” Nae Omwaami yaakobolamo n'aboola ati, “Eee mubwadyeeri, ewe ochehere.”

¹⁶Abasaacha abo basiingira baachia abuundu yi banyala ohwewuunja mani baabona Sodomu. Abburahamu yachia nabo ohubagoobaho naabeekesa engira.

¹⁷Omwaami yaboola ati, “Haba siinjia ohukisa Abburahamu esiindu siinjia ohuhola.

¹⁸Abeechuhulu bae bachia ohweehola esyaalo sihoongo haandi esy'amaani; haandi ebyaalo byoosi bichia ohunyoola ehabi nibimubitiramo.

¹⁹Ndamudoola endi anyale ohulagira abaana bae neende abeechuhulu bae ohuumbulira, mani baholeenge ebiindu ebihoyera neende eby'obwadyeeri. Nibahola batyo, njia ohumuholera buli siindu si musuubise.”

²⁰Omwaami haandi yaboolera Abburahamu ati, “Olwohuba Sodomu neende Gomora babyekanyiisire muno, haandi esyonoono syaabyo sihoongo muno,

²¹njia ohwiiha mbone oba amaliro kabandekanyisiire kadyeeri niko, nibitaali bityo njia ohumanya.”

²²Ao mani abasaacha babiri batulao, bemeeda ohuchia Sodomu, nae Omwaami n'adoong'a neende Abburahamu.

²³Abburahamu yasuda aambi neende Omwaami yaamuteeba ati, “Bwadyeeri mbwe ochia ohusihirisa abaandu baluungifu alala neende abonooni?

²⁴Nae niwiichuhana abaandu baluungifu amahumi kataanu baaba nibali mu siko esyo, oba ochia sa ohusihirisa esiko esyo mani ohaye ohuwonia abaluungifu amahumi kataanu abalimo?

²⁵Nae Omwaami yakobolamo ati, haba daawe, siinyala ohuhola esiindu sityo daawe, ohusihirisira omuluungifu alala neende omuhola-mbi. Ohuyira omuluungifu nasilala neende omuhola-mbi. Esyo haba sisinyalihana daawe. Oyo oheengera esyaalo omusaango w'obwadyeeri niye.”

²⁶Mani Omwaami yakobolamo ati, “Niwiichuhana ndanyoola mu siko sya Sodomu abaandu baluungifu amahumi kataanu, haba siimba niinjia ohusisihirisa daawe, hulw'abaandu amahumi kataanu abo.”

²⁷Abburahamu yakobolamo ati, “Bona, mbao ndeyaanireyo omweene ohulomaloma neende Omwaami, ese omuundu oolifwa sa.

²⁸Nae hu mahumi kataanu abaluungifu, nihubulaho abaandu bataanu. Oba ochia sa ohusihirisa esiko syoosi olwohuba hu baandu amahumi kataanu abo hubulaho abaandu bataanu?” Nae Omwaami yaboola ati, “Haba siimba niinjia ohusihirisa esiko esyo ninyoolamo abaandu baluungifu amahumi kane neende bataanu.”

²⁹Abburahamu yalomaloma haandi yaboola ati, “Niwiichuhana abaandu amahumi kane abaluungifu baaba nibo abali sa mu siko esyo.” Omwaami yakobolamo ati, “Hulw'abaandu amahumi kane abo, haba siimba niinjia ohusisihirisa daawe.”

³⁰Mani Abburahamu haandi yaboola ati, “Leha mbaase endi Omwaami saachia ohuunyoolerera, nae haandi haamaye akalomaloma. Nae niwiichuhana babaamo abaandu baluungifu amahumi kadatu.” Omwaami yakobolamo ati, “Haba siimba niinjia ohusihola daawe ninyoolamo abaandu amahumi kadatu abo.”

³¹Abburahamu haandi yaboola ati, “Bona, omweene ndeyaanireyo ohulomaloma neende Omwaami. Nae niwiichuhana mwabaamo abaandu baluungifu amahumi kabiri boong'ene.” Omwaami haandi yakobolamo ati, “Hulw'abaandu amahumi kabiri abo, ese haba siimba niinjia ohusisihirisa daawe.”

³²Abburahamu haandi yaboola ati, “Leha Omwaami ataanyoolerera daawe, luno haandi njia ohulomaloma ehabi lala lyoong'ene. Nae niwiichuhana mwaabaamo abaandu ehumi.” Omwaami yakobolamo ati, “Hulw'abaandu ehumi abo, ese haba siimba niinjia ohusisihirisa daawe.”

³³Ao, Omwaami yawaao, n'amalire ohulomaloma neende Abburahamu; Abburahamu yeweerao yeekobolera engo wae.