Read saamia Ohuchaaka 19 Bible Online

Ohuchaaka 19 - saamia bible

Ohuchaaka 19

¹Bamalaika babiri boola Sodomu engoloobe. Loti yali niyehaale mu siruwa sya Sodomu. Loti niyababona, yasiingira ohubaakaanira, mani yeenama, obweeni nibwegeeng'a hu loba,

²n'aboola ati, “Abaami, ndi ano ohubahalaabanira. Mbekongooya mwiiche mube mu nyuumba yaange. Munyala ohweeyosa amakulu, mani mweyalisa ano esiro sino. Nibunaahye echuli, munyala mwawuuna ohwemeede neende olukeendo lweeng'we.” Nae nibakobolamo bati, “Daawe; efwe huchia ohweyalisa hu ngira.”

³Yameeda-bumeeda ohubekweeda, mani baachia nae ewae, beengira mu nyuumba yae. Yaabaholera Esidyaalo, haandi yaboobbera emigaati kitabbaahirwe, baalya.

⁴Nae nibasisiiri ohweeyalisa, abasaacha bomu Sodomu, bebodoohania enyuumba eyo. Abasaacha bomu siko boosi, abayere neende abahuluundu beecha baakedeeresania enyuumba eyo

⁵balaanga Loti nibamuteeba bati, “Abasaacha bahukeniiye engoloobe yino bali yena? Batuse erwaanyi hubakone.”

⁶Loti yatula erwaanyi mani yeekalao olwiiki.

⁷Yababoolera ati, “Basyaange mbekweeda mutaholaho abakeni bano esyonoono esyo.

⁸Bone, ndi neende abahaana baange babiri abataamanyireho eby'abasaacha. Lehe mbatuse mbaberese, munyale ohubahola koti lu mudaha. Nae mutaholaho esiindu syoosi hu basaacha bano; olwohuba bakeni nibo mu daala lyaange, hoyerwa ohubaliinda bulai.”

⁹Nabo bamukobolamo bati, “Tuweere-eyi, walukeendwa sa ewe! Niiwe wiina otuboolera esy'ohuhola? Tuweere-eyi, ataali ao, huchia ohuhuhola obubi ohuhiraho bihwahabaholere.” Mani nibafwiinyirira Loti muno, nibaba aambi ohufunaka olwiiki.

¹⁰Nae abasaacha abo bahweesa Loti baamwiingisa mu nyuumba, mani beekalao olwiiki.

¹¹Mani nibawofusa abasaacha bali erwaanyi w'enyuumba boosi, abayere neende abahuluundu, mani nibachaaka ohubabaasaanga sa nibakoonyeresa yi lwiiki luli.

¹²Bulaanu abasaacha abo nibateeba Looti bati, “Oliho neende omuundu yesi-yeesi muno? Tusa abaandu bao boosi mu siko sino, abaana basyaani, abaana bahaana, abahwe, oba omwiiho wuundi yeesi owamenya mu siko sino, boosi obatuse mu siko muno.

¹³Olwohuba huchia ohusihirisa abuundu ano. Omwaami awuliire ohwekanyiirisa hubi ohudiira hu baandu bano, mani Omwaami atutumire ohusihirisa Sodomu sino.”

¹⁴Looti yatula erwaanyi mani yaboolera abahwe bae, abo abali nibachia ohudeehya abahaana bae abo ati, “Siingire, mutule ano, olwohuba Omwaami achia ohusihirisa abuundu ano.” Nabo nibabaasa bati ali ohukachula-bukachula.

¹⁵Nibwahya echuli, bamalaika abo bateemaho muno ohubona bati Looti yaanguyaho; mani nibaboola bati, “Siingira obukule omuhasi wao neende abahaana bao boombi abo abali ano, mani muhaye ohufwiira mu siko sy'abonooni sino.”

¹⁶Nae Looti yachaaka ohweng'oyaania; nae Omwaami ohudaha ohumukwiira esisa, abasaacha bano bamukwaaho alala neende omuhasi wae, neende abahaana bae, mani nibabahwehweesa nibabadiirire amahono, nibabatusa erwaanyi w'esiko.

¹⁷Nibamala ohubatusa boosi erwaanyi w'esiko esyo, malaika mulala yababoolera ati, “Mwiiruhe muwonie obulamu bweeng'we. Mutahubbaho amahemo enyuma daawe, kata sa mweemaho mu hooho omwo daawe. Mwiiruhire mu bigulu hu muhaye ohwiitwa.”

¹⁸Nae Looti yamukobolamo ati, “Omwaami, haba daawe; otakera hwaahola esyo.

¹⁹Wuungwiriire muno esisa, niwumonia ohufwa. Nae ebigulu ebyo biri eyale muno, amasira kanyala ohungwaaho mani ndaafwa nisisiiri ohwoolayo.

²⁰Obona esiko sidiidi esyo? Nisyo esiri aambi muno. Leha njiruhire omwo, monisireyo obulamu bwaange, olwohuba ebiha biimbweereho!”

²¹Mani Omwaami yamuboolera ati, “Bona chia, mbao ese hufukiriire. Haba siinjia husihirisa esiko esyo daawe.

²²Yanguyaho! Yiiruha! Haba siinjia ohuhola esiindu syoosi n'otoolayo.” Koti lu Looti yalaanga esiko esyo ati sidiidi, sakira esiko esyo syakulihwa Soari.

²³Looti yoola Soari elyuuba hulitula.

²⁴Mani Omwaami naakwiisa hu Sodomu neende Gomora omuliro ohutula muukulu;

²⁵mani naasihirisa ebiko ebyo neende ehooho lyoosi alala neende abaandu bomu biko ebyo boosi neende buli siindu syoosi esyamera hu loba.

²⁶Nae omuhasi wa Looti yahubba amahemo enyuma mani niyehola esiiro y'omuunyu.

²⁷Obwiire nibwahya, Abburahamu yawuuna echuli-chuli mu mabwiibwi, yaachia abuundu yi yali yeemeraho mu moni w'Omwaami;

²⁸n'atingaalire emwaalo wa Sodomu neende Gomora, alala neende esyaalo syomu hooho, yabona omwoosi nikuniooha nikutula mu syaalo esyo, nikuli koti omwoosi muungi kw'esiroombe.

²⁹Nae Nasaae niyali n'asihirisa ebiko byomu hooho bi Looti yali yamenyamo, yeechulisa Abburahamu mani yaafukiirira Looti ohubyeeyibamo ahaye ohusihiriswa.

³⁰Looti yatya ohudoong'a mu Soari, mani yawuuya alala neende abaana bahaana bae boombi, baachia mu bigulu, nibamenya mu ng'uungu.

³¹Omwaana muhuluundu yaboolera omuyere ati, “Laata yeefwe mbao akofula, nae abulao omusaacha wuundi yeesi hu syaalo onyala ohutudeehya daawe mani hwanyoola abaana.

³²Yicha, leha hung'weese seefwe amalwa ameere, mani huchie hube nae mani hwiibule nae.”

³³Mani nibang'weesa saabwe efiini, esiro esyo omwaana muhuluundu naaba neende laatang'ene. Nae laatang'ene yali n'ameerere muno mani sino n'atasimanya daawe.

³⁴Nae nibwahya, omwaana muhuluundu yaboolera omuyere ati, “Bona, ekulo ndabeere neende laata yeefwe; leha nyaanga yino lwosi humumeese haandi, mani wesi ochie obe nae. Mani hukanye laata yeefwe atwiibulemo abaana.”

³⁵Ao mani, nibang'weesa laata yaabwe amalwa nameera esiro esyo syosi. Mani omwaana muyere yesi naaba neende laata yaabwe oyo. Nae koti lu laata yaabwe oyo yali n'ameerere muno, esiindu si yahola sino haba siyasimanya daawe.

³⁶Mani abaana ba Loti boombi nibanyoola amabaanga neende laata yaabwe mweene.

³⁷Omwaana muhuluundu niyeebula omwaana musyaani, mani naamukuliha ati Moabbu. Wuno niye kukaang'ene Abamoabbu ohwoola buti.

³⁸Omwaana muyere yesi niyeebula omwaana musyaani mani naamukuliha ati Bbenami. Wuno niye kukaang'ene Abaamooni boosi ohwoola buti.