Read saamia Ohuchaaka 20 Bible Online

Ohuchaaka 20 - saamia bible

Ohuchaaka 20

¹Ao Abburahamu niyatula Mamure, yaachia emwaalo w'esyaalo sya Kanani, mani yaamenya akatikaati wa Kadesi neende Suuri. Abburahamu haandi yatula ao yaachia yaamenya mu Gerari.

²Abburahamu naali mu Gerari, byamuyika yaboola ati Saara omuhasi wae yali mboochoong'ene. Mani Abbimeleki, omutuki wa Gerari n'atuma bachie bamuleetere Saara.

³Nae Nasaae n'abonehera Abbimeleki esiro mu silooto mani n'amuboolera ati, “Bona, ewe omalire ohufwa, olwohuba omuhasi yooyirire wuno, ali neende wamwe.”

⁴Nae Abbimeleki yali n'asisiiri ohubaaho nae, mani yaboola ati, “Omwaami, ese mbula omusaango kwoosi. Otaasihirisira alala neende abaandu baange.

⁵Abburahamu mweene niye owaboola ati Saara yali mboochoong'ene. Saara yesi yaboola esiindu nasilala esyo. Sino ndasihola mu omwooyo mulai, niimbulaho neende esichiiririrwa sibi syoosi.”

⁶Mani Nasaae yaboolera Abbimeleki mu silooto ati, “Eee, ese manyire endi esyo wasihola mu mwooyo mulai, mani ese mweene nihukayirira ohwonoona mu moni waange, nitahufukiirira ohumudiiraho daawe.

⁷Nae bulaanu, kobosera omuhasi wuno wamwe. Omusaacha oyo koti lu ali omunabbi, achia ohuhwekongooyera ohaye ohufwa. Nae noohaya ohumukobosayo, hulabula endi oli omufu, ewe alala neende abaandu bao boosi.”

⁸Abbimeleki yasiingira echuli-chuli mu mabwiibwi, mani yalaanga abachweenufu bae boosi, yaababoolera ebiindu ebyo byoosi mani baatya muno.

⁹Abbimeleki yalaanga Abburahamu mani yaamuteeba ati, “Otuholere siina syeene sino? Sibi siina si huholere esikera wandeetera alala neende obwaami bwaange amasira kano? Abulao omuundu yeesi onyala ohuhola esiindu sy'oholere.

¹⁰Lwasiina osiholere?”

¹¹Abburahamu yakobolamo ati, “Ndabaasa endi, abuundu ano, abulao omuundu otya Nasaae, haandi endi banyala baanjita hu banyale ohuundusaho omuhasi waange.

¹²Kata katyo, mboocho yaange mweene niye. Mwaana wa laata yaange wuundi, nae haba si mwaana wa mako yaange daawe, mani sakira ndamudeehya.

¹³Mani Nasaae niyaanduma ohutula mu ngo wa laata yange, njie mu byaalo biteende, yamboolera ati, ‘Sino nisyo siindaha wuhoonye, buli yihwoola woosi, boolaanga oti, wuno mboochoo niye.’”

¹⁴Mani Abbimeleki yakobosera Abburahamu omuhasi wae Saara. Abbimeleki haandi yaberesa Abburahamu amakoondi, ebyaayo, neende abawaambe bae.

¹⁵Abbimeleki n'aboolera Abburahamu ati, “Bona, eloba lyaange lyoosi liri mu moni wao. Menya buli yoodaha woosi.”

¹⁶Nae Abbimeleki yaboolera Saara ati, “Bona, mbao mbereese mboochoo ebituundu by'efeesa elifu ndala. Sino nisyo esilolero mu moni w'abaandu bali naawe, neende eyiri abaandu boosi siti, obulaho omusaango kwoosi.”

¹⁷Abburahamu yasaba Nasaae; mani Nasaae yaawonia Abbimeleki, haandi yaawonia omuhasi wae yesi neende abahasi bawaambe baanyala ohwiibula.

¹⁸Olwohuba Omwaami yali niyaboya enda ch'abahasi boosi abali mu daala lya Abbimeleki nibateebulaangaho daawe hulwa Saara, omuhasi wa Abburahamu.