Read saamia Ohuchaaka 21 Bible Online

Ohuchaaka 21 - saamia bible

Ohuchaaka 21

¹Omwaami yaberesa Saara ehabi koti lu yali yamusuubisa.

²Saara yanyoola amabaanga, yeebulira Abburahamu mu bukofu bwae omwaana musyaani. Omwaana yeebulwa mu biha byeene bi Nasaae yali amuboleere.

³Abburahamu yakuliha omwaana oyo Yisaka.

⁴Yisaka niyamala endaalo chitaanu-na-chidatu, Abburahamu yamuheba koti lu Nasaae yali yamulagira.

⁵Abburahamu niyeebula Yisaka, yali neende emyaaka emia ndala (100) eky'obuhuluundu.

⁶Mani Saara yaboola ati, “Nasaae yandeteere esangaalo neende enjeho. Buli muundu onasiwulire achia ohucheha naange.”

⁷Mani Saara yameedaho ati, “Wiina mweene owali naamanyire ati, Saara omuhasi wa Abburahamu yesi anyala ohwiibula omwaana yaamunuunia hu mbeere chae? Nae bone, mbano mwiibuliire omwaana musyaani mu bukofu bwae.”

⁸Omwaana oyo yahula, mani hu ludaalo lu bamutusira hu lubeere, Abburahamu yahola esidyaalo sihoongo.

⁹Ao mani Saara yeemao yaabona omwaana yi Hagari omuhasi Mumisiri yi yebulira Abburahamu naabaya neende Yisaka omwaana wae.

¹⁰Saara yababona mani yaboolera Abburahamu ati, “Yirusa omuhasi muwaambe wuno atule ano neende omwaana wae oyo. Olwohuba omwaana w'omuhasi omuhalaabani wuno haba saahoyera ohunyoolaho hu myaandu kyao, ekichia ohuba obusiha bwa Yisaka omwaana waange.”

¹¹Esiindu sino syanyaasa muno Abburahamu mu bibaaso, olwohuba Yisimaeli yesi yali omwaana wae.

¹²Mani Nasaae yaboolera Abburahamu ati, “Oteyendeherera muno ebidiira hu mwaana wa Hagari omuwaambe wao. Hola buli siindu si Saara ahuboolera, olwohuba abeechuhulu ba ndahusuubisa bachia ohutula mu Yisaka sa.

¹³Nae omwaana w'omuhasi muwaambe oyo, yesi njia ohumuba abaana baangi, mani beehole esyaalo. Olwohuba oyo yesi mwaana wao niye.”

¹⁴Nibwahya echuli mu mabwiibwi, Abburahamu yaberesa Hagari ebyohulya neende esikiingiro sy'eseero sichuulemo amaachi. Abburahamu yata omwaana oyo hu mukoongo kwa Hagari, mani yaamuseebula. Hagari yaawaao mani yakeendaanira mu sichiimi sya Bberisebba.

¹⁵Nae amaachi komu sikiingiro sy'eseero esyo nikawaamo, Hagari yaleha omwaana oyo mu siiniha sy'omusaala kuundi.

¹⁶Mani yeseenda yehala emiita emia ndala (100) eyalehooho neende omwaana oyo. Yaboola mu mwooyo kwae ati, “Haba siinyala ohwesimiirisa ohubona omwaana waange naafwa.” Niyali niyehaale ao yatingaala omwaana wae, mani yatuunduha yaalira.

¹⁷Nasaae yawulira omwaana n'alira mani malaika wa Nasaae naatula Muukulu n'alaanga Hagari naamuboolera ati, “Hagari, siina syeene esihunyaasa ebibaaso? Otatya daawe. Nasaae awuliire omwaana oyo n'alira.

¹⁸Siingira, okiinge omwaana oyo, omwaakate bulai. Njia ohuhola esyaalo sihoongo ohutula mu beechuhulu bae.”

¹⁹Nasaae yamwaamula emoni, mani yaabona esulo y'amaachi. Yachia yaadaya amaachi, yeechusa esikiingiro sy'amaachi sy'eseero esyo, mani yaaberesa omwaana amaachi kaandi ohung'wa.

²⁰Mani omwaana oyo yaahula Nasaae naali nae. Yisimaeli yamenya mu sichiimi sya Parani, mani yaaba omuchweenufu muno mu hulwaanira obuyiingo.

²¹Ng'ina yamunyoolera omuhasi ohutula mu syaalo sy'e Misiri.

²²Ao mu biha ebyo, Abbimeleki neende Fikoli omuhoongo w'eye lyae, bachia baaboolera Abburahamu bati, “Nasaae ali naawe mu buli siindu sy'ohola.

²³Bulaanu sakira mu moni wa Nasaae ndeechubire oti, soochia huumbacha kata sa ohubacha abaana baange kata sa abeechuhulu baange. Koti lu mbeere omuwulisi yooli, mbaasa endi wesi ochia ohuba omuwulisi yi ndi neende eyo yoosi y'ochia ohumenyaanga.”

²⁴Abburahamu yaboola ati, “Ndeechuba.”

²⁵Bulaanu Abburahamu yekanyiirisira Abbimeleki ebidiira hu sulo yi bahalaabani ba Abbimeleki bali bawaamba.

²⁶Abbimeleki yeemao yaboola ati, “Haba siimanyire owasihola daawe. Haandi haba simumbooleraangaho esiindu syoosi. Lwaleero nilwo olutaangira ohusiwulira.”

²⁷Mani Abburahamu yaaberesa Abbimeleki amakoondi neende eng'oombe, mani boombi bahola endagaano.

²⁸Abburahamu yawulamo amakoondi madoto kataanu-na-kabiri ohutula mu hoonge yae.

²⁹Abbimeleki yateeba Abburahamu ati, “Lwasiina wawuulemo amakoondi madoto kataanu-na-kabiri?”

³⁰Nae Abburahamu yakobolamo ati, “Fukiirira huberese amakoondi madoto kataanu-na-kabiri kano. Sino sinyale ohwomiisa siti, niise owayaba esulo yino.”

³¹Sakira, abuundu ao alaangwa Bberisebba. Olwohuba ao niwo yi boombi baholera esichubo.

³²Nibamala ohuholera endagaano yino Bberisebba, Abbimeleki neende Fikoli bakobola mu syaalo sy'Abafilisiti.

³³Mani Abburahamu n'ataaka omusaala mutamarisiki Bberisebba, mani yeenamirao Omwaami, Nasaae w'endaalo choosi.

³⁴Abburahamu yamenya mu syaalo sy'Abafilisiti ohumala embaka yiyeraho.