Read saamia Ohuchaaka 22 Bible Online

Ohuchaaka 22 - saamia bible

Ohuchaaka 22

¹Bino nibyawa, Nasaae yateema Abburahamu yamulaanga ati, “Abburahamu!” Nae yakobolamo ati, “Ndiwo”.

²Nasaae yamuboolera ati, “Bukula omwaana wao, omwaana wao mudeerwa Yisaka, omuheerwa wao oyo, ochie mu syaalo sya Moria, omuyaanireyo eyo koti esiyaanwa sisaambe hu lugulu lu njia ohuhweekesa.”

³Mani nibwahya echuli mu mabwiibwi, Abburahamu yasiingira, yasyaaka eehwi, yaachita hu suhiri yae, haandi yaabukula abahalaabani bae babiri, neende omwaana wae Yisaka bachaaka olukeendo. Basiingira baachia abuundu yi Nasaae yali naamuboolere.

⁴Endaalo chidatu nichabitao, Abburahamu yasiingisa obweeni mani yaabona abuundu ao.

⁵Abburahamu yaboolera abahalaabani bae babiri ati, “Eng'we mudoong'e ano neende esuhiri chino, nae ese neende omusoliiri waange wuno huchie eyo mani hwiinamire Nasaae. Nihuba nihumalire, huchia ohukobola yi muli.”

⁶Abburahamu yabukula eehwi ch'ohusaambira esiyaanwa mani n'achidwiiha Yisaka omwaana wae oyo. Nae omweene yakiinga omuliro neende ehaande. Boombi bakeendera alala nibachia.

⁷Yisaka yaboolera laatang'ene ati, “Laata!” Nae yakobolamo ati, “Ndiwo, mwaana waange.” Mani Yisaka yateeba ati, “Bona, omuliro neende eehwi mbino biriwo; nae ekoondi lyohusaamba koti esiyaanwa liri yeena?”

⁸Abburahamu yakobolamo ati, “Nasaae mweene niye ochia ohwenyoolera ekoondi lyohusaamba.” Mani boombi nibakeendera alala nibachia.

⁹Nae niboola abuundu yi Nasaae yali naamuboleere, Abburahamu yoombahao alutaari, yaalaho bulai eehwi. Yaboya Yisaka omwaana wae, yaamwaalisa hu hwi chiri hu alutaari.

¹⁰Bulaanu Abburahamu yasobolayo ehaande ohumwiita.

¹¹Nae malaika w'Omwaami naamulaanga naali muukulu ati, “Abburahamu, Abburahamu!” Nae yaakobolamo ati, “Nduwo.”

¹²Malaika yamuboolera ati, “Otanyaalaho omwaana wao oyo, kata sa waamuholaho esiindu syoosi. Bulaanu manyire endi hane wiisa oluyaali haandi otya Nasaae. Olwohuba haba soohayire ohuumberesa omwaana wao mudeerwa.”

¹³Abburahamu yahubba amahemo enyuma mani yaabonayo ekoondi emiiku niliyandiisye enjika chalyo mu sichaha. Abburahamu mani n'abukula ekoondi emiiku elyo, naaliyaanayo koti esiyaanwa sisaambwa ataali omwaana wae oyo daawe.

¹⁴Abburahamu yalaanga abuundu ao ati, “Omwaami niye oberesa.” Kata buti, abaandu baboolaanga sa bati, “Hu lugulu lw'Omwaami, omweene niye oberesa.”

¹⁵Malaika w'Omwaami naali muukulu haandi yalaanga Abburahamu ehabi lyohubiri,

¹⁶haandi yaboola ati, Omwaami aboola ati, “Ndeechuba mu liita lyaange lyeene endi, njia ohuhuberesa ehabi nyiingi. Koti lw'oholere sino, mani waahaya ohuunyima omwaana wao mudeerwa,

¹⁷syesi suubisa endi njia ohuhuberesa abeechuhulu baangi, abaangi koti eng'ining'ini ch'aakulu, haandi koti omusenye kwohu lwaasi lw'enyaanja. Abeechuhulu bao bachia ohuyiingira abasuku baabwe.

¹⁸Ebyaalo byoosi bichia ohuusabaanga ehabi koti lu mbereese abeechuhulu bao ehabi. Njia ohuhola bino byoosi olwohuba wumbuliire.”

¹⁹Mani Abburahamu yakobola eyiri abahalaabani bae, nibawaao boosi ohukobola Bberisebba, yi Abburahamu yamala yaamenya.

²⁰Ebyo nibyawa, baboolera Abburahamu bati, Milika yesi yeebuliire Nahori mwaanang'ina abaana bataanu-na-badatu.

²¹Wuusi omwaana waamberi, Bbusi mwaanang'ina, Kemueli laatang'ene Aramu,

²²Kesedi, Haso, Pilidaasi, Yidilaafi, neende Bbetueli.

²³Bbetueli niye laatang'ene Rebbeka. Milika yebulira Nahori, mwaanang'ina Abburahamu abaana bataanu-na-badatu bano.

²⁴Rewuma, omuhasi w'erwaanyi wa Nahori yesi yeebula Tebba, Gahamu, Tahasi, neende Maaka.