Read saamia Ohuchaaka 23 Bible Online

Ohuchaaka 23 - saamia bible

Ohuchaaka 23

¹Saara yayiindira ohumala emyaaka emia ndala neende amahumi kabiri neende kitaanu-na-kibiri (127).

²Saara yafwiira Hebburoni mu syaalo sya Kanani, mani Abburahamu naamulira muno.

³Ao mani Abburahamu yasiingira yaaleha omulaambo kw'omuhasi wae, yaachia eyiri Abahiiti yababoolera ati,

⁴ “Ese ndi walukeendwa owamenya ano yi muli. Muunguseho hu loba, siihemo omuhasi waange.”

⁵Abahiiti bamukobolamo bati,

⁶“Tekeeresa bi huboola ewe omwaami weefwe. Siiha omuhasi wao abuundu weefwe ahiramo obulai. Buli muundu yeesi hweefwe achia ohuba omusangaafu ohuhuberesa eng'ani, onyale ohumusiihamo.”

⁷Abburahamu yaguunama mu moni waabwe

⁸yaboola ati, “Nimufukiriire muti ese siihe ano omuhasi waange, mwekweede Efirooni omwaami wa Sohari,

⁹yaanguse eng'uungu eyiri Makipela, eyiri aambi neende endalo yae. Mumusabe ayiinguse, njia ohumutuunga obukusi bwoosi bulaanu buti nimubona, yibe eyaange y'ohusiihaangamo abafu baange.”

¹⁰Efirooni yesi yali niyehaale alala neende Abahiiti baandi, abuundu yi bebuusiraanga hu mulyaango kw'esiko. Efirooni Omuhiiti yaboolera Abburahamu abaandu boosi nibawulira ati,

¹¹“Haba daawe omwaami waange ewe! Ndekeerese. Njia ohuhuberesa omukuunda, haandi huberese neende eng'uungu yirimo yosi, abaandu baange beene bano nibabona. Njia ohuhuberesa osiihemo omuhasi wao.”

¹²Abburahamu yaguunama mu moni wa Abahiiti

¹³mani yaboolera Efirooni abebulanwa bae boosi nibawulira ati, “Hwekongooya, otekeerese. Omukuunda kwoosi njia ohukukula hu bukusi. Fukiirira ngutuunge, mani siihemo omuhasi waange.”

¹⁴Efirooni yakobolamo ati,

¹⁵“Omwaami waange, omukuunda kuno kuhoyera ebituundu by'efeesa emia chine (400), esyo sihunyaasira siina? Ewe mala kasiihamo omuhasi wao.”

¹⁶Abburahamu yafukiirira, mani yapiimira Efirooni ebituundu by'efeesa emia chine (400), ohuchianakana neende ebipiimo bi bachurusi beehoonyeraanga.

¹⁷Mani eyo niyo engeri yi mukuunda kwa Efirooni okwa Makipela, okwali ebukwe wa Mamure, kweehola okwa Abburahamu. Omukuunda kuno kwalimo eng'uungu neende emisaala kyoosi ohwoola hu lwaaho lwaakwo.

¹⁸Abahiiti boosi abali muluhiiho mu mulyaango kw'esiko basimanya bulai bweene bati, omukuunda okwo kw'Abburahamu nikwo.

¹⁹Bino nibyawa, Abburahamu yasiiha Saara omuhasi wae mu ng'uungu eyiri mu mukuunda kwa Makipela okwali ebukwe wa Mamure mu syaalo sy'Abakanani.

²⁰Omukuunda okwo alala neende eng'uungu yalimo, ebyali eby'Abahiiti, byeeholera elalira ebya Abburahamu, eby'ohusiihaangamo abafu bae.