Read saamia Ohuchaaka 26 Bible Online

Ohuchaaka 26 - saamia bible

Ohuchaaka 26

¹Bulaanu enjala yeemao yaakwa mu syaalo, enjala yino yakabuhanaho neende eyaliwo mu ndaalo cha Abburahamu. Mani Yisaka naachia Gerari eyiri Abbimeleki, omutuki w'Abafilisiti.

²Omwaami yali n'amalire ohubonehera Yisaka n'amuboolere ati, “Otachia Misiri daawe; doong'a sa mu syaalo sino mani omenye yi njia ohuhuboolera.

³Menya ano mani njia ohuba naawe haandi njia ohuhuba ehabi. Njia ohuhuberesa eeloba lino libe elyao neende ely'abeechuhulu bao. Njia ohwiichulisa esichubo si ndahola neende Abburahamu lataao.

⁴Njia ohuhuberesa abeechuhulu, mani bachia ohwiingiya babe koti eng'ining'ini cho muukulu, mani njia ohubaberesa esyaalo sino syoosi. Ebyaalo byoosi bichia ohuusaba biberese ehabi koti lu njia ohuba nindaberesa abeechuhulu bao.

⁵Njia ohuhuberesa ehabi, olwohuba Abburahamu yaambulira mani yaliinda amalako neende ebilagiro byaange.”

⁶Mani Yisaka n'amenya mu Gerari.

⁷Nae abaandu nibamuteeba ebidiira hu muhasi wae, yababoolera ati, mboochoong'ene niye. Haba siyanyala ohufukiirira ati muhasi wae niye daawe, olwohuba yali n'atiire ati abaandu banyala ohumwiita mani baayira Rebbeka, olwohuba yali n'aboneha bulai muno.

⁸Olwoola, Yisaka niyali n'amalire ohumenya mu syaalo esyo embaka ndeeyi hooho, Abbimeleki omutuki w'Abafilisiti yatingaala niyeemere aambi neende edirisa lyae mani yaboona Yisaka n'ali alala neende Rebbeka koti omusaacha neende omuhasi.

⁹Abbimeleki yalaanga Yisaka mani yaamuboolera ati, “Bona, oyo muhasi wao niye! Lwasiina oboola oti mboochoo niye?” Yakobolamo n'aboola ati, “Ese ndamanya endi bachia ohuunjita nimboola endi muhasi waange niye.”

¹⁰Abbimeleki yaboola ati, “Otuholere siina syeene sino? Omuundu wuundi yahakonere neende omuhasi wao mani yahatukwiisireho omusaango.”

¹¹Mani Abemeleki n'alagira abaandu boosi n'aboola ati, “Oyo yeesi olidiira hu musaacha wuno oba hu muhasi wae achia ohwiitwa.”

¹²Mani Yisaka n'ataaka ebyohulya mu syaalo esyo, omwaaka kweene okwo niyeeta emere muno. Omwaami yamuba ehabi,

¹³naaba omuyiinda, mani emyaandu kyae kyemeeda ohwoola lu yaba omuyiinda muno.

¹⁴Yisaka naaba neende ebyaayo neende amakoondi maangi muno, mani Abafilisiti nibamudiirira muno ehiinda.

¹⁵(Bulaanu Abafilisiti bali beekalao esulo chi bahalaabani b'Abburahamu laatang'ene bali bayaba mu ndaalo cha Abburahamu laatang'ene; nibeechusa mu esulo chino eloba.)

¹⁶Mani Abbimeleki n'aboolera Yisaka ati, “Tula mu syaalo syeefwe mani oweo; olwohuba mbao weholere omuyiinda ohutuhira fweesi.”

¹⁷Yisaka yatula eyo yacha yamenya mu hooho lya Gerari.

¹⁸Yisaka haandi n'ayaba esulo ch'amaachi chi bali bayaba mu ndaalo cha Abburahamu laatang'ene. Olwohuba Abafilisiti bali nibeekala esulo chino Abburahamu n'amalire ohufwa. Yisaka haandi yachikuliha ameeta ka laatang'ene yali niyachiberesa.

¹⁹Nae abahalaabani ba Yisaka nibayaba ehooho banyoolayo esulo yisooha amaachi,

²⁰abaayi ba Gerari basoolana neende abaayi ba Yisaka nibaboola bati, “Amaachi kano keefwe.” Mani Yisaka n'alaanga esulo eyo ati: “Busoolo”, olwohuba bayiinganira nae ao.

²¹Abahalaabani ba Yisaka haandi nibayaba esulo yiindi, haandi eyo yosi nibayisoolaaniraho; mani Yisaka n'ayilaanga ati: “Sitina” amahuluundu mbwe: “Obusuku.”

²²Yisaka haandi n'atula ao n'ayaba esulo yiindi, nae eyo haba sibayisolaaniraho mani n'ayilaanga ati, “Rehobbooti” n'aboola ati, “Olwohuba Omwaami bulaanu yaarubeerese obweyaango, njia ohwiingiya mu syaalo sino.”

²³Yisaka n'atula ao mani n'achia Bberisebba.

²⁴Omwaami yabonehera Yisaka esiro syeene esyo n'amuboleera ati, “Niise Nasaae wa Abburahamu laatao; mani otatya, olwohuba njia ohuba naawe, njia ohuhuberesa ehabi haandi njia ohwiingiya abeechuhulu bao hulwa omuhalaabani waange Abburahamu.”

²⁵Mani Yisaka niyoombaha ao alutaari, n'alaanga eliita ly'Omwaami, mani n'achomeha eyeema lyae ao. Mani abahalaabani ba Yisaka nibayaaba ao esulo.

²⁶Abbimeleki alala neende Ahusaati omukeraki wae neende Fikoli ohulira amaye kae batula Gerari baachia eyiri Yisaka.

²⁷Yisaka n'abateeba ati, “Lwasiina mwiicha yi ndi, mumanyire bulai bweene muti haba simundaha haandi mwaanjirusa ohutula mu syaalo syaange?”

²⁸Bakobolamo nibaboola bati, “Hubona bulai bweene huti Omwaami ali naawe; sakira huboola huti, leha abeo esichubo akatikaati wao neende efwe, leha huhole endagaano naawe yiti,

²⁹haba soochia ohutuholaho esyonoono syoosi, koti sa efwe haba sihuhudiirireho mani hwahuholaho esiindu syoosi ohutusaho ebilai byoong'ene, hwahuleha waawao neende omuleembe. Bulaanu Omwaami mbao ahubereese ehabi.”

³⁰Yisaka n'abaholera Esidyaalo, mani baang'wa haandi baalya.

³¹Nibwahya, basiingira echuli-chuli, baahola endagaano nibeechuba abeene-na-beene; mani Yisaka yaabaseebula bawao, nibakabuhana mu muleembe.

³²Hu ludaalo lweene olwo, abahalaabani ba Yisaka nibamuboolera ebidiira hu sulo chi bali nibayabire bati, “Hunyoolere amaachi.”

³³Mani n'ayilaanga ati “Sibba;” sakira esiko esyo silaangwa siti Bberisebba ohwoola buti.

³⁴Esau niyoosa emyaaka amahumi kane eky'obuhuluundu, n'adeehya abahasi Bahiiti babiri, Yudita omuhaana wa Bberi, neende Bbasimaati omuhaana wa Eloni.

³⁵Mani bomisira Yisaka neende Rebbeka obulamu.