Read saamia Ohuchaaka 28 Bible Online

Ohuchaaka 28 - saamia bible

Ohuchaaka 28

¹Yisaka yalaanga Yakobbo yaamuberesa ehabi, mani yaamulagira n'aboola ati, “Haba soochia ohuhwa omuhasi Mukanani.

²Siingira ochie Padanaraamu mu nyuumba ya Bbesweeri kuukao, wenyoolere mulala hu bahaana ba Labbani hoochao abe omuhasi wao.

³Leha Nasaae w'Obunyala bwoosi ahuberese ehabi haandi ahube olwiibulo wiingiye, mani weehole esyaalo.

⁴Leha Nasaae ahuberese, ewe neende abeechuhulu abali naawe ehabi ya Abburahamu. Ochia ohuyira esyaalo syolimo koti walukeendwa sibe esyao, esyaalo si Nasaae yaberesa Abburahamu.”

⁵Mani Yisaka yaseebula Yakobbo yawaao; Yakobbo yaachia Padanaramu eyiri Labbani, omwaana wa Bbesweeri Omuaramea, mboochoong'ene Rebbeka, ng'ina Yakobbo neende Esau.

⁶Esau niyamanya ati Yisaka yali abereese Yakobbo ehabi, yamutuma ohuchia Mesopotamia anyoole omuhasi. Haandi niyamanya ati, Yisaka yaberesa Yakobbo ehabi, yamulagira ati, “Otadeehyaangaho omuhasi Mukanani,”

⁷haandi Esau yamanya ati, Yakobbo yawulira emboosi cha laatang'ene neende ng'ina yaachia Padanaramu.

⁸Nae Esau niyabona ati, abahasi Bakanani haba sibasangaasa Yisaka laatang'ene,

⁹Esau yachia eyiri Yisimaeli yadeehya omuhasi wuundi ohumeeda hu bahasi ba yali nabo. Omuhasi wuno niye Mahalati omuhaana wa Yisimaeli omwaana wa Abburahamu, mboochoong'ene Nebbayooti.

¹⁰Yakobbo yatula Bberisebba yakeenda yaachia Harani.

¹¹Mani niyoola abuundu waandi, yakonaao esiro esyo olwohuba elyuuba lyali nilikwiire. Yabukula ekina lala elyali abuundu ao, yaalyeyikiha yaamala yeeyalisa ao yaakona endoolo.

¹²Mani naloota ati, yaliwo engaasi endeeyi muno niyemeeswe ohutula hu syaalo ohwoola Muukulu. Mani bone, bamalaika ba Nasaae bali nibaniina haandi nibeeheraho!

¹³Mani bone, Omwaami niyeema aakulu wayo yaboola ati, “Niise Omwaami Nasaae wa Abburahamu kuukao neende Nasaae wa laatao Yisaka. Njia ohuhuberesa eloba liweyaliiseho lino, libe elyao neende ely'abeechuhulu bao.

¹⁴Olwiibulo lwao luchia ohwiingiya lube koti olufu lwohu syaalo, haandi ochia ohusalaana mu syaalo woole emuumbo neende ebukwe, emukulu neende emwaalo; haandi abaandu bohu syaalo boosi bachia ohunyoola ehabi ohubitira mweewe neende mu beechuhulu bao.

¹⁵Bona, mbao ndi naawe haandi njia ohuhuliindaanga buli y'ochiira, haandi ohuhukobosa mu loba lino. Olwohuba haba siinjia ohuhuleha ohwoola lu ndirihola ebiindu bihuboolere bino.”

¹⁶Yakobbo yasimuha mu ndoolo mani n'aboola ati, “Mubwadyeeri bweene, Omwaami ali abuundu ano, nae haba simbeere niisimanyire daawe.”

¹⁷Mani yatya muno yaboola ati, “Abuundu ano atiisa muno! Mubwadyeeri bweene, yino niyo sa enyuumba ya Nasaae yeene, haandi ano niwo omulyaangiro kweene okw'Ekulu.”

¹⁸Nibwahya echuli-chuli muno, Yakobbo yasiingira yaabukula ekina li yali niyeyikiihe elyo, yalyoombaha lyaaba esiiro mani yaalichuhaho amafuta k'emiseituuni ohuliyaana eyiri Nasaae.

¹⁹Yalaanga abuundu ano ati, “Beteli;” nae hale, eliita ly'esiko esyo lyali nililaangwa, “Lusi.”

²⁰Yakobbo yahola esichubo eyiri Omwaami n'aboola ati, “Nasaae naachia ohuba naange, mani yaniinda hu lukeendo lwaange luno, niyaamberesa ebyohulya neende eby'ohwefwaala,

²¹haandi ndaakobola neende omuleembe mu nyuumba ya laata yange yino, Omwaami niye ochia ohubechaanga Nasaae waange.

²²Mani ekina lino, liinyombaahemo esiiro, lichia ohuba Enyuumba ya Nasaae yeene; haandi buli siindu syoosi syoochia ohuumberesa, njia ohuhuberesa silala sy'ehumi.”