Read saamia Ohuchaaka 29 Bible Online

Ohuchaaka 29 - saamia bible

Ohuchaaka 29

¹Yakobbo yemeeda neende olukeendo lwae, yoola mu syaalo sy'abaandu b'ebukwe.

²Niyatingaala, yabona esulo mu siino, neende amayiicho kadatu k'amakoondi kali nikeyaliise aambi neende esulo eyo. Ebyaayo byang'wechaanga mu mwaalo okwo. Esulo eyo yali niyabwiihwaho okukina kuhoongo muno.

³Ebyaayo nibyamalaanga ohwebusira ao, abaayi bahwesaanga okukina nibakutusa hu sulo, mani nibadayira amakoondi amaachi ohung'wa; nikamala ohung'wa bafuuniha haandi okukina okwo hu mwaalo.

⁴Yakobbo yateeba abaayi ati, “Basyaange, mutula yeena?” Bakobolamo bati, “Hutula Harani.”

⁵Haandi yabateeba ati, “Mumanyire Labbani omwaana wa Nahori?” Bakobolamo bati, “Humumanyire.”

⁶Yakobbo haandi yabateeba ati, “Mani aliyo omulamu?” Bamuboolera bati, “Aliyo omulamu; haandi bona, omuhaana wae Rakeeli ali ohwiicha neende amakoondi kae!”

⁷Yakobbo yaboola ati, “Bona, sisisiiri esideete, haandi ebiha by'ohubuusiramo alala ebisolo bisisiiri ohwoola; lwasiina song'weesa amakoondi, hu waachia wakaaya?”

⁸Nabo baboola bati, “Haba sihunyala ohubing'weesa ohwoola lu bisolo byoosi byebuusa alala, mani okukina kwahweeswa ohutula hu sulo; hu hwamala hwang'wesa amakoondi.”

⁹Yakobbo yali nasiilomalomaanga atyo, Rakeeli niyoola neende amakoondi ka laatang'ene, olwohuba niye owali nakaaya.

¹⁰Nae Yakobbo niyabona Rakeeli omwaana wa Labbani hoochaang'ene, neende amakoondi kae, Yakobbo yeeruha yaachia yahweesa okukina ohukutusa hu sulo, mani yang'weesa ebyaayo bya Labbani hoochaang'ene.

¹¹Yakobbo yakwa Rakeeli mu sirifu, mani yaalirira mu kono lya aakulu.

¹²Yakobbo yaboolera Rakeeli ati, “Ndi omwiibulanwa wa laatao, omwaana wa Rebbeka.” Rakeeli niyeeruha naachia n'aboolera laatang'ene atyo.

¹³Nae Labbani niyawulira emboosi chidiira hu Yakobbo omwiiwa wae, yeeruha yaachia ohumubukaanira, mani yaamukwa mu sirifu, yaamuyira engo wae. Yakobbo niyamala ohuboolera Labbani ebiindu byoosi,

¹⁴Labbani yamuboolera ati, “Mubwadyeeri bweene, oli ow'amabaanga kaange keene neende omubiri kwaange kweene.” Yakobbo yamala atyo mani yaamenya ewa Labbani ohumala omwoosi mulala omulaamba.

¹⁵Labbani yaboolera Yakobbo ati, “Olwohuba oli omwibulanwa waange, soohoyerwa ohuuhalaabanira bihaya. Mboolere omusaara koti lu kwaaka?”

¹⁶Bulaanu Labbani yali neende abahaana babiri; omuhuluundu olaangwa Leya, nae omuyere olaangwa Rakeeli.

¹⁷Emoni cha Leya chali engata kata, nae Rakeeli yali obonehana bulai muno.

¹⁸Yakobbo yali naadaha Rakeeli mani yaboolera Labbani ati, “Njia ohuhuhalaabanira embaka y'emyaaka kitaanu-na-kibiri, nookanya, huunyale ohudeehya Rakeeli.”

¹⁹Labbani yamukobolamo ati, “Silai ohuhuberesa Rakeeli ohuhira ohumuberesa omusaacha wuundi; mani doong'a naange.”

²⁰Yakobbo yahalaabanira Labbani naadaha Rakeeli hulw'embaka y'emyaaka kitaanu-na-kibiri, nae kyabonehana koti endaalo ndiidi sa olwohuba yali niyaheera Rakeeli muno.

²¹Yakobbo yeemao yaboolera Labbani ati, “Mberese omuhasi waange, mbao endaalo chaange ch'ohuhuhalaabanira chiweere.”

²²Labbani mani yabuusa alala abaandu b'esituundu esyo mani yaahola esidyaalo.

²³Nae esiro esyo, mu siha sya Rakeeli, Labbani yabukula Leya omwaana wae muhuluundu mani yamuberesa Yakobbo, yaaba nae

²⁴(Labbani yabukula Silipa, omuhalaabani wae muhasi mani yaamuberesa Leya abe omuwaambe wae.)

²⁵Nae bone, nibwahya, Yakobbo yabona ati Leya niye, mani yateeba Labbani ati, “Wuuholere siina syeene sino? Ese haba sindahuhalaabanira endi wuumberese Rakeeli, kose? Lwasiina wuumbachire?”

²⁶Labbani yamukaluhamo ati, “Mu syaalo syeefwe, sy'omusiro nisyo ohudeehisania omwaana muyere, omuhuluundu n'asisiiri ohudeeha.

²⁷Mala ejuma ndala neende wuno, mani njia ohuhuberesa owuundi wula yesi noomalire ohuhuhalaabanira emyaaka kitaanu-na-kibiri kiindi.”

²⁸Yakobbo yafukiirira, mani yaamala neende Leya ejuma enaamba. Labbani yamuberesa omwaana wae Rakeeli abe omuhasi wae.

²⁹(Labbani mani yabukula Bbiliha omuwaambe wae muhasi yaamuberesa Rakeeli abe omuhalaabani wae.)

³⁰Yakobbo yaba neende Rakeeli yesi, naadaha Rakeeli muno ohuhira Leya. Ao mani yaahalaabanira Labbani emyaaka kiindi kitaanu-na-kibiri.

³¹Nae Omwaami niyabona ati Leya haba sibamudaha koti Rakeeli, yamuba olwiibulo, nae Rakeeli yaaba omukuumba.

³²Leya yanyoola amabaanga mani yeebula omwaana musyaani. Yaboola ati, “Omwaami abweene ebidinyu byaange, mani omusaacha waange achia ohuuheera.” Mani yaamukuliha ati, “Rubbeeni.”

³³Leya haandi yanyoola amabaanga mani yeebula omwaana musyaani. Yaboola ati, “Hane Omwaami yawulira ati haba sibaandaha, mani haandi yaamberesa omwaana wuno yesi;” mani yaamukuliha, Simeoni.

³⁴Leya haandi yanyoola amabaanga kaandi mani yeebula omwaana wuundi. Yaboola ati, “Bulaanu ehabi lino omusaacha waange achia ohuungumiraho, olwohuba mwiibuliire abaana basyaani badatu;” sakira yamulaanga, “Leefi.”

³⁵Leya yanyoola amabaanga mani yeebula omwaana wuundi. Yaboola ati, “Njia ohufumia Omwaami;” mani yaamukuliha, Yuda; mani yaamala yaakama ohwiibula.