Read saamia Ohuchaaka 3 Bible Online

Ohuchaaka 3 - saamia bible

Ohuchaaka 3

¹ Bulaanu, enjuha niyo eyali esisolo syali esikesi-kesi muno ohuhiraho ebiloonge biteende byoosi bi Omwaami Nasaae yali naloongere. Enjuha yateeba omuhasi yiti, “Mbwe Nasaae yaboola ati, ‘Mutalichaangaho hu musaala kwosi-kwoosi okuli mu ndalo yino?’”

²Nae omuhasi yaboolera enjuha ati, “Hunyala ohulya hu byaamo by'emisaala ekiri mu ndalo yino;

³nae Nasaae yaboola ati, ‘Mutalichaangaho hu syaamo sy'omusaala okuli akatikaati w'endalo yino, kata ohukudiiraho sa, olwohuba muba munafwa.’”

⁴Nae enjuha yakobolamo niyiboolera omuhasi yiti, “Haba simuchia hufwa daawe.

⁵Olwohuba Nasaae yamanya ati nimulyaaho hu musaala okwo, emoni cheeng'we chichia ohwaamuha mani mube koti Nasaae, nimumanyire esilai syoosi neende esibi syoosi.”

⁶Nae omuhasi niyabona ati omusaala okwo kwali omulai kw'ohulya haandi ati kwali nikusangaasa emoni, haandi ati omusaala okwo kwali nikwekoombwa hulw'ohukesiyasa omuundu, omuhasi oyo yanokaho esyaamo syakwo mani yaasilya; haandi yaaberesaho omusaacha wae yesi yaalya.

⁷Mani boombi nibamala ohulya esyaamo esyo sa bati, emoni chaabwe chaamuha mani nibamanya bati bali syeekenye; mani nibaluha amasaafu k'omutuli nibakefwaala.

⁸Beemao baawulira embiindo ch'Omwaami Nasaae n'akeenda mu ndalo engoloobe, mani nibatya nibeekisa mu misaala kyali mu ndalo omwo.

⁹Nae Omwaami Nasaae yalaanga omusaacha yaamuteeba ati, “Oli yeena”?

¹⁰Nae omusaacha yakobolamo ati, “Mbuliire eswaasu chao ni ndi mu ndalo mani ndaatya, ndeekisa olwohuba mbeere ndi syeekenye.”

¹¹Nae Nasaae yamuteeba ati, “Wiina mweene ohuboolere ati obeere nooli syeekenye? Oliireho hu musaala kundahulagira obutakulichaangaho kose?”

¹²Nae omusaacha yakobolamo ati, “Omuhasi yi wamberesa ohumenyaanga nae niye owumbereese esyaamo sy'omusaala okwo mani syeesi ndaalya.”

¹³ Omwaami Nasaae yateeba omuhasi ati “Siina syeene sino sy'oholere?” Nae omuhasi yakobolamo ati, “Enjuha niyo eyimbachiriise ndaalya.”

¹⁴Omwaami Nasaae yaboolera enjuha ati, “Olwohuba oholere sino, obwaabirwe ohuhiraho ebyaayo byoosi, haandi ohuhiraho ebisolo biteende byoosi; ochia ohwehurudisiryaanga enda yao, haandi ochia ohulichaanga olufu endaalo ch'obulamu bwao choosi.

¹⁵ Njia ohutaao obusuku akatikaati wao neende omuhasi, haandi akatikaati w'olwiibulo lwao neende olwae; achia ohuhusaasakulaanga omutwe, naawe ewe ochia ohumuboochaanga esisisiro.”

¹⁶Haandi Nasaae yaboolera omuhasi ati, “Njia ohwiingiya obuchuuni bw'engasi chao ch'ohwiibula; ochia ohwiibuliraanga abaana mubuchuuni, haandi obwekoombi bwao buchia ohubechaanga hu musaacha wao, haandi achia ohuhutukaanga.”

¹⁷ Mani Nasaae yaboolera Adamu ati, “Koti lu otekereese emboosi ch'omuhasi wao, noolya hu syaamo sy'omusaala kundahulagira endi, ‘Otakulichaangaho,’ eloba libwaabirwe hulwao; ochia ohudiidihanaanga hu onyoole esyohulya mu bulamu bwao bwoosi.

¹⁸Eloba lichia ohumeraangaho oluyoongo neende amawa; haandi ochia ohulichaanga ebyaamo byomu siino.

¹⁹Ohutulana hu luuya lwao, nilwo lu ochia ohunyoolaanga byoolya ohwoola lw'olikobola mu loba, olwohuba nimwo muwatuswa. Oli olufu, haandi mu lufu nimwo mu olikobola.”

²⁰Omusaacha yakuliha omuhasi wae ati Efa, olwohuba niye ng'ina baandu boosi.

²¹Omwaami Nasaae haandi yaholera Adamu neende omuhasi wae ebyefwaalo by'amaseero mani n'abafwaasa. Adamu neende Efa beeruswa mu ndalo.

²² Omwaami Nasaae yaboola ati, “Bone, omuundu nguyo yeeholere ali koti eefwe, amanyire esilai neende esibi. Mani humukayire atabukula esyaamo syohu musaala kwobulamu kwosi yakulyaho, ahaye ohuyiindira emyaaka kyoosi.”

²³Sakira Omwaami Nasaae yamwiirusa ohutula mu ndalo y'Edeni, achie alimeenge eloba liyatuswamo.

²⁴Nasaae niyeerusamo omuundu, yata abakerubbi ebukwe w'endalo y'Edeni, neende olugaanga lw'omuliro lwebodoohania enyaande choosi. Sino syali esy'ohwiikalira omuundu yeesi ahaye ohunyala ohusuda aambi neende omusaala kwobulamu.