Read saamia Ohuchaaka 31 Bible Online

Ohuchaaka 31 - saamia bible

Ohuchaaka 31

¹Bulaanu Yakobbo yawulira ati abaana ba Labbani bali nibaboola bati, “Yakobbo ayirire emyaandu kya laata yeefwe kyoosi; emyaandu kyoosi kyali ekya laata yeefwe.”

²Yakobbo yabona ati Labbani haba siyali naamusangaalira koti hale.

³Omwaami mani yaboolera Yakobbo ati, “Kaluha mu syaalo sya bakuukaao, eyiri abeeho bao, mani njia ohuba naawe.”

⁴Yakobbo yatuma balaanga Rakeeli neende Leya bachie babukaananire nae yi yali niyaayira ebyaayo byae.

⁵Mani Yakobbo yababoolera ati, “Ndi ohubona endi laata yeeng'we haba sasiindaha koti lu yali niyaandaha hale. Nae Nasaae wa Laata yaange ali naange,

⁶Mumanyire muti halaabaniire laata yeeng'we neende amaani kaange koosi;

⁷nae laata yeeng'we haba siyambereeseho omusaara kwaange kwoosi daawe, nae naakaluuhania omusaara kwaange okwo amahabi ehumi, nae Nasaae haba siyamufukiirira ohunyayaala.

⁸Yaboola ati, ‘Ebisolo byamabbondo nibyo omusaara kwao,’ mani ebyaayo byoosi byali ebyamabboondo; haandi yaboola ati, ‘Eby'emihweso-hweeso nibyo omusaara kwao,’ mani nae ebisolo byoosi byeebula abaana balimo emihweso-hweeso.

⁹Mani sakira Nasaae atusire hu laatao eng'oombe cha laatao yaachiimberesa.

¹⁰Mubwiire bu bisolo biiruhiramo, ndanyoola esilooto mani ndaabona endi ehole choosi echawoocha ebyaayo chali ech'amabboondo-bboondo, ech'emihweeso-hweeso haandi echimilamilana.

¹¹Malaika wa Nasaae yanaanga mu silooto ati, ‘Yakobbo,’ mani ndaakobolamo endi, ‘Nduwo!’

¹²Yamboolera ati, ‘Tingaala obone, ehole choosi echawoocha ebyaayo chali ech'amabboondo-bboondo, ech'emihweeso-hweeso neende echimilamilana; olwohuba mbwene koti lu Labbani ali ohuhuyira.

¹³Niise Nasaae wa Bbeteli, yi waawulira ekina koti esiichuliso noolichuhaho amafuta k'omuseituuni, haandi wandeechubira. Siingira, otule mu syaalo sino, mani okobole mu syaalo si webulirwamo.’ ”

¹⁴Rakeeli neende Leya bakobola mu Yakobbo nibaboola bati, “Kuluwo omukabo kwoosi oba obusiha bwoosi obutudoong'eere mu nyuumba ya laata yeefwe?

¹⁵Bulaanu laata yeefwe atuyira koti abateende. Yatukusa, mani yehoonyera eseende choosi chi batukula.

¹⁶Omwaandu kuno kwoosi ku Nasaae atusire hu laata yeefwe kweefwe nikwo alala neende abaana beefwe; mani bulaanu hola sa buli siindu si Nasaae ahuboolere ohuhola.”

¹⁷Mani Yakobbo n'asiingira, naata abaana bae neende abahasi bae hu ngamia;

¹⁸naayira eng'oombe chae choosi, neende ebyaayo byoosi bi yali n'anyoolere, eng'oombe choosi chi yali n'anyoolere mu syaalo sya Padanaramu, achie mu syaalo sya Kanani, eyiri Yisaka laatang'ene.

¹⁹Labbani yali n'achiire ohubeka hu makoondi obwooya, mani niyali n'asisiiri ebweene eyo, Rakeeli yeeba banasaae bohu lwaanyi lwa laatang'ene.

²⁰Yakobbo yahira Labbani Omuramea amakesi, olwohuba haba siyamuboolera ati achia ohweeyiba.

²¹Yakobbo yeeyiba neende ebiindu bi yali nabyo byoosi, niyaambuha omwaalo kwa Ewufuraate, n'akeenda n'achiira mu syaalo sya Gileadi.

²²Endaalo chidatu nichabitao, baboolera Labbani bati, Yakobbo yeeyibao hale,

²³Labbani yaabukula abanaluyia bae, baloonda hu Yakobbo ohumala embaka y'endaalo chitaanu-na-chibiri mani yamuloondaho yaamwooleraho mu syaalo sy'engulu sya Gileadi.

²⁴Nae esiro Nasaae yeecha eyiri Labbani Omurameya mu silooto, mani yaamuboolera ati, “Wehaliirise otabooleraho Yakobbo emboosi yoosi, endai kose embi.”

²⁵Labbani yoola hu Yakobbo. Bulaanu Yakobbo yali niyoombaahe eyeema lyae mu syaalo sy'engulu, nae Labbani neende abanaluyia bae bali nibali mu syaalo sy'engulu sya Gileadi.

²⁶Labbani yaboolera Yakobbo ati, “Oholere siina sino, ohuunjiba, haandi wakiinga abaana baange bahaana koti ababoye babapeyeere olugaanga?

²⁷Haandi lwasiina wundeyibireho mu bweekisi mani waahaya ohumbooleraho esiindu syoosi, ndahaya ohuhuseebula neende esangaalo neende enyembo, embayire neende aduungu?

²⁸Haandi lwasiina haba si waafukiirira ohukwa mu birifu by'abaana baange basyaani neende abahaana mani ndabaseebula? Mbao oholere esiindu sibulamo amakesi.

²⁹Ndi neende obunyala obwohuhunyaala nae Nasaae wa laatao yaandabuule mu silooto esiro sihyeesa enyaanga yino n'aboola ati, ‘Wehaliirise otabooleraho Yakobbo esiindu silai syoosi kata sa esibi syoosi.’

³⁰Bulaanu mbao wiruuhe olwohuba wekoomba muno enyuumba ya laatao, nae lwasiina weeba banasaae bomu lwaanyi lwaange?”

³¹Yakobbo nae yakobola mu Labbani ati, “Olwohuba ndali nitiire, ndabaasa endi ochia ohunyuula neende amaani abaana bao bahaana.

³²Oyo yeesi y'onanyoole neende banasaae bao achia ohufwa-bufwa, Mu moni wa banaluyia beefwe, boolaho esiindu syao si ndi ninasyo, mani osibukule.” Yakobbo haba siyali n'amanyire ati Rakeeli yali niyeebere banasaae bomu lwaanyi.

³³Labbani niyeengira mu yeema lya Yakobbo, neende mu yeema lya Leya, neende mu mayeema k'abawaambe bahasi babiri, nae haba siyanyoolamu banasaae bomu lwaanyi daawe. Mani niyatula mu yeema lya Leya, yeengira mu lya Rakeeli.

³⁴Bulaanu Rakeeli yali naabukuule banasaae bomu lwaanyi mani naabateere mu sibiihiro syohu sisaala sy'engamia, mani yaamala yeehalaho. Labbani yakoonya mu yeema mwoosi mani yaahaya ohunyolaho esiindu syoosi.

³⁵Mani Rakeeli yaboolera laatang'ene ati, “Leha omwaami waange atanyoolera naange, olwohuba siinyalire ohusiingira ndeema mu moni wao, ndi mu ndaalo ch'efwe abahasi.” Labbani yakoonya mani yaahaya ohunyoola banasaae bae bomu lwaanyi abo.

³⁶Mani etima liingi lyadiira Yakobbo, yoolobya Labbani ati, “Hukoseere siina syeene? Holere sibi siina esikera niwunoondaho otyo?

³⁷Omalire ohukoonya mu biindu byaange byoosi, siindu syao siina sy'onyoolere mu biindu byaange? Syeekeseho abeebulanwa bao neende abeebulanwa baange batuheengere omusaango.

³⁸Emyaaka amahumi kabiri kimbeere naawe kino, amakoondi kao madwaasi neende embusi chao ndwaasi haba sibituluchangaho, haandi ese haba siimbukulangaho ekoondi emiiku ly'omubyaayo byao daawe.

³⁹Ebyaayo bi solo ndeende chitaanga, haba sihuleeteraanga; ese omweene hutungaanga, oba chikotaho esideete kata sa esiro.

⁴⁰Olwo nilwo lundabechaanga; omubasu kw'esideete kwoosi kwambweraangaho, neende embowo y'esiro yoosi, mani endoolo chaambwa mu moni.

⁴¹Emyaaka amahumi kabiri kino kimbeere mu daala lyao; emyaaka ehumi neende kine ndahuhalaabanira hulw'abahaana bao, nae emyaaka kisaasaba ndahuhalaabanira hulw'ebisolo byao, mani wakaluuhania omusaara kwaange amahabi ehumi.

⁴²Nae Nasaae wa laata yaange, Nasaae wa Abburahamu neende owa Yisaka aaba n'ataali naange, mubwadyeeri bweene, wahanjiruuse amahono mahaya ataaliho esiindu syosi-syoosi. Nasaae yabona ohusaanda hwaange neende ohudidiihana hw'amahono kaange, mani yahwoolobya esiro sy'ekulo.”

⁴³Labbani yakobola mu Yakobbo ati, “Abahaana bano baana baange nibo; abaana baabwe baange, haandi ebyaayo bino byaange nibyo. Mubwadyeeri bweene, buli siindu sy'obona ano syaange nisyo. Nae koti lu tali neende esiindu syoosi esy'ohubaliinda alala neende abaana baabwe,

⁴⁴Yiicha bulaanu, leha huhole endagaano, ewe naange; mani leha endagaano yino yibe obuloli akatikaati wao naange.”

⁴⁵Mani Yakobbo yabukula ekina yoombahamo omusiiro.

⁴⁶Yakobbo yaboolera abeebulanwa bae ati, “Mubuuse amakina alala,” mani baabukula amakina kaaba esifuruusi.

⁴⁷Labbani yasilaanga ati, “Yegarisahaduta”, nae Yakobbo yasilaanga ati, “Galeedi.”

⁴⁸Labbani bulaanu yaboola ati, “Esifuruusi sino nisyo obuloli akatikaati wao naange enyaanga yino.” Sakira yasilaanga ati, Galeedi,

⁴⁹nae omusiiro yakulaanga ati, Misipa, olwohuba yaboola ati, “Omwaami atuhengeereo omusaango akatikaati wao naange, nihuba nihutakaananaangaho.

⁵⁰Nooyira abaana baange bubi, oba waleeta abahasi baandi ohutusaho abaana baange, oba omuundu asimanya kose haba, Nasaae mweene niye omuloli akatikaati waange naawe.”

⁵¹Mani Labbani n'aboolera Yakobbo ati, “Obona esifuruusi sy'amakina sino neende omusiiro kuno, sinyoombahe akatikaati wao neende ese.

⁵²Esifuruusi sino nisyo omuloli, haandi omusiiro kuno nikwo omuloli, mbwe haba siinjia ohuhalakania esifuruusi sy'amakina sino, haandi weesi haba soochia ohuhalakania esifuruusi sino daawe kata neende omusiiro kuno, ohuseeta ese.

⁵³Leha Nasaae wa Abburahamu neende Nasaae wa Nahori, Nasaae wa laata yaabwe, atuheengereo omusaango.” Mani Yakobbo niyeechubira Nasaae wa Yisaka laatang'ene.

⁵⁴Yakobbo yayaana esiyaanwa hu lugulu mani yaalaanga abaandu bae ohulya omugaati; baalya omugaati, mani nibamala esiro syoosi hu lugulu.

⁵⁵Echuli mu mabwiibwi, Labbani yasiingira yaachia yaakwa abeechuhulu neende abahaana bae mu birifu yaababeresa ehabi; mani yaakaluha engo wae.