Read saamia Ohuchaaka 32 Bible Online

Ohuchaaka 32 - saamia bible

Ohuchaaka 32

¹Yakobbo niyemeeda neende olukeendo lwae, bamalaika ba Nasaae babukaanana nae.

²Nae Yakobbo niyababona yaboola ati, “Yino kaambi ya Nasaae kose!” Mani n'alaanga abuundu ao ati, “Mahanaimu.”

³Yakobbo yatuma bawamwaanda bamutaangiriremo ohuchia eyiri Esau mwaanang'ina mu syaalo sya Seyiri, esiri mu Edomu.

⁴Yabalagira ati, “Munaboolera omwaami waange Esau muti: Yakobbo omuhalaabani wao aboola ati mbereenge neende Labbani, mani menyereenge sa nae ohwoola buti.

⁵Bulaanu ndi neende endaawu, esuhiri, ebyaayo, abawaambe basaacha neende abahalaabani bahasi; baatumire bahuboolere omwaami waange, onyale ohungwiira esisa.”

⁶Bawamwaanda bakobola eyiri Yakobbo, mani baboola bati, “Hwoolere eyiri Esau mwaanamao, ali ohwiicha ohuhubukaanira, ali neende abasaacha emia chine.”

⁷Yakobbo yatya haandi yeelalihirira muno. Mani n'akabulamo abaandu abali nae, ebyaayo neende amakoondi alala neende engamia bi yali nabyo amahabi kabiri.

⁸Mani n'aboola ati, “Niwiichuhana Esau yaseeta omukaanda mulala mani yaakuyiingira, omukaanda kuundi okudoong'ere kuba kuchia ohweyiiba.”

⁹Yakobbo yaboola ati, “Ewe Nasaae wa Abburahamu kuuka yaange, haandi Nasaae wa Yisaka laata yaange, mbulire. Omwaami, niiwe owamboolera ohukobola mu syaalo syaange haandi eyiri abanaluyia baange, mani buli siindu sichia ohunjiira bulai sa.

¹⁰Haba ese sihoyera kata nabudiidi obuheeri bubitiirifu neende obweesikwa bu wunjekeese, ese omuhalaabani wao. Ndaambuha omwaalo kwa Yorodaani ni ndi neende omukwajo kwoong'ene; nae bulaanu ndeeholere emikaanda kibiri.

¹¹Hwekweeda, wuumonie, wuunduse mu mahono ka mwaanama Esau, olwohuba mutya, anyala ohwiicha yatwiita fweesi yaatumala, kata yeeta neende abahasi bali aasito.

¹²Nae niiwe owaboola oti, ‘Buli siindu sichia ohuhuchiira sa bulai, haandi njia ohwiingiya abeechuhulu bao babe koti omusenye kwohu nyaanja, bahaywe ohubaliha hulw'obuungi.’ ”

¹³Yakobbo yeyalisa ao esiro esyo, mani yaabukula hu biindu bi yali nabyo, yayirira Esau mwaanang'ina koti esiyaanwa sa,

¹⁴embusi dwaasi emia chibiri (200), neende ehole amahumi kabiri, amakoondi madwasi emia chibiri (200) neende amakoondi mamiiku amahumi kabiri.

¹⁵Engamia chihamwa amahumi kadatu neende abaana bachio, eng'oombe amahumi kane neende esurusi ehumi, esuhiri ehasi amahumi kabiri neende esuhiri esaacha ehumi.

¹⁶Ebiindu bino byoosi byadiiswa abahalaabani bae, buli yiicho lyali hulwalyo, mani Yakobbo naaboolera abahalaabani bae ati, “Eng'we muundangiriremo, muleheo ebbaanga akatikaati wa buli yiicho.”

¹⁷Yakobbo yalagira omweemeresi n'amuboolera ati, “Niwiichuhana waabukaanana neende Esau mwaanama, mani yaahuteeba ati, ‘Oli omuhalaabani wa wiina? Oli ohuchia yeena? Haandi ebyaayo bino bya wiina?’

¹⁸Muboolera oti, ‘Ebyaayo ebyo bya Yakobbo omuhalaabani wao, nibyo ebiyaanwa bi abereese omwaami wae Esau; Yakobbo mweene ali ohutuloondaho enyuma.’ ”

¹⁹Yalagira owohubiri engeri nasilala yityo, neende owohudaatu neende abaloondaho boosi ati, “Boolere Esau esiindu nasilala nimubukaanana nae,

²⁰haandi mumuboolere muti, ‘Yakobbo mweene ali ohutuloondaho enyuma.’ ”

²¹Mani ebiyaanwa nibitaangiriramo Yakobbo; nae esiro esyo, naakona mu kaambi.

²²Esiro syeene esyo, Yakobbo yasiingira, yaabukula abahasi bae babiri, neende abahalaabani bae babiri, neende abaana ehumi neende mulala, mani baambuha omwaalo kwa Yabboki.

²³Yababukula mani yabaambusa omwaalo, alala neende buli siindu si yali nasyo.

²⁴Yakobbo yadoong'a sa yeeng'ene; mani omusaacha wuundi yeecha yalwaanakana nae ohwoola obwiire nibwali aambi ohuhya.

²⁵Nae omusaacha oyo niyabona ati haba saachia ohuyingiira Yakobbo, yakuuda Yakobbo hu baachwa; ebaachwa lya Yakobbo mani nilimenuha mu nyiingo koti omusaacha oyo yalwaana nae.

²⁶Omusaacha oyo yaboolera Yakobbo ati, “Leha mbweo, olwohuba obwiire mbao buhya.” Nae Yakobbo yamuboolera ati, “Haba siinjia huhuleha obweeo sa otyo, ohutusaho nga wuumbeerese ehabi.”

²⁷Omusaacha oyo mani yamuteeba ati, “Eliita lyao nilyo wiina?” Yakobbo nae yaakobbolamo ati, “Yakobbo.”

²⁸Omusaacha oyo yamuboolera ati, “Eliita lyao haba silichia ohulaangaangwa Yakobbo, nae lichia ohulaangaangwa, Yisiraeli, olwohuba olwaaniise Nasaae neende abaandu basyo mani waabayiingira.”

²⁹Mani Yakobbo yateeba omusaacha oyo ati, “Husaba, mboolere, eliita lyao.” Nae yamuteeba ati, “Lwasiina wundeeba eliita lyaange?” Mani n'aberesera Yakobbo ehabi naali abuundu ao.

³⁰Yakobbo yalaanga abuundu ao ati, “Penweeli,” n'aboola ati, “Olwohuba mbweene Nasaae emoni-hu-moni, nae ndadoong'a ni ndi omulamu.”

³¹Elyuuba lyatula Yakobbo naali ohuhalania Penweeli, yali nasyeegera olwohuba ebaachwa lyae lyali nilibatuuhe.

³²Sakira ohwoola buti, Abaisiraeli haba sibalichaanga enyama yohuu baachwa, eyiri aambi neende etaango, olwohuba Nasaae yakuuda hu baachwa lya Yakobbo aambi neende etaango.