Read saamia Ohuchaaka 33 Bible Online

Ohuchaaka 33 - saamia bible

Ohuchaaka 33

¹Yakobbo yabona Esau neende abasaacha emia chine (400), mani Yakobbo yaakabulamu abaana akatikaati wa Leya, Rakeeli neende abahalaabani bahasi boombi.

²Mani nataangisamo abahalaabani abo neende abaana baabwe, naamala n'aloondyaho Leya neende abaana bae, naseembyao Rakeeli neende Yosefu.

³Yakobbo mweene naabataangiriramo, yeenama mani yageeng'a omutwe hu loba amahabi kataanu-na-kabiri, ohwoola lu yasuda aambi neende mwaanang'ina.

⁴Esau yeeruha yaachia ohumubukaanira, yaamukwa mu sirifu, mani nibachaaka ohulira.

⁵Nae Esau niyasiingisa emoni, yaabona abahasi neende abaana, yaboola ati, “Abaandu booli nabo nibo wiina?” Yakobbo yakobolamo ati, “Abo nibo abaana ba Nasaae mu sisa syae yaberesa omuhalaabani wao wuno.”

⁶Abahalaabani neende abaana baabwe basuda aambi mani beenama aasi;

⁷Leya yesi neende abaana bae mu ngeri nasilala bosi basuda aambi mani nibeenama aasi. Muhumaliiriha, Yosefu neende Rakeeli bosi basuda aambi mani beenama aasi.

⁸Esau yateeba ati, “Emikaanda ky'abaandu kimbukaanana nakio, kyeekesa siina?” Yakobbo yakobolamo ati, “Ky'ohudaha ohwakaanirwa mu moni wao ewe omwaami waange.”

⁹Nae Esau yaboola ati, “Mwaanama, ebiindu bi ndi nabyo biimala sa syeeng'ene, mani leha by'oli nabyo bibe ebyao weesi weeng'ene.”

¹⁰Nae Yakobbo yaboola ati, “Haba daawe, hwekweeda endi, niimba niinjakaanirwa mu moni wao, fukiirira esiyaanwa sino ohutula mu mahono kaange, olwohuba, mubwadyeeri bweene, ohuhubonaho endi, ndi koti obweene Nasaae mweene, olwohuba wuunjakaanire neende esisa siingi muno.

¹¹Hwekweeda endi, mala akafukiirira esirabo syaange si huleteere, olwohuba Nasaae yangwiriire esisa siingi muno, haandi olwohuba ndi neende ebiindu biimala.” Yakobbo yamwekweeda muno mani Esau yaafukiirira.

¹²Esau yaboola ati, “Leha hwaanje olukeendo lweefwe, ese njia ohuhweemereramo.”

¹³Nae Yakobbo yaboola ati, “Omwaami waange, omanyire oti, abaana baange bajoong'u nibo, haandi ebyaayo byaange neende eng'oombe chaange, binuunia. Mani nihunabyalaasa ohubyuubba mu ludaalo lulala, byoosi binyala ohufwa.

¹⁴Leha omwaami waange ataangiriremo omuhalaabani wae, ese njia ohuloondaho kaala, ngeende koti luunyala ebyaayo byaange nibyeemereremo alala neende abaana baange, ohwoola lu ndoole hu mwaami waange mu Seyiri.”

¹⁵Esau mani yaboola ati, “Leha hulehereho abasaacha baandi hu baandu bali naange,” Nae Yakobbo yaboola ati, “Esyo haba sisihoyerwa. Leha nyoole ohwakaanirwa mu moni wao ewe omwaami waange.”

¹⁶Mani hu ludaalo olwo, Esau yakobola Seyiri.

¹⁷Nae Yakobbo yachia Sukooti, mani yeeyoombahira enyuumba. Yaaholera ebyaayo byae ehoonge; sakira abuundu ao alaangwa ati, “Sukooti.”

¹⁸Yakobbo niyali n'akeenda naachia Pedanaraamu, n'asisiiri ohwoola mu siko, yoola bulai mu siko sya Sekemu, esiri mu syaalo sya Kanani, mani yeeyikama abweene ao.

¹⁹Yakobbo yabukula ebituundu by'efeesa emia ndala (100), mani yaakula eloba hu baana ba Hamori, laatang'ene Sekemu. Huu loba elyo nihwo hu yoombahaho eyeema lyae.

²⁰Mani Yakobbo yoombaha ao alutaari, yaayilaanga ati, “Eli-Elohe-Yisiraeli,” amahuluundu mbwe, Eli, Nasaae wa Yisiraeli.