Read saamia Ohuchaaka 34 Bible Online

Ohuchaaka 34 - saamia bible

Ohuchaaka 34

¹Ao mani Dina omwaana wa Yakobbo, yi yeebula mu Leya, naachia ohukeniya abahasi bomu syaalo esyo.

²Nae Sekemu, omwaana wa Hamori Omuhiiti, owali omuhuluundu w'esyaalo esyo niyamubona, yamukwaho yaaba nae olw'amaani koti omusaacha neende omuhasi.

³Mani omwooyo kwa Sekemu nikwekoomba Dina omuhaana wa Yakobbo; mani naadaha Dina muno, naalomaloma nae bulai muno.

⁴Sekemu yalomaloma neende Hamori laatang'ene mani yaboola ati, “Ewe hweere sa omuhaana wuno abe omuhasi waange.”

⁵Bulaanu, Yakobbo yamanya ati bakwiire hu Dina omwaana wae; nae abaana bae basyaani bali nibali mu esa nibaaya ebyaayo byae. Yakobbo yaguma ohwoola lu baana bae basyaani lu bakobolera.

⁶Hamori, laatang'ene Sekemu yachia eyiri Yakobbo yaalomaloma nae.

⁷Nae abaana ba Yakobbo nibakobola nibatula ohwaaya, basimanya, mani bawaamo omwooyo nibanyoolera muno; olwohuba Sekemu yali n'aholere esy'omusiro eyiri Abaisiraeli, ohukwa hu mwaana wa Yakobbo, esiindu sifwaana sityo haba sisyali nisihoyeerwe ohuholwa daawe.

⁸Nae Hamori naalomaloma nabo n'aboola ati, “Omwooyo kw'omwaana waange Sekemu kwekoomba omuhaana wao; husaba mumulehere amudeehye.

⁹Lehe mudeehisanie naafwe, huyire abahaana beeng'we haandi mwesi muyire abahaana beefwe.

¹⁰Munamenyaanga alala naafwe, haandi esyaalo syeefwe sinabechaanga esiikule yi muli; munamenyaangamo sa haandi muchurusireengemo sa, mani munyoolereengemo emyaandu.”

¹¹Sekemu haandi n'aboolera laatang'ene neende bamboochong'ene Dina ati, “Lehe nyoole ohwakaanirwa mu moni wao, mani mba njia ohubaba buli siindu syoosi simunamboolere.

¹²Muheengereo ebiindu by'ohuhwa neende ebiyaanwa, mani njia ohubaba koti lu munaabe mumboolere, esihuluundu syeene siri mbwe muumberese omuhaana weeng'we abe omuhasi waange.”

¹³Nae abaana ba Yakobbo nibakobola mu Sekemu neende laatang'ene Hamori mu ngeri y'obubacha, olwohuba Sekemu yali n'akwiire hu Dina mboocho yaabwe.

¹⁴Bababoolera bati, “Haba sihunyala ohuhola esiindu sityo daawe, ohuberesa mboocho yeefwe eyiri omuundu otahebwa, olwohuba esyo sichia ohuba esiindu sy'esoni muno yi huli.

¹⁵Mani nimuhola esiindu sino syoong'ene, huchia ohubafukiirira, ‘Endi muchia ohuba koti lu efwe huli haandi buli musaacha yeesi mweeng'we aba achia ohubechaanga ow'ohuhebwaanga.’

¹⁶Mani huchia ohubaberesa abahaana beefwe haandi fweesi huchia ohuyira abahaana beeng'we mani huchia ohumenya naang'we humale hube omuundu mulala.

¹⁷Nae nimuhaya ohufukiirira ebiindu bi hubaboolera mani mwaahaya ohuhebwa, efwe huba huchia ohuyira omuhaana weefwe mani hwebweereo.”

¹⁸Emboosi chaabwe echo cheecha chasangaasa Hamori neende Sekemu omwaana wae.

¹⁹Mani omuraaga wuno haba siyahiinda ohuhola esiindu sino, olwohuba yadaha muno omuhaana wa Yakobbo. Bulaanu Sekemu niye owali ohiramo oluyaali mu daala lya Hamori.

²⁰Mani Hamori neende Sekemu omwaana wae niboola hu siruwa sy'esiko syaabwe mani balomaloma neende abasaacha bomu siko syaabwe baboola bati,

²¹“Ngaandi abasaacha bano beecha beefwe nibo, mani lehe bamenye mu syaalo syeefwe mani bachurusiremo, olwohuba bone, esyaalo sino sihoongo muno sibamala sa. Lehe huyire mani huhwe abahaana baabwe, haandi bosi bayire abahaana beefwe.

²²Esiindu sinaakere abasaacha bano baanyala ohufukiirira ohumenya naafwe, nisyo ohweehola omuundu mulala, ‘mbwe buli musaacha mweefwe w'ohuhebwa koti lu abo bosi bahebwaanga.’

²³Eng'oombe chaabwe, neende ebiindu byaabwe neende ebisolo byaabwe byoosi bichia ohuba ebyeefwe. Ohutusaho, lehe hufukiirisanie nabo, mani bamenye naafwe sa.”

²⁴Mani abasaacha boosi nibatula nibachia erwaanyi w'esiruwa syae, nibafukiirira bi Hamori neende omwaana wae Sekemu baboola, mani buli musaacha naahebwa, buli musaacha yeesi owaachia erwaanyi w'esiruwa syae.

²⁵Nae hu ludaalo lwohudaatu, abasaacha abo nibasisiiri neende obuchuuni bw'ohuhebwa, abaana ba Yakobbo babiri, Simeoni neende Leefi, bamboochong'ene Dina, babukula engaanga chaabwe mani baseeta esiko esyo nibataamanyire, mani nibeeta abasaacha abo boosi.

²⁶Mani nibeeteramo Hamori neende omwaana wae Sekemu, nibatusa Dina mu nyuumba ya Sekemu mani nibawaao.

²⁷Abaana ba Yakobbo baandi, beecha baanyoola nibamalire ohwiita abaandu, mani nibachaaka ohuyaaya esiko esyo nibetuunga olwohuba bali nibakwa hu mboocho yaabwe.

²⁸Bayaaya mani baayira eng'oombe chaabwe, ebyaayo byaabwe, esuhiri chaabwe alala neende buli siindu syoosi esyali mu siko omwo neende mu ndalo chaabwe.

²⁹Bayira eby'obuyiinda byaabwe byoosi, bayira abaana baabwe boosi neende abahasi baabwe boosi, neende ebiindu byoosi ebyali mu nyuumba chaabwe, byoosi babiyaaya mani nibawaao nabyo.

³⁰Yakobbo nae yaboolera Simeoni neende Leefi ati, “Ngaandi eng'we mbao muundeteere ebidinyu byeene! Bulaanu Abakanani neende Abaperisi alala neende abeebulanwa bomu syaalo sino baachia ohuhaya. Ndi neende abaandu badiidi muno, mani niwiichuhana beeha alala, bachia ohungaluuhanaho mani baaseete, ao mba njia ohusihirira, ese alala neende enyuumba yaange yoosi.”

³¹Nae nabo nibamukobolamo bati, “Odaha ayire mboocho yeefwe koti omucheke-bucheke sa, kose?”