Read saamia Ohuchaaka 35 Bible Online

Ohuchaaka 35 - saamia bible

Ohuchaaka 35

¹Nasaae yaboolera Yakobbo ati, “Siingira, ochie Bbeteli, omenye eyo; mani woombahire Nasaae wahubonehera niwiiruha Esau mwaanamao, alutaari.”

²Yakobbo bulaanu yaboolera abomu nyuumba yae, neende abaandu ba yali nabo ati, “Mutuseo banasaae bateende ba muli nabo, abeene mweelabye, mani mweefwaale engubo chiindi.

³Lehe husiingire, huchie Bbeteli, mani nyale ohwoombahayo alutaari eyiri Nasaae owahoonya ni ndi mu bidinyu haandi obeere naange buli yimbere ningeendera.”

⁴Mani nibaberesa Yakobbo banasaae bateende ba bali nabo, neende ebitaadi bi bali nibefwaalire; yabikisa aasi w'omutuumba kwali aambi neende Sekemu.

⁵Nae nibali nibasikeendaanga, amatiichasi maangi ohutula eyiri Nasaae kadiira abaandu bomu biko ebyali nibyebodoohaanie abuundu ao, mani nibahaya ohuloonda abaana ba Yakobbo.

⁶Nae Yakobbo niyoola Lusi (oba Bbeteli), esiri mu syaalo sya Kanani, Yakobbo neende abaandu ba yali nabo boosi,

⁷yoombahao alutaari, mani yalaanga abuundu ao ati, Eli-Bbeteli, olwohuba ao niwo yi Nasaae mweene yamubonehera niyeeruha ohutula eyiri Esau mwaanang'ina.

⁸Debbora, omwihasa wa Rebbeka yafwa, mani baamusiiha aasi w'omutuumba, emwaalo wa Bbeteli, mani abuundu ao yalaangwa ati, “Alonibakuti,” amahuluundu mbwe, “Omusaala kw'ohuliriramo.”

⁹Nasaae haandi yabonehera Yakobbo ohutula Mesopotamia, mani yaamuberesa ehabi.

¹⁰Nasaae yamuboolera ati, “Eliita lyao nilyo Yakobbo; nae ohutula buti soochia hulangwaanga Yakobbo, nae ochia ohulaangwaanga Yisiraeli.” Mani eliita lyae nililaangwa Yisiraeli.

¹¹Nasaae yamuboolera ati, “Niise Nasaae w'Obunyala bwoosi, ‘nyoola olwiibulo mani wingiiye.’ Esyaalo neende emikaanda ky'ebyaalo bichia ohuhutulamo, haandi abeechuhulu bao baachia ohubechaanga abatuki.

¹²Esyaalo si ndaberesa Abburahamu neende Yisaka sichia ohuba esyao, haandi njia ohuberesa esyaalo esyo abeechuhulu bao abaheebulwe.”

¹³Nasaae mani yatula eyiri Yakobbo, abuundu yi yali n'alomelomeere nae.

¹⁴Yakobbo yoombaha esiiro abuundu yi Nasaae yali n'alomalomeere nae, esiiro y'amakina, mani yaayilabya neende ohuyichuhaho efiini alala neende amafuta k'emiseituuni.

¹⁵Yakobbo yalaanga abuundu yi Nasaae yalomalomera nae ati, “Bbeteli.”

¹⁶Yakobbo neende abomu daala lyae batula Bbeteli, nae nibali nibasisiiri ohwoola Ewufuraati, Rakeeli yachaaka ohulumwa, olwohuba yali aasito.

¹⁷Nae Rakeeli esasaakisi niyali niyimuchuuna muno, omuhasi wali namwiibusa yamuboolera ati, “Guma sa; olwohuba ochia ohwiibula omwaana wuundi.”

¹⁸Nae Rakeeli niyali aambi ohukwiisa omwooyo, yamulaanga ati “Bbenoni,” amahuluundu mbwe, “Omwaana w'ebidinyu byaange,” nae laatang'ene yaamulaanga ati, “Bbenjamini,” amahuluundu mbwe, “Omwaana ochia ohuba ow'obusiha”.

¹⁹Rakeeli yafwa, mani nibamusiiha hu ngira yicha Ewufuraati (oba Bbetilehemu).

²⁰Yakobbo mani niyoombaha esiiro hu sirindwa syae; niyo esiiro y'esiriindwa sya Rakeeli, eyisisiiruwo ohwoola buti.

²¹Yisiraeli yemeeda ohukeendaana, mani niyoombaha eyeema lyae n'obitire omunaara kwa Ederi.

²²Bulaanu Yisiraeli niyali nasiimenyere mu syaalo esyo, Rubbeeni yaba alala neende Bbiliha, omuhasi w'erwaanyi wa laatang'ene; mani Yisiraeli yaasimanya. Abaana basyaani ba Yakobbo bali ehumi neende babiri.

²³Abaana ba Leya nibo: Rubbeeni (omwaana waamberi wa Yakobbo), Simeoni, Leefi, Yuda, Yisakari, neende Sebbuluuni.

²⁴Abaana basyaani ba Rakeeli bali nibo: Yosefu neende Bbenjamini.

²⁵Abaana basyaani ba Bbiliha, omuwaambe wa Rakeeli, nibo: Daani neende Nafutaali.

²⁶Abaana ba Silupa, omuwaambe wa Leya nibo: Gaadi neende Aseri. Mani nibo abaana basyaani ba Yakobbo yeebula naali mu Padanaramu.

²⁷Yakobbo yachia Mamure oba Kiriati Aribba (oba Hebburoni) eyiri Yisaka laatang'ene, yi Abburahamu neende Yisaka yi bali nibamenya.

²⁸Emyaaka kya Yisaka kyali emia ndala neende amahumi kataanu-na-kadatu (180).

²⁹Yisaka n'akwiisa omwooyo mani naafwa n'akofuule haandi n'angaale muno; mani baamuyira yi basiihaanga abaandu bae, mani abaana bae Esau neende Yakobbo nibamusiiha.