Read saamia Ohuchaaka 37 Bible Online

Ohuchaaka 37 - saamia bible

Ohuchaaka 37

¹Yakobbo yemeeda ohumenya mu syaalo sya Kanani si laatang'ene yabeechaangamo koti walukeendwa.

²Bino nibyo ebidiira hu daala lya Yakobbo. Yosefu niyoosa emyaaka ehumi neende kitaanu-na-kibiri, yali niyaaya ebyaayo neende bamwaanang'ina; yali naali neende abaana ba Bbiliha neende Silipa, abahasi balataang'ene; mani Yosefu yabuula eyiri laata yaabwe ebyonoono bibaholaanga.

³Bulaanu Yakobbo yali naadaha Yosefu muno ohuhira abaana bae baandi boosi, olwohuba Yosefu niye omwaana yi yeebulira mu bukofu bwae; mani naamusonera ekaanju lya amahono maleeyi.

⁴Nae bamwaanang'ina nibabona bati laata yaabwe yali naadaha Yosefu ohuhira bamwaanang'ina baandi boosi, mani nibatamudaha daawe, nibahaya ohulomalomaanga nae neende omuleembe.

⁵Bulaanu Yosefu yeemao yaloota esilooto, nae niyabooleraho bamwaanang'ina ebidiira hu silooto esyo, abo bemeeda sa ohumuhaya.

⁶Mani yaababoolera ati, “Mubulireho esilooto si ndootere sino.

⁷Bone, hubeere nihuboya emitwe ky'engaano mu ndalo, mani omutwe kw'engaano kwaange kweecha kwasiingira kweema; mani bone, emitwe ky'engaano kyeeng'we kyaakwebodoohania, mani kyeenamira okwaange.”

⁸Bamwaanang'ina bamuteeba bati, “Mubwadyeeri bweene, obaasa oti niiwe ochia ohututuka? Oba oti niiwe ochia ohuba omutuki weefwe?” Mani nibamuhaya ohuhirahoo ohweema hu bilooto byae neende emboosi chae.

⁹Yosefu yaloota esilooto siindi, mani yaasiboolera bamwaanang'ina ati, “Bone, haandi ndootere esilooto siindi; elyuuba neende omwoosi, neende eng'ining'ini bibeere nibiinyinamira.”

¹⁰Nae niyaboolera laatang'ene neende bamwaanang'ina ebidiira hu silooto sino, laatang'ene yamwaalabira, mani yaamuboolera ati, “Silooto siina sino sy'olootere? Mubwadyeeri obaasa oti ese neende maakoo neende bamwaanamao niifwe abachia ohukwa aasi mani huhwiinamire sa?”

¹¹Bamwaanang'ina bamudiirira ehiinda, nae laatang'ene yadoong'a sa n'abibasaangaho mu mwooyo kwae.

¹²Bamwaanang'ina Yosefu bachia ohwaaya ebyaayo bya laata yaabwe aambi neende Sekemu.

¹³Yakobbo yaboolera Yosefu ati, “Bamwaanamao bali Sekemu, eyo niyo yi bali ohwaayira ebyaayo; yicha mani huhutume ochie yi bali.” Yosefu nae yaboolera laatang'ene ati, “Mbano nduwo”

¹⁴Yakobbo yamuboolera ati, “Chia mani oboneho nikali mbwe bamwaanamao baliyo sa bulai, alala neende ebyaayo, mani okobole wumboolere.” Yamutuma mu hooho lya Hebburoni, mani n'achia Sekemu.

¹⁵Omusaacha wuundi yamunyoola n'adikaana mu esa; mani yaamuteeba ati, “Oli ohukoonya siina?”

¹⁶Nae Yosefu yaakobolamo ati, “Ndi ohukoonya bamwaanama, husaba, nooba noomanyire, wumboolere yi bali ohwaayira, ebyaayo.”

¹⁷Nae omusaacha oyo yaboola ati, “Baweereo, olwohuba mbuliire nibaboola bati, ‘Lehe huchie Dotani.’ ” Yosefu yaloonda hu bamwaanang'ina, mani naabanyoola nibali mu Dotani.

¹⁸Bamubona nasisiiriho eyale, nae niyali natoola aambi nabo, bafukiirisania ohumwiita.

¹⁹Mani nibaboolerana abeene-na-beene bati, “Omuundu w'ebilooto, mbao yeecha.

²⁰Mwiiche, lehe humwiite mani humusukune mu lala hu meena kano, huchia ohuboola huti esolo ndeende niyo eyimuliire, mani huboneho ebilooto byae koti lu binaabe.”

²¹Nae Rubbeeni niyasiwulira, yamununula ohutula mu mahono kaabwe, yaboola ati, “Lehe hutakosao obulamu bwae.”

²²Rubbeeni yababoolera ati, “Muteedisa amabaanga; mumusukune sa mu lala hu meena kali ano mu sichiimi muno, nae mutamuholaho esibi syoosi.” Yaboola sino n'achiririra ohumuwonia mu mahono kaabwe, mani amale amukalusire laatang'ene.

²³Nae Yosefu niyoola eyiri bamwaanang'ina, bamukwaaho mani baamufwaalulamo ekaanju lyae, ekaanju ly'amahono maleeyi li yali niyefwaalire.

²⁴Baamuyira mani bamusukuna mu liina, eliina litalimo amaachi.

²⁵Mani nibeehala nibachaaka ohulya. Nae nibasiingisa emoni chaabwe, babona emikaanda ky'Abaisimaeli nibatula Gileadi, nibali neende engamia nichikiingire obudooki, neende ebiindu biwunya esing'aari ebilaangwa biti “baluma,” neende mira. Bali hu lukeendo lwaabwe nibeehirira nibachia mu Misiri.

²⁶Yuda yaboolera bamwaanang'ina ati, “Muheemba siina ku huchia ohunyoola nihwiita mwaanama mani hwakisa amabaanga kae?

²⁷Yiche, lehe humukuse sa Abaisimaeli, nae hutamuholaho esibi syoosi daawe, olwohuba mwaanama niye, haandi amabaanga keefwe keene.” Mani bamwaanang'ina baafukiirira.

²⁸Mani abachurusi ohutula Media nibali nibabitao, bamwaanang'ina Yosefu bamuhweesa ohutula mu liina, mani baamukusa Abaisimaeli ebituundu by'efeesa amahumi kabiri; mani baayira Yosefu Misiri.

²⁹Rubbeeni niyakobola hu liina mani yaabona ati Yosefu yali naabulamo, yataandula engubo chae

³⁰mani yaakobola eyiri bamwaanang'ina n'aboola ati, “Omwaana haba saaluwo, mani ese ndaakwe yeena?”

³¹Baabukula ekaanju lya Yosefu mani nibeeta embusi, nibeeniha ekaanju lya Yosefu mu mabaanga k'embusi ako.

³²Bayirira laatang'ene ekaanju lya amahono maleeyi mani baaboola bati, “Efwe hunyoolere ekaanju lino, bonaho niliri nilyo ely'omwaana wao, kose haba.”

³³Mani niyalyeehaliirisa ati nilyo ekaanju ly'omwaana wae, yaboola ati, “Nilyo ekaanju ly'omwaana waange; esolo ndeende mbao niyo eyimuliire; ataali ohukana-kana hwoosi, Yosefu amalire ohubosoolwamo ebituundu-tuundu.”

³⁴Yakobbo yataandula ebyefwaalo byae, yeeboya engubo ch'egunia mu sibuno, mani yaalira omwaana wae endaalo nyiingi muno.

³⁵Abaana bae basyaani neende abahaana boosi beecha baamugumia omwooyo, nae naahaya ohulemiswa omwooyo, yalira sa n'aboola ati, “Haba daawe, ese njia ohuchia emakoombe eyiri omwaana waange.” Mani laatang'ene yaamulira muno.

³⁶Mu biha ebyo Abamidia bali bamalire ohukusa Yosefu Misiri, eyiri Potifa, omuhalaabani muhunuufu w'abasikaari baliinda omutuki wa Misiri.