Read saamia Ohuchaaka 38 Bible Online

Ohuchaaka 38 - saamia bible

Ohuchaaka 38

¹Ao mu biha ebyo, Yuda yatula eyiri bamwaanang'ina mani yaachia ohumenya neende omusacha Mudulaami, olaangwa Hira.

²Yuda yabonayo omuhaana w'omusaacha Mukanani wuundi olaangwa Suwa. Yuda yadeehya omuhaana Mukanani oyo, yaabechaanga nae.

³Omuhaana oyo yanyoola amabaanga yeebula omwaana musyaani, mani Yuda yaamukuliha Eri.

⁴Haandi yanyoola amabaanga kaandi mani yeebula omwaana wuundi, mani n'amukuliha “Onani.”

⁵Omuhasi oyo haandi yanyoola amabaanga kaandi, haandi yeebula omwaana musyaani, mani yaamukuliha, “Sela”. Yuda yeebula Sela naali Kesibbu.

⁶Yuda yahweera Eri omwaana wae waamberi omuhasi. Eliita ly'omuhasi wa Eri nilyo Tamari.

⁷Nae Eri, omwaana waamberi wa Yuda yali omudoodobanu mu moni w'Omwaami; mani Omwaami yamwiita.

⁸Yuda yaboolera Onani ati, “Chia mani oyire muha mwaanamao mufwiirwe, omukerame mani wibulire mwaanamao abaana.”

⁹Nae Onani niyabona ati omwaana oyo haba saachia huba owae daawe; yachichaanga ohuba alala neende muha mwaanang'ina mufwiirwe, yachuhaanga amaanyi k'obusaacha erwaanyi nikeediha aasi, mbwe ahaye ohunyolera mwaanang'ina wafwa oyo abaana.

¹⁰Nae esiindu si yahola sino haba sisyasangaasa Omwaami daawe, mani yesi yamwiita sa.

¹¹Mani Yuda yaboolera Tamari muhoomwaana wae ati, “Doong'a sa koti omuhasi mufwiirwe mu daala lya laatao ohwoola Sela omwaana waange lu yahahulire.” Olwohuba yatya ati anyala ohufwa koti bamwaanang'ina. Tamari yachia mani yaamenya mu daala lya laatang'ene.

¹²Nae ebiha nibyabitao, omuhasi wa Yuda, owali omuhaana wa Suuwa yafwa. Yuda niyamala ohukwa omwooyo, yachia Timuna eyiri omubeki w'obwooya bwa amakoondi kae neende eyiri Hira omwiicha wae Mudulaami.

¹³Nae baboolera Tamari bati, “Muhweeo ali ohuchia Timuna ohubeka hu makoondi obwooya.”

¹⁴Mani niyefwaalula engubo chae ch'omuhasi mufwiirwe, yeboya esitaambaya hu mutwe, niyebwiiha mu moni mwoosi, mani niyehala hu siruwa singiira Enayimu, esiri hu ngira yichia Timuna. Olwohuba yabona ati Sela yali naahulire, nae bali nibasisiiri ohumuba amudeehye.

¹⁵Nae Yuda niyamubonaho ati, yabaasa ati yali omucheke, olwohuba yali niyebwihiriire mu moni.

¹⁶Yachia yaali hu ndulo w'engira yaamuboolera ati, “Ewe yicha, leha sa mbe naawe.” Olwohuba haba siyali naamanyire ati niye muhoomwaana wae. Mani omuhasi oyo yaamuteeba ati, “Onaamberesa siina, hw'omale obe naange?”

¹⁷Yuda yaakobolamo ati, “Njia ohuhuberesa omwaana kw'embusi ohutula mu hoonge yaange.” Nae n'amuteeba ati, “Osiingao siina, n'osisiiri ohukuleeta?”

¹⁸Yuda yamuteeba ati, “Odaha siingeo siina?” Nae yaboola ati, “Esyaapa syao neende oluhoba lwao neende endabuhi yiri mu muhono kwao.” Yuda yamuberesa, mani yaaba alala nae. Yuda mani yaamuberesa eenda.

¹⁹Tamari yasiingira yawaao, niyetusaho esitaambaya si yali niyebwiihire mani niyefwaala engubo chiomuhasi mufwiirwe chae.

²⁰Yuda yatuma omwiicha wae Mudulami ohuleeta omwaana kw'embusi, mani bamukobosere ebiindu biyasiinga eyiri omuhasi, omwiicha wae oyo, haba siyamunyoola daawe.

²¹Mani omwiicha wae Mudulami yateeba abasaacha bomu syaalo omwo ati, “Omuhasi mucheke owali yiehala hu siruwa sy'Enaimu aambi neende engira ali yeena?” Nabo baboola bati, “Omuhasi mucheke yeesi haba sabechangaho ano.”

²²Mani Omudulami oyo yaakobola eyiri Yuda, yaboola ati, “Haba siimunyoolere daawe; haandi abasaacha bomu syaalo omwo bosi baboola bati, ‘Omuhasi mucheke yeesi haba sabechangaho ano daawe.’ ”

²³Yuda yaboola ati, “Leha adoong'e neende ebiindu ebyo, abaandu bahaye ohutucheha. Bona, hutumire neende omwaana kw'embusi mani waahaya ohumunyoola.”

²⁴Nae emyoosi kidatu nikyabitao, baboolera Yuda bati, “Tamari, muhoomwaana wao yahola obucheke; mani ali neende eenda yobucheke.” Yuda yaboola ati, “Mumutuse erwaanyi, mani mumulehe bamusaambe.”

²⁵Nibali nibamutusa erwaanyi, Tamari yatumira muhweeng'ene emboosi yaboola ati, “Omweene biindu bino niye owamberesa amabaanga.” Mani yaboola ati, “Hwekweeda, wehaliirise omanye omweene ebiindu bino, ‘omuhuuru, oluhoba neende endabuhi.’”

²⁶Yuda mani yabimanyirisa, yaboola ati, “Omuhasi oyo muluungifu muno ohuuhira, kata yahaba mbwe haba sindamuba Sela omwaana waange ohumukerama.” Yuda haandi siyemeeda ohuba alala nae daawe.

²⁷Nae ebiha byae by'ohwiibula nibyoola, byeemao byaamanyihana mbwe achia ohwiibula amahwaana.

²⁸Nae niyali n'alumwa, omwaana mulala yatusa omuhono; mani omuhasi omwiibusa yaaboyaho oluwusi lwa ranjaayi yaboola ati, “Wuno niye owataangira ohutula.”

²⁹Nae niyakalusayo omuhono, bone, mwaanang'ina niye owatula, mani omuhasi omwiibusa yaboola ati, “Omweene nga wenyalire!” Mani n'amukuliha ati, “Peresi.”

³⁰Luunyuma, mwaanang'ina yaamala yaatula naaliho oluwusi lwaahanyu hu muhono kwae, mani yaamukuliha, “Seera.”