Read saamia Ohuchaaka 39 Bible Online

Ohuchaaka 39 - saamia bible

Ohuchaaka 39

¹Bulaanu Yosefu bamuyira Misiri, mani Potifa, omusikaari muhunuufu wa omutuki wa Misiri, omwimirisi w'abaliindi, Omumisiri yakula Yosefu ohutula hu Abaisimaeli abali nibeechere nae.

²Omwaami yali neende Yosefu, mani yaaba neende ehabi muno. Yaamenya mu nyuumba y'omwaami wa Misiri.

³Potifa yabona ati Omwaami yali neende Yosefu, haandi ati Omwaami niye owamuba ehabi mani buli siindu siyaholanga syaamuchiraanga sa bulai.

⁴Potifa yaheera Yosefu muno, mani yaamuhola omwimirisi w'enyuumba yae neende ebiindu byae byoosi.

⁵Ohutula olwo, Potifa yahola Yosefu ohuba omwiimirisi mu nyuumba yae neende ebiindu bi yali nabyo byoosi. Mani Omwaami yaaberesa enyuumba y'Omumisiri oyo ehabi hulwa Yosefu. Ehabi y'Omwaami yali hu biindu byoosi bi yali nabyo, mu nyuumba neende mu ndalo.

⁶Mani yaaleha ebiindu bi yali nabyo byoosi mu mahono ka Yosefu; naatadeeba hu siindu syoosi ohumalaho ebyohulya bi anaalye byoong'ene. Yosefu yali omulai muno haandi nga abonehana bulai.

⁷Mani ebiha nibyabitao, omuhasi wa Potifa yabona Yosefu mani yamwekoomba yaboola ati, “Ewe kona sa naange.”

⁸Nae Yosefu yaahaya mani yaboolera omuhasi w'omwaami wae ati, “Bona, omwaami waange haba sasideeba hu biindu biri mu nyuumba yae, haandi buli siindu syaali nasyo siri mu mahono kaange.

⁹Ndi neende obunyala mu nyuumba yino obwaakana-yakana neende obwae. Yata buli siindu mu daala lino mu bunyala bwaange ohutusaho ewe, olwohuba ewe oli omuhasi wae. Mani nyala endye ohuhola esiindu sidoondobanu muno sino, ndonoona mu moni wa Nasaae?”

¹⁰Nae ayahaba mbwe omuhasi oyo yabooleraanga Yosefu esiindu sino buli ludaalo, Yosefu haba siyafukiirira ebyae daawe, yaahaya ohukona nae oba ohuba alala nae.

¹¹Nae hu ludaalo luundi, Yosefu yeengira mu nyuumba ohuhola emirimo kyae, mani omuhalaabani wuundi yeesi haba siyali mu nyuumba omwo ebiha ebyo.

¹²Muha Potifa yadiira engubo ya Yosefu yaboola ati, “Ewe kona sa naange.” Nae Yosefu yaamweechimulaho mani yaaleha eengubo yae mu mahono k'omuhasi oyo, yeeruha yaatula mu nyuumba omwo.

¹³Nae omuhasi oyo niyabona ati Yosefu yali alehere engubo yae mu mahono kae, omuhasi oyo yeeruha yaatula mu nyuumba,

¹⁴yalaanga abahalaabani bomu nyuumba yae basaacha mani yaboola ati, “Bone hu sino! Hane omusaacha waange yatuleetera Omuyudaaya ohutulekeeresa sa ati; yeechere yi ndi mu nyuumba yaadaha ohukona naange, mani ndaalirira mu koono ly'aakulu.

¹⁵Nae niyambuliire ati ndi ohumeeda ohuhubba embuungu mu kono ly'aakulu, yandechimuuleho, yaandehera engubo yae mani niyeeruha naatula mu nyuumba muno.”

¹⁶Omuhasi oyo yabiiha engubo ya Yosefu ohwoola lu mwaami wa Yosefu yakobola ango.

¹⁷Mani omuhasi oyo yaboolera wamwe emboosi nasilala echio ati, “Omuwaambe Muyudaaya, yi waleeta ohumenya naafwe yaandekeresa muno;

¹⁸nae lu hubbire embuungu endi mani ndaalira, yaandeheere engubo yae, mani yeeruha yaatula erwaanyi w'enyuumba.”

¹⁹Nae omwaami wa Yosefu niyawulira emboosi chi muhasi wae yamuboolera, “Yino niyo engeri yi muhalaabani wao yaanjiriiremo,” etima lyamudiira muno.

²⁰Omwaami wa Yosefu mani yaamudiira yaamuta mu jeela, yi baliindiraangamo ababoye b'omutuki. Yosefu bamuboyera mu jeela yeene eyo.

²¹Nae Omwaami yali neende Yosefu mani yaamukwiira esisa, haandi omuliindi w'ejeela yaheera Yosefu muno.

²²Omuliindi w'ejeela yaberesa Yosefu obuhoongo bw'ohuliindaanga ababoye baasye abali mu jeela eyo; haandi yaamuba obunyala hu buli siindu syeholehaangamo syoosi.

²³Omuliindi w'ejeela haba siyadeeba hu siindu syoosi esyali mu mahono ka Yosefu; olwohuba Omwaami yali neende Yosefu, haandi buli siindu syoosi si Yosefu yahola syachichaanga bulai sa.