Read saamia Ohuchaaka 40 Bible Online

Ohuchaaka 40 - saamia bible

Ohuchaaka 40

¹Ebiha bidiidi nibyabitao, omukoyi muhuluundu w'efini y'omutuki wa Misiri neende omuubbi w'emigaati wae, banyoolesa omutuki.

²Omutuki wa Misiri yanyoolerera abaandu abo boombi,

³mani yaabata mu jeela yomu nyuumba y'omuliindi muhuluundu. Ejeela yi bali nibeekaliramo Yosefu.

⁴Omuliindi muhuluundu w'ejela oyo yabata mu mahono ka Yosefu abaliindeenge. Baba mu jeela omwo ohumala ebiha biyeraho.

⁵Nae esiro siindi ababoye abo boombi nibaloota, omukoyi neende omuubbi w'emigaati b'omutuki wa Misiri, abali nibateerwe mu jeela. Buli otula neende esilooto syae, haandi buli silooto neende amahuluundu kasyo.

⁶Nae nibwahya, Yosefu yachia yi bali, mani yaabona ati bali nibeyendehereere.

⁷Yosefu yateeba abahunuufu ba omutuki wa Misiri abali nibaboyerwe alala nae mu jeela yomu nyuumba y'omuhoongo waabwe ati, “Lwasiina mweyendehereere sa mutyo enyaanga yino?”

⁸Nabo bamuboolera bati, “Hulootere ebilooto, nae abulao omuundu yeesi onyalire ohututuumbulira amahuluundu kabyo.” Yosefu yababoolera ati, “Ohutumbula hwosi-hwoosi hutula eyiri Nasaae. Mbekweeda, mumboolere ebilooto byeeng'we ebyo.”

⁹Mani omukoyi w'efini muhuluundu yaboolera Yosefu esilooto syae ati, “Mu silooto syaange, mbweene omusabbiibbu,

¹⁰nae hu musabbiibbu okwo hubeereho amasaga kadatu; nae emisaala ekio nikibeere kiloha amasaafu kiti, kyachaakaniramo ohumuliha, mani ebyaamo by'emisabbiibbu byeengerao.

¹¹Esikoombe sy'omutuki wa Misiri syali nisiri mu muhono kwaange; mani ndaabukula emisabbiibbu aakidiinyira mu sikoombe sy'omutuki wa Misiri, ndageeng'a esikoombe esyomu muhono kwa omutuki wa Misiri.”

¹²Yosefu yamuboolera ati, “Kano niko amahuluundu k'esilooto esyo, ‘amasaga kadatu niko endaalo chidatu;

¹³mu ndaalo chidatu echio, omutuki wa Misiri achia ohuhuhusa ahukobose hu mulimo kwao; haandi ochia ohudisaanga omutuki wa Misiri esikoombe koti lu waholaanga hale n'osisiiri omukoyi wae.’

¹⁴Nae hwekweeda endi ebiindu nibihuchiira bulai, wunjichulisaanga, mani oboolere omutuki wa Misiri ebindiiraho, syesi nyale ohutula mu nyuumba yino.

¹⁵Olwohuba baanjiba ohutula mu syaalo sy'Abaibburania; haandi baamboyera mu nyuumba kata ayahaba mbwe sibulao esibi si ndahola daawe.”

¹⁶Nae omuubbi w'emigaati muhuluundu niyabona ohutumbula ohwo nihwali ohulai hutyo, yaboolera Yosefu ati, “Syesi inyoolere esilooto siti, ‘mbeere ndedwiihire ebikono bidatu by'emigaati,

¹⁷nae mu sikono sy'aakulu syeene, mubeeremo emigaati ky'omutuki wa Misiri ekia buli embya.’ Nae amayoni kabeere nikaliira mu sikono esiri hu mutwe kwaange.”

¹⁸Yosefu yakobolamo ati, “Kano niko amahuluundu k'esilooto, ‘ebikono bidatu nicho endaalo chidatu.’

¹⁹Mu ndaalo chidatu omutuki wa Misiri achia ohuhutusaho obuhuluundu. Achia ohuhuboyamo omukoye mani ahwanihe hu musaala ofwe; amayoni kachia ohulya enyama y'omulaambo kwao.”

²⁰Hu ludaalo lwohudatu, oludaalo lu omutuki wa Misiri yaholera abahalaabani bae esidyaalo sy'ohwiichulisiraho ameebulwa kae. Omukoyi w'efini muhuluundu wae neende omuubbi w'emigaati muhuluundu yabasiingisa, abahalaabani bae baababona.

²¹Yakobosera omukoyi w'efini obuhuluundu bwae, mani yadiisa omutuki wa Misiri esikoombe mu muhono.

²²Nae yaboya omuubbi w'emigaati omukoye mu kosi mani yaamwaniha mu musaala, koti sa lu Yosefu yali n'atumbuule ebilooto byaabwe.

²³Mani omuhunyi w'efini siyechulisa Yosefu, nae namwiibirira.