Read saamia Ohuchaaka 41 Bible Online

Ohuchaaka 41 - saamia bible

Ohuchaaka 41

¹Emyaaka kibiri nikyali nikibitireo, omutuki wa Misiri yaloota ati yali niyeemere hu mwaalo kwa Naili.

²Eng'oombe enyirifu haandi enginu chitaanu-na-chibiri chatula mu mwaalo kwa Naili, mani cheeruhira mu makada, haandi nichichaaka ohulya obunyaasi.

³Eng'oombe chiindi chitaanu-na-chibiri, esamuufu haandi eng'ayu, chatula mu mwaalo kwa Naili nichichiloondaho, nicheema hu ndulo w'omwaalo alala neende echiindi chira.

⁴Mani eng'oombe esamuufu haandi eng'ayu nichilya eng'oombe enyirifu haandi enginu echio. Mani omutuki wa Misiri yaasimuha mu ndoolo.

⁵Omutuki wa Misiri haandi yeeyalisa mani yaloota esilooto ehabi lyohubiri, emitwe kitaanu-na-kibiri eky'engaano kyali nikyamera hu sisina silala.

⁶Ekyo nikyamala ohumera, emitwe kiindi kitaanu-na-kibiri eky'engaano yahooha haandi eyamamulwa neende omuyaka kutula ebukwe.

⁷Emitwe ky'engaano kitaanu-na-kibiri ekyahooha kyamira engaano nyengu haandi endai. Mani omutuki wa Misiri yaasimuha, nae hane, esyo syali sa esilooto.

⁸Nibwahya, omutuki wa Misiri yali omweyeendeherefu; mani yaatuma balaange ab'amayia bomu syaalo sy'e Misiri neende ab'amakesi boosi. Omutuki wa Misiri yababoolera ebilooto byae ebyo, nae abulao omuundu yeesi mu abo owanyala ohutuumbulira omutuki wa Misiri amahuluundu k'ebilooto ebyo byoosi daawe.

⁹Mani omuliindi w'efini muhuluundu yaboolera omutuki wa Misiri ati, “Enyaanga yino njichuliise koti lu ndahola esibi,

¹⁰omutuki wa Misiri koti luyanyoolera neende abahalaabani bae, mani yaasukuna mu jeela yomu nyuumba y'omuliindi muhuluundu alala neende omuubbi w'emigaati muhuluundu.

¹¹Hwaloota ebilooto mu siro silala, ese nae, buli muundu yaloota esilooto syae hu bwae esyalichiingi neende amahuluundu kasyo kakabuhaane.

¹²Hwali alala neende Omuyudaya muraaga wuundi, omuwaambe w'omuliindi muhuluundu; nae nihwamuboolera ebilooto byeefwe ebyo, yatutuumbulirao sa amahuluundu k'ebilooto ebyo byoosi. Yaboolera buli muundu amahuluundu ohuchianakana neende esilooto syae koti lu syalichiingi.

¹³Mani ebiindu bi hwaloota nibyoolerera sa abweene koti lu yatutuumbuliraanga; ese ndakaluswa hu mulimo kwaange, nae omuubbi w'emigaati yamikwa.”

¹⁴Omutuki wa Misiri oyo yatuma balaanga Yosefu, mani baamuleeta bwaangu ohutula mu jeela. Nae niyamala ohweebeka, yakaluuhania ebyefwaalo byae, mani yeecha mu moni wa omutuki wa Misiri.

¹⁵Omutuki wa Misiri yaboolera Yosefu ati, “Ndootere esilooto, nae abulao omuundu yeesi onyalire ohutuumbulira amahuluundu kasyo; nae mbuliire nibahulomalomaho bati, noboolerwa esilooto syoosi, onyala ohutuumbula amahuluundu kasyo.”

¹⁶Yosefu yakobola mu mutuki wa Misiri oyo ati, “Haba siniise, Nasaae niye ochia ohuberesa omutuki wa Misiri amahuluundu k'ahoera.”

¹⁷Omutuki wa Misiri yaboolera Yosefu ati, “Bona, mu silooto syaange, mbeere niinyemere hu ndulo w'omwaalo kwa Naili;

¹⁸mani eng'oombe enginu haandi enyirifu, chaatula mu mwaalo kwa Naili okwo mani chaachaaka ohwaaya obunyaasi.

¹⁹Haandi eng'oombe chiindi chitaanu-na-chibiri chosi chatula mu mwaalo kweene okwo, echitaboneha bulai, esamuufu haandi eng'ayu, chi ndali nitaabonaho mu syaalo sy'e Misiri muno mwoosi.

²⁰Mani eng'oombe eng'ayu haandi esamuufu nichilya nichimalao eng'oombe enginu chitaanu-na-chibiri echataangira ohubonehana chira.

²¹Nae nichamala ohuchirya, abulao omuundu onyala ohumanya ati nichio echachirya olwohuba chadoong'a nichisisiiri esamuufu sa koti lu chalichiingi. Mani niisimuhirao.

²²Haandi mu silooto syaange esyo emitwe ky'engaano kitaanu-na-kibiri nikimera hu sisina silala, nisyeengere haandi nisibonehana bulai;

²³haandi neende emitwe kitaanu-na-kibiri, ekyahooha, haandi ekyamamulwa neende omuyaka kutula ebukwe nikitabonehana bulai, chosi mani nichimera.

²⁴Emitwe ky'engaano kyahooha mani nikimira emitwe ky'engaano milai kira kitaanu-na-kibiri. Nae nindaboolera ab'amayia, abulao owanyala ohutuumbulira amahuluundu k'ebilooto ebyo byoosi.”

²⁵Yosefu yaboolera omutuki wa Misiri ati, “Ebilooto byoombi bino biri neende amahuluundu nasilala; Nasaae abwiihuliire omutuki wa Misiri esiindu si ali aambi ohuhola.

²⁶Eng'oombe ndai chitaanu-na-chibiri nicho emyaaka kitaanu-na-kibiri, haandi emitwe ky'engaano milai kitaanu-na-kibiri nikio emyaaka kitaanu-na-kibiri; esilooto silala nisyo.

²⁷Eng'oombe eng'ayu haandi esamuufu chitaanu-na-chibiri echalya endai nichimalire ohwiicha, nikyo emyaaka kitaanu-na-kibiri, haandi emitwe ky'engaano kyahooha haandi ekyamamulwa neende omuyaka kutula ebukwe, kyoosi nikyo emyaaka kitaanu-na-kibiri eky'enjala.

²⁸Biri koti lu mboolere omutuki wa Misiri endi, Nasaae abwiihuliire omutuki wa Misiri esiindu si ali aambi ohuhola.

²⁹Kichia ohubao emyaaka kitaanu-na-kibiri eky'ebiindu bilai mu syaalo sy'e Misiri syoosi,

³⁰nae emyaaka ekyo nikiweere, kichia ohubao emyaaka kitaanu-na-kibiri eky'enjala, mani ebiindu bilai byoosi bichia ohwiibirirwa mu syaalo sy'e Misiri; enjala yichia ohumala esyaalo.

³¹Mani ebiindu bilai haba sibichia humanyihana mu syaalo ohweema hu njala yichia ohuloondaho, olwohuba yichia ohuba ey'amaani muno.

³²Nae ohuloondakana hw'esilooto sy'omutuki wa Misiri amahabi kabiri syeekesa siti Nasaae amalire ohuheengao ohuhola esiindu, haandi Nasaae ali aambi ohwooseresa abweene esiindu esyo.

³³Mani sakira omutuki wa Misiri adoole omusaacha omulabufu haandi ow'amakesi, mani amuberese ohutuka esyaalo sy'e Misiri.

³⁴Leha omutuki wa Misiri yemeede ohutao abaandu balabufu hu syaalo, mani babukule silala-sya-chitaanu sya buli siindu syomu syaalo sy'e Misiri esy'emyaaka milai.

³⁵Haandi babuuse ebyohulya byoosi eby'emyaaka milai kiri ohwiicha kino, mani omutuki wa Misiri alagire abaandu ohubiiha ebyohulya mu biko byoosi, mani abaandu babibiihe.

³⁶Ebyohulya ebyo bichia ohuliinda enjala yichia ohukwao mu syaalo sy'e Misiri, enjala yihae ohusihirisa esyaalo esyo.”

³⁷omutuki wa Misiri neende abahalaabani bae bahuluundu basaangaalira endekeha yino.

³⁸Mani omutuki wa Misiri yaboolera abahalaabani bae ati, “Hunyala hwakaana omuundu oli koti wuno, oli neende Mwooyo wa Nasaae?”

³⁹Omutuki wa Misiri yaboolera Yosefu ati, “Koti Nasaae ahwekeese ebyo byoosi, abulao omuundu wuundi oli neende amakesi koti ewe.

⁴⁰Mani niiwe ochia ohuhulira enyuumba yaange, neende abaandu baange boosi bachia ohuholaanga koti lu oboola; ohutusaho omuundu oli hu sisaala sy'obutuki niye onaahuhireengeho yeeng'ene.”

⁴¹Omutuki wa Misiri mani yaboolera Yosefu ati, “Bona, mbao hudoolere ohulire esyaalo sy'e Misiri syoosi.”

⁴²Omutuki wa Misiri yefwaalula hu muhono kwae engila y'omuhuuri kwae, mani n'ayifwaala hu muhono kwa Yosefu, haandi yaamufwaasa engubo chiboneha bulai muno, haandi yaamufwaasa mu kosi olunyolo lw'esaabbu.

⁴³Omutuki wa Misiri yaberesa Yosefu esigaari sy'obutuki syae syohubiri ohwiirusa, olwohuba Yosefu niye owali owohubiri mu butuki obwo. Nae omuliindi muhuluundu yeemiriramo n'abooleraanga abaandu ati, “Mwiikule engira! Mwiikule engira!” Mani omutuki wa Misiri naaberesa Yosefu obuhoongo bw'ohuba gafana w'esyaalo sy'e Misiri syoosi.

⁴⁴Omutuki wa Misiri haandi n'aboolera Yosefu ati, “Niise omutuki, mani abulao omuundu yeesi onaaholeenge esiindu syoosi mu syaalo sy'e Misiri, ewe notaamufukiirire.”

⁴⁵Omutuki wa Misiri yakuliha Yosefu eliita ati, Safenati Panea; mani yaamuberesa Asenaati, omuhaana wa Potifera, omulaamisi wa Oni, abe omuhasi wae. Yosefu yakeenda mu syaalo sy'e Misiri syoosi.

⁴⁶Yosefu yali neende emyaaka amahumi kadatu, n'achaaka ohuhalaabanira omutuki wa Misiri. Yosefu yatula mu daala ly'omutuki, yakeenda mu syaalo sy'e Misiri syoosi.

⁴⁷Mu myaaka kitaanu-na-kibiri, eky'ebiindu biingi, eloba lyaamia ebyohulya biingi.

⁴⁸Yosefu yahung'ania ebyohulya by'emyaaka kitaanu-na-kibiri, ebyohulya nibisisiiri ebiingi mu syaalo sy'e Misiri, mani n'abiiha ebyohulya ebyomu biko biindi bya Misiri; yaabiiha mu buli siko ebyohulya ohutula mu ndalo chiri aambi neende ebiko ebyo.

⁴⁹Yosefu yabiiha emwo mu buungi muno, yaaba koti omusenye kwohu nyaanja, ohwoola lu yaakama ohupiima, olwohuba haba siyali niyinyala ohupiimwa.

⁵⁰Emyaaka ky'enjala nikisisiiri ohwoola, Yosefu yali neende abaana basyaani babiri, ba Asenaati, omuhaana wa Potifa, omulaamisi wa Oni, yamwibulira.

⁵¹Yosefu yakuliha omwaana waamberi ati, Manaase; olwohuba yaboola ati, “Nasaae yakera ndeebirira ebidinyu byaange byoosi neende ebyomu nyuumba ya laata yaange byoosi.”

⁵²Eliita ly'omwaana wohubiri yakuliha ati, “Efuraimu,” olwohuba yaboola ati, “Nasaae yaamberesa abaana baangi mu syaalo sindasaandiraangamo.”

⁵³Emyaaka kitaanu-na-kibiri eky'ebyaamo biingi ebyali mu syaalo sy'e Misiri cheecha chaawa.

⁵⁴Emyaaka ky'enjala mani nikichaaka, koti Yosefu lu yali n'aboolere. Enjala y'amaani yakwaao mu syaalo syoosi; nae mu syaalo sy'e Misiri mwalimo ebyohulya mu buungi.

⁵⁵Enjala niyachaaka ohuluma abaandu ba Misiri, balirira omutuki wa Misiri nibasaba ebyohulya, mani omutuki wa Misiri n'aboolera abaandu ba Misiri ati, “Muchie eyiri Yosefu mani muhole buli siindu sy'ababoolera.”

⁵⁶Enjala niyali niyimalire ohusalaana mu syaalo syoosi, Yosefu yeekulao ebyaaki byoosi mani yaakusa Abamisiri ebyohulya, olwohuba enjala y'amaani yali niyikwiireo mu syaalo sy'e Misiri.

⁵⁷Haandi abaandu batula mu syaalo syoosi beechaanga mu Misiri eyiri Yosefu ohukula ebyohulya, olwohuba enjala y'amaani yali niyikwiireo hu syaalo syoosi.