Read saamia Ohuchaaka 42 Bible Online

Ohuchaaka 42 - saamia bible

Ohuchaaka 42

¹Nae Yakobbo niyamanya ati engaano yali niyiri Misiri, yaboolera abaana bae ati, “Lwasiina mutingaalanaangaho sa?”

² “Ese mbano mbuliire endi hane engaano yiri Misiri; mucheeyo mani mutukulireho engaano, eyinatuliinde huhaye ohufwa.”

³Bamwaanang'ina Yosefu ehumi baachia Misiri ohukula engaano.

⁴Nae Yakobbo haba siyatuma Bbenjamini, mwaanang'ina Yosefu, ohuchia alala neende bamwaanang'ina daawe, olwohuba yatya ati yesi esidinyu si nyala ohumukwaaho.

⁵Mani abaana ba Yakobbo nibeecha alala neende abaandu baandi ohukula engaano, olwohuba enjala yali niyikwiireo mu syaalo sya Kanani.

⁶Bulaanu Yosefu niye owali gafana w'esyaalo sy'e Misiri yoosi. Niye owakusanga abaandu batula mu syaalo syoosi engaano. Mani bamwaanang'ina bamwiinamira, bageeng'a obweeni bwaabwe hu loba.

⁷Yosefu niyabona bamwaanang'ina yabamanyirisa, nae n'abayira koti abaandu bataamanyire mani naalomaloma nabo naahabuha n'abateeba ati, “Mutula yeena?” Bakobolamo bati, “Hutula mu syaalo sya Kanani, hwiichire ohukula ebyohulya.”

⁸Yosefu yaamanyirisa bamwaanang'ina abo, nae bamwaanang'ina haba sibamumanyirisa daawe.

⁹Yosefu niyechulisa ebilooto bi yaloota ebidiira hu bamwaanang'ina yababoolera ati, “Muli abahemeresi, kose? Ngaandi eng'we mwiichire sa ohubona ebituundu byomu syaalo syeefwe ebitaali neende amaani.”

¹⁰Nabo baamukaluhamo nibekaana bati, “Haba omwaami weefwe, efwe abawaambe bao hwiichire sa ohukula ebyohulya.

¹¹Efwe fweesi huli abaana b'omuundu mulala, efwe abahalaabani bao, huli abaandu b'obwadyeeri, haba sihuli abahemeresi daawe.”

¹²Nae yababoolera ati, “Haba daawe, eng'we mwiichire sa ohubona ebituundu by'esyaalo bitali neende amaani.”

¹³Mani nibaboola bati, “Efwe, abahalaabani bao, huli bamwaanama ehumi neende babiri, abaana ba laata yeefwe mulala ohutula mu syaalo sya Kanani; nae, walaka adoong'ereyo neende laata yeefwe, nae owuundi haba sasisiiriwo daawe.”

¹⁴Nae Yosefu yababoolera niyomiisa ati, “Siri sa koti lu mbaboolera endi, eng'we muli sa abahemeresi.

¹⁵Muchia ohuteemebwa muti, ‘omutuki wa Misiri n'asisiiri omulamu, haba simuchia ohutula ano, ohutusaho walaka weeng'we niyeecha ano.’

¹⁶Mulala hweeng'we achie aleete walaka weeng'we. Nae eng'we mudoong'e sa ano, muchia ohusukunwa mu jeela, huteeberese emboosi cheeng'we echo, nikali mbwe bi muboola byadyeeri; nikataali katyo, omutuki wa Misiri n'asisiiri omulamu, mubwadyeeri bweene, eng'we muli sa abahemeresi.”

¹⁷Mani nibabata boosi mu jeela hulw'embaka y'endaalo chidatu.

¹⁸Hu ludaalo lwohudatu, Yosefu yababoolera ati, “Ndi omuundu oberesa Nasaae oluyaali, mani muhole esiindu si mbaboolera, muwonie obulamu bweeng'we.

¹⁹Nimuli abaandu b'obwadyeeri, lehe mulala hweeng'we adoong'e mu jeela, nae eng'we badoong'ere, muchie muyirire abomu ngo yeeng'we ebyohulya enjala yihae ohubeeta.

²⁰Mani nimuba nimukobola, muundeetere walaka weeng'we oyo; esyo nisyo esiba sinomiise emboosi cheeng'we, mani bahae ohubeeta.” Mani nibahola batyo.

²¹Nae nibaboolanira abeene-na-beene bati, “Mubwadyeeri bweene omusaango kutuhira hulw'omwaana weefwe, olwohuba hwabona koti lu yasaanda n'atwekweeda, nae efwe nihuhaya ohuwulira; sakira huli ohusaanda huti.”

²²Nae Rubbeeni yabakobolamo n'aboola ati, “Haba sindababoolera endi mutaholaho esibi syoosi hu mwaana oyo? Nae eng'we mwaahaya ohuwulira. Bulaanu huli ohusaanda hulw'ohufwa hwae.”

²³Haba sibamanya bati Yosefu yabamanyirisa, olwohuba walichingiwo omukaluli w'emboosi Yosefu naalomaloma nabo.

²⁴Yosefu yatula yi bali mani yachaaka ohulira. Yosefu yakobola yi bali yaalomaloma nabo. Yadoolamo Simeoni, yaamuboya abaasye nibabona.

²⁵Yosefu yatusa omunwa ati beechuse esao chaabwe neende engaano, bakobosere buli otulayo eseende chae mani bayite mu sao yae, haandi bababeeho ebyohulya nibali hu lukeendo lwaabwe olwo. Mani nibabaholera sa batyo.

²⁶Badwiiha engaano yaabwe hu suhiri chaabwe, mani nibawaao.

²⁷Nae mulala niyeekulao esao yae naadaha ohuberesa esuhiri yae ebyohulya, yabona eseende chae aakulu w'esao yae;

²⁸mani yaboolera abaasye ati, “Eng'we, ngaandi eseende chaange baangoboseere; njino chiri ano, aakulu w'esao yaange!” Emyooyo kyaabwe kyeecha kyaabakwa, mani baatya muno, nibachaaka ohuteebana abeene-na-beene bati, “Nasaae atuholeere siina syeene sino?”

²⁹Nae niboola mu syaalo sya Kanani eyiri Yakobbo laata yaabwe, bamuboolera ebyo byoosi-byoosi ebyabakwaaho bati,

³⁰“Omusaacha, omwaami w'esyaalo esyo, yalomaloma naafwe neende obwaalaba buungi muno, n'abaasa ati huli abahemeresi mu syaalo esyo.

³¹Nae hwamuboolera huti, ‘Huli abaandu b'obwadyeeri nae haba sihuli abahemeresi daawe.

³²Efwe huli bamwaanama ehumi neende babiri, haandi laata yeefwe ali mulala; omwaana mulala abulao, nae walaka adoong'ereyo neende laata yeefwe mu syaalo sya Kanani.’

³³Mani omusaacha oyo, omwaami womu syaalo esyo yatuboolera ati, Sino nisyo esineekese siti muli abaandu b'obwadyeeri, ‘mulehe omwaana weeng'we mulala adoong'e naange, mani muweeo muyirire ab'engo ebyohulya batafwa enjala.

³⁴Nae nimukobola muundeetere walaka weeng'we; mani njia ohumanya endi haba simuli abahemeresi sa, nae muli abaandu b'obwadyeeri. Mani njia ohubakobosera omwaana weeng'we, haandi muchia ohuchurusira mu syaalo sino.’ ”

³⁵Nae nibali nibatusa engaano mu sao chaabwe, buli muundu yanyoolaanga esiibbo sy'eseende mu sao yae; nae nibabona ebiibbo by'eseende ebyo, boosi alala neende laata yaabwe batya muno.

³⁶Yakobbo laata yaabwe yababoolera ati, “Muumalireho abaana: Yosefu haba sasisiiruwo daawe, Simeoni yesi nguyo sasisiiruwo daawe, haandi bulaanu mudaha ohuyira Bbenjamini; bino byoosi bichuuna ese muno.”

³⁷Nae Rubbeeni yaboolera laatang'ene ati, “Nitahukobosera Bbenjamini, wiitaanga abaana basyaani boombi; mumundiise mu mahono kaange, mani njia ohubona endi mukalusa yooli.”

³⁸Nae Yakobbo yaboola ati, “Omwaana waange haba saachia huchia naang'we daawe, olwohuba mwaanang'ina mufu, mani niye yeeng'ene odoong'ereo. Obudinyu bwoosi nibumukwiiraho hu ngira, muba muchia ohuundeetera ohweyendehera huungi muno, ohuchia ohuunjita-bwiita.”