Read saamia Ohuchaaka 43 Bible Online

Ohuchaaka 43 - saamia bible

Ohuchaaka 43

¹Bulaanu enjala yemeeda sa ohubaao mu syaalo sya Kanani.

²Nae nibamala ohulya engaano yibatusa Misiri, laata yaabwe yababoolera ati, “Muchieho haandi mutukulireho ebyohulya Misiri.”

³Nae Yuda yamuboolera ati, “Omusaacha yatulagira neende amaani n'aboola ati, ‘Haba simuchia huumbonaho, ohumalaho walaka weeng'we oyo niyeechera alala naang'we.’

⁴Nae n'ofukiirira ohututuma alala neende walaka weefwe wuno, mani huba hunaachie hwaahukulira ebyohulya;

⁵nae n'otafukiirira ohututuma huchie nae, haba sihuba nihunaachie, olwohuba omusaacha yatuboolera ati, ‘Haba simuchia humbonaho, ohumalaho walaka weeng'we n'ali alala naang'we.’”

⁶Yakobbo yabateeba ati, “Lwasiina mwamuboolera muti muli neende omwaana weeng'we wuundi, esichiiririrwa syeeng'we syali esy'ohuundeetera sa ebidinyu, kose?”

⁷Nabo bakobolamo bati, “Omusaacha yateeberesa bulai bweene ebitudiiraho alala neende ebidiira hu bamwaanama, n'aboola ati, ‘Laata yeeng'we asisiiri omulamu? Muliho neende omwaana weeng'we wuundi?’ Ebiindu bihwamuboolera byachianakana neende ebiteebo bino; haba sihwali nihumanyireho huti achia ohuboola ati, ‘Muleete omwaana weeng'we oyo?’”

⁸Yuda yaboolera Yakobbo laatang'ene ati, “Omwaana mumundiise, hu huba huchia ohusiingira huchie hukule ebyohulya, huwone enjala huhae ohufwa, efwe alala naawe, neende abaana beefwe.

⁹Ese ndeeyamire ohumuliinda; niise yoochia ohuteeba ebimudiiraho. Nitamukalusa yooli ndaamudiisa mu mahono kao, leha omusaango kube okwaange endaalo choosi-choosi;

¹⁰olwohuba huba nihutahiinda, bulaanu huba hukaluheyo amahabi kabiri.”

¹¹Mani Yakobbo laata yaabwe yababoolera ati, Nikali mbwe siri sityo, muhole muti, “Mudoolemo ebyaamo bilai byomu syaalo mani mubite mu sao chweeng'e, muyirire omusaacha oyo koti esisiimo. Mumuyirireho emiseituuni myoomu, obuuhi, egaamu, miira, amaido ka pisitachio neende alimoondi.

¹²Mukiingeho eseende amahabi kabiri; mumukalusireyo eseende chi mwanyoola mu sao cheeng'we, naluundi yataamo nataamanyire.

¹³Mani mubukule omwaana weeng'we, musiingire, muchie haandi eyiri omusaacha oyo.

¹⁴Leha Nasaae w'Obunyala bwoosi abakwiire esisa nimwoola mu moni w'omusaacha oyo, anyale ohubakobosera omwaana weeng'we wula alala neende Bbenjamini. Ni ndi owohufwiirwa abaana baange, mani ndahabafwiirwe sa.”

¹⁵Abasaacha abo babukula ebiyaanwa, neende eseende amahabi kabiri, alala neende Bbenjamini; mani nibasiingira nibachia Misiri, mani beemanyisa mu moni wa Yosefu.

¹⁶Nae Yosefu niyabona ati Bbenjamini ali nabo, yaboolera omubiihi wae ati, “Leeta abasaacha bano beengire mu nyuumba yaange, mani wiiteho esisolo omale ositekehe, olwohuba abasaacha bano b'ohulya naange esy'esideete.”

¹⁷Omuhalaabani oyo yeemao yaahola sa koti lu Yosefu yamulagira. Yaleeta abasaacha bano beengira mu nyuumba ya Yosefu.

¹⁸Abasaacha bano baatya muno olwohuba baleetwa mu nyuumba ya Yosefu, nibaboola bati, “Awuundi abaandu bano batuleetere muno ohweema hu seende chibata mu sao cheefwe ehabi lyaamberi, hu banyale ohutudiisa omusaango mani batukaluuhanire, hu banyoole obweyaango bw'ohutuhola abawaambe baabwe hubatutuseho esuhiri cheefwe.”

¹⁹Nae niboola amwiingira w'enyuumba ya Yosefu, baachia eyiri omuliindi mani baamuboolera bati,

²⁰“Ewe omwaami weefwe, hweecha eno ehabi lyaamberi ohukula ebyohulya;

²¹nae nihwoola yihweyalisa, hwaboolola esao cheefwe, buli muundu yanyoolaanga sa eseende chae choosi mu sao yae; mani mbano hwiichire nachio choosi ohubakobosera.

²²Hwiichire neende eseende chiindi ech'ohukula ebyohulya. Haba sihumanyire omuundu wata eseende cheefwe echio mu sao cheefwe daawe.”

²³Omubiihi oyo yakobolamo ati, “Mutadeeba daawe haandi mutatya; Nasaae weeng'we haandi Nasaae wa laata yeeng'we niye obatereere obuyiinda mu sao cheeng'we echio; ese ndanyoola sa eseende cheeng'we echio.” Mani yaleeta Simeoni yi bali.

²⁴Nae omubiihi niyamala ohuyira abasaacha bano mu nyuumba ya Yosefu, haandi niyamala ohubaberesa amaachi, beeyosa amakulu, yaberesa esuhiri chaabwe ebyohulya.

²⁵Batekeha ebiyaanwa by'ohuberesa Yosefu niyeecha ohunyoola esy'esideete, olwohuba bali nibawuliire bati bachia ohunyoola eyo esy'esideete.

²⁶Nae Yosefu niyakobola engo, bamuleetera mu nyuumba ebiyaanwa bi bali nabyo, bamwiinamira nibageeng'aanga obweeni bwaabwe hu loba.

²⁷Yosefu yabateeba ebibadiiraho, yaboola ati, “Laata yeeng'we aluwo sa omulamu, omusaacha mukofu yimwalomalomaho wula, kose? Asisiiri omulamu, kose?”

²⁸Bakobolamo bati, “Ewe omwaami weefwe, seefwe oyo mbala aluwo sa, haandi asisiiri sa omulamu abweene.” Mani nibaguunama, nibageeng'era elalira obweeni bwaabwe hu loba.

²⁹Nae Yosefu niyasiingisa emoni aakulu, yabona Bbenjamini mwaanang'na, yi batula nae mu nda ndala, mani n'aboola ati, “Wuno hane niye walaka weeng'we yi mwambooleraanga? Mwaana waange, Nasaae ahukwiire esisa!”

³⁰Yosefu yatula yi bali bwaangu muno, olwohuba omwooyo kwae kwali nikwekoomba mwaanang'ina oyo muno, mani n'akoonya abuundu w'ohulirira. Mani niyengira mu siseenge syae n'alirira omwo muno.

³¹Yosefu niyamala ohwesaaba mu moni, yatula erwaanyi; yaaguma omwooyo yaaboola ati, “Lehe, bakabule abasaacha abo ebyohulya.”

³²Bamukabula ebyohulya byae yeeng'ene, nae ebyaabwe boong'ene, haandi Abamisiri ebyaabwe boong'ene, kwali omisiro kw'Abamisiri ohulira alala neende Abaibburania.

³³Mani nibeehala ohuchianakana neende ohwiibulwa hwaabwe, ohuchaaka neende omwaana waamberi ohwoola hu walaka, nibachaaka ohutingaalanaho, nibawukaho sa.

³⁴Yosefu yabakabulaho ebyohulya byohu meesa yae, nae omukabo kwa Bbenjamini kwali nikuhira okwabaasye amahabi kataanu. Baang'wa mani nibasangaalira alala neende Yosefu.