Read saamia Ohuchaaka 45 Bible Online

Ohuchaaka 45 - saamia bible

Ohuchaaka 45

¹Yosefu mani nibimuhaya ohweliinda mu moni wa bahalaabani bae abali mu moni wae, naalagira ati, “Lehe buli muundu atule ano.” Mani abulao omuundu yeesi owaluwo Yosefu niyemanyisa eyiri bamwaanang'ina.

²Yosefu yalirira mu kono ly'aakulu, Abamisiri neende abaandu bamenya mu dooho lya omutuki wa Misiri nibawulira.

³Yosefu yaboolera bamwaanang'ina ati, “Niise Yosefu; laata yaange asisiiriyo omulamu?” Nae bamwaanang'ina batya muno mani baahaya ohumukobolamo esiindu syoosi.

⁴Yosefu yaboolera bamwaanang'ina ati, “Mbekweeda, musude aambi naange.” Mani nibasuda aambi nae. Yosefu yaboola ati, “Niise Yosefu, omwaana weeng'we, yimwakusa mu Misiri.

⁵Bulaanu mutatya kata sa mwanyoolera abeene-na-beene koti lu mwaangusa mu Misiri. Nasaae yasiindiha eno ohubataangiriramo, hu nyale ohuwonia obulamu bw'abaandu.

⁶Olwohuba enjala yimalire mu syaalo muno emyaaka kibiri sa; haandi kisidoong'ereo emyaaka kitaanu, ki baandu batachia ohulima kata sa ohukesa.

⁷Nasaae yasiindiha eno ohubataangiriramo, nyale ohubawonia mudoong'e hu syaalo, haandi ohubawonisira abeechuhulu beeng'we.

⁸Haba siniing'we abasiindiha eno daawe, nae Nasaae niye owasiindiha; yaahola ndaaba koti laatang'ene omutuki wa Misiri, neende omwaami w'enyuumba yae haandi omweemeresi w'esyaalo sy'e Misiri sino syoosi.

⁹Musiingiriremo muchie eyiri laata yaange mani mumuboolere muti, ‘Omwaana wao Yosefu aboola ati, Nasaae yaahola omwaami w'esyaalo sy'e Misiri syoosi; mani ewe yicha yi ndi eno bwaangu ataali ohuhiinda daawe.

¹⁰Ochia ohumenya mu syaalo sya Goseni, obe aambi naange, ewe neende abaana bao alala neende abeechuhulu bao, neende ebyaayo byao, neende eng'oombe chao, neende buli siindu syao syoosi sy'oli nasyo.

¹¹Njia ohuhuliindira eyo, olwohuba kisidoong'ereo emyaaka kitaanu eky'enjala. Mani ewe neende ab'enyuumba yao, neende buli siindu sy'oli nasyo muhaye ohuba abamanani.’

¹²Bulaanu eng'we mweesi mubona haandi Bbenjamini mwaanama yesi abona, muti niise Yosefu oli ohulomalomaanga naang'we.

¹³Muhoyere ohuboolera laata yaange muti oluyaali lu ndi nalwo mu Misiri, neende ebiindu byoosi bi mubweene. Mwaanguweho, muleete laata yaange ano.”

¹⁴Yosefu yakwa mu sirifu sya Bbenjamini mwaanang'ina, mani yaalira muno n'amudiirire.

¹⁵Yosefu yakwa mu birifu bya bamwaanang'ina boosi, mani yaaliraanga muno; niyamala atyo, bamwaanang'ina bachaaka ohulomaloma nae ataali ohweeyendeherera daawe.

¹⁶Emboosi chino nichoola mu dooho lya omutuki wa Misiri chiti bamwaanang'ina Yosefu beechere chasangaasa muno omutuki wa Misiri neende abahalaabani bae boosi.

¹⁷Omutuki wa Misiri yaboolera Yosefu ati, “Boolera bamwaanamao oti, ‘Mudwiihe esuhiri cheeng'we mani mukoboleyo mu syaalo sya Kanani.

¹⁸Mutuseyo laata yeeng'we alala neende abomu nyuumba yae, mani mwiiche ano yi ndi. Njia ohubaba eloba lihiramo obulai mu syaalo sy'e Misiri, haandi muchia ohulichaanga hu biindu bilai byomu syaalo.’

¹⁹Haandi mubalagire muti, ‘Muhole muti, muchie neende ebigaari ohutula mu Misiri bi munaaleetereho abaana beeng'we bayere neende abahasi beeng'we; mwiiche neende laata yeeng'we, yesi.

²⁰Mutadeeba hu myaandu kyeeng'we, olwohuba eloba lihiramo obulai mu Misiri lichia ohuba elyeeng'we.’”

²¹Mani abaana ba Yakobbo nibahola batyo. Yosefu yababeresa ebigaari, ohuchianakana koti lu omutuki wa Misiri yalagira, mani yaababeresa ebyohulya bi banaliira hu ngira.

²²Haandi yababeresa buli muundu ebyefwaalo by'ohwekaluuhanianga byosi, nae yaaberesa Bbenjamini ebituundu by'efeesa emia chidatu (300), neende engubo ch'ohwekaluuhania chitaanu.

²³Yatumira laatang'ene ebiindu bino: esuhiri ehumi echikiingire ebiindu ohutula Misiri, neende esuhiri ehasi ehumi echikiingire engaano, emigaati, neende ebyohulya biindi bi laatang'ene anaaliire hu ngira.

²⁴Yosefu yaseebula bamwaanang'ina bawaao, nae nibali nibawaao, yaababoolera ati, “Mutasoolaniraho hu ngira daawe.”

²⁵Mani nibatula mu syaalo sy'e Misiri, nibachia mu syaalo sya Kanani eyiri Yakobbo laata yaabwe.

²⁶Bamuboolera bati, “Yosefu asisiiriwo omulamu abweene, haandi niye omwaami w'esyaalo sy'e Misiri syoosi.” Yakobbo yawaamo omwooyo, mani yaahaya ohufukiirira emboosi chaabwe echo daawe.

²⁷Nae nibamuboolera emboosi choosi-choosi chi Yosefu yali naababoolere, haandi niyabona ebigaari bi Yosefu yatuma ohumukiinga, yakobolamo amaani bwaangu.

²⁸Yakobbo mani yaboola ati, “Sino simala, hane mbao omwaana waange Yosefu asisiiriwo omulamu abweene; mani njia ohuchia muboneho nisisiiri ohufwa.”