Read saamia Ohuchaaka 46 Bible Online

Ohuchaaka 46 - saamia bible

Ohuchaaka 46

¹Yakobbo yabukula ebiindu byoosi bi yali nabyo, mani yaachia Bberisebba, yayaana esiyaanwa eyiri Nasaae wa Yisaka laatang'ene.

²Nasaae yabonehera Yakobbo mu siro, naalomaloma nae naamulaanga ati, “Yakobbo,, Yakobbo.” Nae naakobolamo ati, “Nduwo.”

³Nasaae yamuboolera ati, “Niise Nasaae, Nasaae wa laataao; otatya ohuchia Misiri; olwohuba njia ohwiingiya olwiibulo lwao mani huhole obe enono hoongo muno.

⁴Njia ohuchia naawe Misiri, haandi njia ohuhukalusa mu syaalo muno, mani Yosefu niye owahahubuumbe emoni n'ofwiire.”

⁵Mani Yakobbo n'asiingira yaatula mu Bberisebba; mani abaana ba Yakobbo nibakiinga laata yaabwe, abaana baabwe boosi neende abahasi baabwe mani nibabata mu bigaari bi omutuki wa Misiri yamutumira ohumukiinga.

⁶Bayira ebyaayo byaabwe byoosi alala neende emyaandu ki bali nibanyoolere mu syaalo sya Kanani, mani baachia Misiri. Yakobbo alala neende olwiibulo lwae lyoosi,

⁷Abaana bae basyaani, neende abaana b'abaana bae basyaani, abaana bae bahaana neende abaana b'abaana bae bahaana boosi; yaachia Misiri neende ob'olwiibulo lwae lwoosi.

⁸Bulaanu kano niko ameeta k'abeechuhulu ba Yakobbo, abachia Misiri, Yakobbo neende abaana bae basyaani. Rubbeeni, omwaana wa Yakobbo waamberi,

⁹neende abaana ba Rubbeeni: Hanoki, Palu, Hesirooni, neende Karimi.

¹⁰Abaana basyaani ba Simeoni: Yemweli, Yamini, Ohadi, Yachini, Sohari, neende Sauli, omwaana musyaani yi muhasi Mukanani yeebula.

¹¹Abaana basyaani ba Leefi bali: Gerisoni, Kohati, neende Merari.

¹²Abaana ba Yuda bali: Eri, Onani, Sela, Peresi, neende Seera (nae Eri neende Onani bafwiira mu syaalo sya Kanani); nae abaana basyaani ba Peresi bali Hesirooni neende Hamuli.

¹³Abaana basyaani ba Yisakari nibo: Toola, Puwa, Yibi, neende Simirooni.

¹⁴Abaana basyaani ba Sebbulooni nibo: Seredi, Eloni, neende Yahileeli.

¹⁵(Bano nibo abaana basyaani ba Leya, ba yeebulira Yakobbo nibali Padanaramu, alala neende omwaana wae muhaana Dina; alala, abaana bae basyaani neende abahaana bali amahumi kadatu-na-badatu).

¹⁶Abaana ba Gaadi nibo: Sifiyooni, Hagi, Suni, Esibbooni, Eri, Arodi, neende Areli.

¹⁷Abaana basyaani ba Aseri nibo: Yimina, Yisyifwa, Yisyifi, Bberia, alala neende Seera mboocho yaabwe. Nae abaana ba Bberia nibo: Hebberi neende Malikieli.

¹⁸(Bano nibo abaana basyaani ba Silupa omuwaambe wa Labbani yaberesa omwaana wae muhaana Leya; mani yeebulira Yakobbo abaana bano, abaandu ehumi-na-basaasaba).

¹⁹Abaana basyaani ba Rakeeli, muha Yakobbo nibo: Yosefu neende Bbenjamini.

²⁰Nae abaana ba Yosefu yeebula naali Misiri nibo, Manaase neende Efuraimu. Babiri bano yabeebula mu Asenaati, omuhaana wa Potifera, omulaamisi wa Oni.

²¹Nae abaana basyaani ba Bbenjamini nibo: Bbela, Bbekeri, Asibbeli, Gera, Namani, Ehi, Roosi, Mupimu, Hupimu neende Aridi.

²²(Bano nibo abaana basyaani ehumi neende bane ba Rakeeli yebulira Yakobbo).

²³Daani yali neende omwaana wae musyaani olaangwa Husimu.

²⁴Abaana basyaani ba Nafutaali nibo: Yahiseeli, Guni, Yeseri, neende Silemu

²⁵(bano nibo abaana basyaani ba Yakobbo yeebula mu Bbiliha, omuwaambe muhasi yi Labbani yaberesa Rakeeli omuhaana wae, alala bali bataanu-na-babiri)

²⁶Abaandu ba Yakobbo yeecha nabo boosi, abeechuhulu bae beene, nootabaliireho abahasi b'abaana basyaani ba Yakobbo, alala bali amahumi kasasaaba-na-basasaaba.

²⁷Nae abaana basyaani ba Yosefu yeebula naali Misiri, bali babiri; abaandu bomu nyuumba ya Yakobbo abeecha Misiri bali amahumi kataanu-na-nakabiri.

²⁸Yakobbo yatuma Yuda amutaangiriremo, achie eyiri Yosefu amusabe babukaananire Goseni, mani niboola mu syaalo sya Goseni.

²⁹Yosefu yatekeha esigaari syae mani naachia ohubukaanana neende Yakobbo laatang'ene mu Goseni. Nae nibabukaanana, Yosefu yeemanyisa eyiri laatang'ene mani yaamukwa mu kosi wae. Yalirira omwo ohumala embaka yiyeraho.

³⁰Yakobbo yaboolera Yosefu ati, “Bulaanu nyala ohufwa sa, olwohuba malire ohuhubonaho, haandi manyire endi osisiiruwo omulamu abweene.”

³¹Yosefu yaboolera bamwanaang'ina neende abomu nyuumba ya laatang'ene ati, “Njia ohuchia eyiri omutuki wa Misiri muboolere endi, ‘Bamwaanama neende abomu nyuumba ya laata yaange, abali nibamenya mu syaalo sya Kanani beechere yi ndi.

³²Njia ohumuboolera endi abasaacha bano baayi nibo, haandi batuki b'eng'oombe. Beechere neende ebyaayo byaabwe, neende eng'oombe chaabwe, neende buli siindu si bali nasyo.’

³³Nae omutuki wa Misiri n'abalaanga, mani yaabateeba ati, ‘Muhola mulimo siina?’

³⁴Mumuboolere muti, ‘Abahalaabani bao, hubereenge abaayi b'eng'oombe ohutula mubuyere bweefwe ohwoola buti, efwe alala neende laata yeefwe,’ hu hunyale ohumenya mu syaalo sya Goseni.” Olwohuba musiro nikwo, Abamisiri ohuba alala neende abaayi.