Read saamia Ohuchaaka 47 Bible Online

Ohuchaaka 47 - saamia bible

Ohuchaaka 47

¹Mani Yosefu yachia yaboolera omutuki wa Misiri ati, “Laata yaange neende bamwaanama mbano boolere ano nibatula mu syaalo sya Kanani. Beechere neende ebyaayo byaabwe, neende eng'oombe chaabwe, neende emyaandu kyaabwe kyoosi. Bulaanu bali mu situundu sya Goseni.”

²Mani n'adoolamo bamwaanang'ina bataanu naachia nabo eyiri omutuki wa Misiri.

³Omutuki wa Misiri yateeba bamwaanaang'na Yosefu ati, “Eng'we muholaanga mulimo siina kweene?” Nabo bamuboolera bati, “Efwe abahalaabani bao huli abaayi sa, koti lu bakuuka yeefwe balichiingi sa.”

⁴Mani nibaboolera omutuki wa Misiri bati, “Hwiichire ohumenya mu syaalo muno; olwohuba abahalaabani bao babula owohwaayira ebyaayo byaabwe, haandi enjala nyiingi muno mu syaalo sya Kanani. Bulaanu huhwekongooya, leha abahalaabani bao bano bamenye mu situundu sya Goseni.”

⁵Mani omutuki wa Misiri n'aboolera Yosefu ati, “Hane mbao laatao neende bamwaanamao beechere sa yooli.

⁶Esyaalo sy'e Misiri mbao siri ao; beresa laatao neende bamwaanamao abuundu yi bamenya mani bamenyere abuundu ahiramo obulai; leha bamenye mu situundu sya Goseni. Nooba n'omanyireho abaandu banyala emirimo mwaabo, baberese omulimo kw'ohuliindaanga eng'oombe chaange.”

⁷Yosefu yaleeta Yakobbo laatang'ene eyiri omutuki wa Misiri, mani Yakobbo yaaberesa omutuki wa Misiri ehabi.

⁸Omutuki wa Misiri yateeba Yakobbo ati, “Nae ewe oli neende emyaaka kiinga?”

⁹Yakobbo yakobolamo ati, “Emyaaka kindahamala hu syaalo kiri emia ndala neende amahumi kadatu (130). Emyaaka ekyo kyoosi kibeere emidinyu haandi emidiidi sa, haba sikiaakana neende emyaaka kya bakuuka yeefwe miingi ki bamala hu syaalo.”

¹⁰Yakobbo yaberesa omutuki wa Misiri ehabi, mani yaatula eyiri omutuki wa Misiri.

¹¹Yosefu yamenyaanga neende laatang'ene neende bamwanaang'ina, mani yaababeresa eloba mu syaalo sy'e Misiri, eloba lihiramo obulai mu situundu sya Ramesesi, koti lu omutuki wa Misiri yali n'amulagiire.

¹²Yosefu yaberesaanga laatang'ene neende bamwaanang'ina, alala neende abomu nyuumba ya laatang'ene boosi ebyohulya, ohuchianakana neende obuungi bw'abaandu baabwe.

¹³Ebyohulya byeecha byaawa mu syaalo syoosi, olwohuba enjala y'amaani yali niyikwiire mu syaalo syoosi. Abayala bomu syaalo sy'e Misiri neende abomu syaalo sya Kanani bawaamo amaani hulw'enjala.

¹⁴Yosefu yasolosaanga eseende choosi echali mu syaalo sya Misiri neende mu syaalo sya Kanani, ohutula hu ngaano yibakulaanga; mani n'aleeta eseende echo choosi mu dooho ly'omutuki wa Misiri.

¹⁵Nae eseende choosi echali mu syaalo sy'e Misiri neende mu syaalo sya Kanani nichali nichiweere, Abamisiri boosi beecha eyiri Yosefu mani baamuboolera bati, “Tube ebyohulya; lwasiina hufwa sa noobona? Eseende cheefwe choosi-choosi chituweereho.”

¹⁶Nae Yosefu yabakobolamo ati, “Muleete ebisolo byeengwe, mani mbaberesemo ebyohulya, nimutali neende eseende.”

¹⁷Baleetera Yosefu ebisolo byaabwe; mani Yosefu yaababeresa ebyohulya nga yofwang'aniangamo neende efaraasi, ebyaayo, eng'oombe, alala neende esuhiri. Mani omwaaka okwo, Yosefu yababeresaanga ebyohulya niyofwang'aniangamo neende ebyaayo byaabwe byoosi.

¹⁸Nae omwaaka okwo nikwawa, abaandu beecha eyiri Yosefu omwaaka kuloondaho mani nibamuboolera bati, “Omwaami, efwe haba sihuchia ohuhukisa esiindu syoosi, eseende cheefwe choosi chatuwaaho; haandi ebyaayo byeefwe byoosi hwahuberesa. Sibulao esiindu siindi syoosi si huli nasyo ohutusaho emibiri kyeefwe kyoong'ene neende eloba lyeefwe li watuberesa sa.

¹⁹Lwasiina efwe neende eloba lyeefwe hufwa noobona? Humale akatula mu loba lyeefwe lino mani otubeemo ebyohulya; mani efwe alala neende eloba lyeefwe huchia ohuba abawaambe b'omutuki wa Misiri. Tuberese engaano hulye huwone mani huhaye ohufwa, esyaalo syeefwe sihaye ohusihirira.”

²⁰Yosefu yakulira omutuki wa Misiri eloba lyomu syaalo sy'e Misiri lyoosi; olwohuba enjala y'amaani eyo yakera Abamisiri boosi baakusaanga endalo chaabwe. Mani eloba lyoosi niliba elya omutuki wa Misiri.

²¹Yosefu yahola abaandu ohuba abawaambe, ohutula hu mbeka ndala y'esyaalo sy'e Misiri ohwoola hu yiindi.

²²Eloba ly'abalaamisi lyoong'ene nilyo liya takula; olwohuba abalaamisi bali neende omukabo kwaabwe kumanyihaane ohutula eyiri omutuki wa Misiri, omukabo kwaabwe okwo okwatulanga eyiri omutuki wa Misiri nikwo okwali okwabeemehao, sakira batakusa eloba lyaabwe.

²³Yosefu yaboolera abaandu ati, “Bone, enyaanga yino nguliire omutuki wa Misiri eloba lyeeng'we, alala naang'we mweesi. Bulaanu emwo yino muchie mutaake mu ndalo cheeng'we.

²⁴Nae ekesa nilyoola, muchia ohuberesa omutuki wa Misiri esituundu silala syabitaanu, nae ebituundu bine byabitaanu bichia ohubadoong'era. Ebyo nibyo ebichia ohuba emwo yohutaaka mu ndalo cheeng'we neende ebyohulya byeeng'we abeene, alala neende abomu nyuumba cheeng'we, neende ebyohulya by'abaana beeng'we.”

²⁵Mani abaandu nibaboola bati, “Owonisye obulamu bweefwe; mani nisisangaasa omwaami, efwe huchia ohuba sa abawaambe b'omutuki wa Misiri.”

²⁶Mani Yosefu n'ataao elako lidiira hu loba ly'e Misiri. Elako lino lisisiiruwo ohwoola buti, liti omutuki wa Misiri ali owohuyira esituundu silala sya bitaanu; eloba ly'abalaamisi lyoong'ene nilyo eliteehola elya omutuki wa Misiri.

²⁷Bulaanu Abaisiraeli bamenya mu syaalo sy'e Misiri, mu situundu sya Goseni. Banyoola emyaandu miingi nibali mu syaalo omwo, mani nibeebulana nibengiiya muno.

²⁸Yakobbo yamenya mu syaalo sy'e Misiri ohumala emyaaka ehumi-na-kitaanu-na-kibiri; mani emyaaka ki Yakobbo yamala hu syaalo chali, emia ndala neende amahumi kane neende kitaanu-na-kibiri (147).

²⁹Nae Yakobbo niyali aambi ohufwa, yalaanga Yosefu omwaana wae mani yaamuboolera ati, “Noobona oti bulaanu wungwiirire esisa, mani geeng'a amahono kao akatikaati wa mataango kaange, weechube oti haba soochia ohusiiha mu syaalo sy'e Misiri.

³⁰Nae ndaha basiihe alala neende bakuuka yaange; nduse mu syaalo sy'e Misiri, wuunjire wusiihe yi babasiiha.” Yosefu mani n'aboola ati, “Njia ohuhola sa koti lwoboolere.”

³¹Yakobbo yaboola ati, “Mani weechube yi ndi”; mani Yosefu n'amweechubira. Yakobbo yagunamia omutwe niyebasa naali hu sitaanda syae.