Read saamia Ohuchaaka 49 Bible Online

Ohuchaaka 49 - saamia bible

Ohuchaaka 49

¹Yakobbo yalaanga abaana bae basyaani, mani yaababoolera ati, “Mwebuuse alala, mbaboolereho ebichia ohuboolaho mu ndaalo chiicha.

²“Eng'we abaana ba Yakobbo, mwebuuse alala, mani muwulire bi Yakobbo laata yeeng'we aboola.

³“Rubbeeni, niiwe omwaana waange waamberi, niiwe amaani kaange, haandi yi ndeebula mu maani k'oburaaga bwaange, yi hira ohwesuungiramo haandi ohiramo amaani.

⁴Oli koti amaachi kahulukusa, mani haba soochia ohuba ohiramo olwohuba waniina hu sitaanda sya laatao; mani weeyalisaho neende omuhasi wae, waasinyaasa!

⁵“Simeoni neende Leefi batula mu nda ndala; beehoonyera ebilwaaniso byaabwe ohuhola eby'obutemo.

⁶Ese haba siinjia ohweeyingisa mu bumoonyi bwaabwe obwo, kata sa ohwiihalaanga mu mihung'aano kyaabwe, olwohuba beeta abaandu neende egiili, beeteraangao sa esurusi.

⁷Esichubo sibe hu tima lyaabwe, olwohuba bitiirifu nilyo, nae hu bwaalaba bwaabwe olwohuba bululu nibwo. Ese njia ohubasalaanisira mu syaalo sya Yisiraeli yoosi. Ese njia ohubasalaanisira mu baandu basyo.

⁸Ewe Yuda, bamwaanamaao bachia ohuhufumia; ochia ohukwichaanga abasuku bao mu kosi; abaana ba laatao bachia ohuhwiinamiraanga.

⁹Yuda oli koti edalang'i enjere, mwaana waange, okoboole nootula ohuyiima, ogunaame aasi, oli koti edalang'i esaacha, haandi koti edalang'i ehasi, wiina mweene onahusingiseenge?

¹⁰Yuda niye ochia ohudiraanga endawusi y'obutuki, noomba endawusi y'abatuki ohutula mu makulu kae, ohwoola omweene butuki lu yaheechere; mani oyo niye yi baandu bahawulire.

¹¹Yahaboye omwaana kw'esuhiri yae hu musabbiibbu haandi esuhiri yae ndoto hu musabbiibbu kuhiramo obulai, engubo chae yahachoosereenge mu fiini haandi ebyefwaalo byae mu fiini enjahanyu.

¹²Emoni chae chahaahanye olw'ohung'wa efiini, haandi ameeno kae kahalabe olw'ohung'wa amabeere.

¹³“Sebbulooni yahamenye hu lwaasi ly'enyaanja; amaato kachia ohukoberaanga hu genya lyae, haandi olwaho lwae luchia ohuba Sidoni.

¹⁴“Yisakari, suhiri y'amaani niyo, eyeyalisa akatikaati w'ebidwooli by'amakoondi;

¹⁵yabona abuundu w'ohuwuluhiramo ao naali alai, haandi ati eloba elyo lyali niliboneha bulai; yeenamia ebeka lyae ohwedwiiha, mani niyehola omuwaambe yi bayiika ohuhola emirimo.

¹⁶“Daani niye ochia ohuheengeraanga abaandu bae emisaango koti mulala hu nono cha Yisiraeli.

¹⁷Daani achia ohubechaanga enjuha eyiri hu ndulo w'engira, endemo yiri hu ngira, eyiboocha ebisiisiro by'efaraasi mani oyiirusa niyaanuhaho naakwa aasi.

¹⁸Ewe Omwaami, ese niindire sa obuwonia bwao.

¹⁹“Abanyaka bachia ohuyaaya Gaadi, nae achia ohukaluuhana mani abaloondeho.

²⁰Ebyohulya bya Aseri bichia ohubechaanga ebiingi, haandi achia ohuleetaanga ebyohulya bihoyera omutuki.

²¹“Nafutaali niye emboongo ndehuule, owiibula abaana bae balai.

²²“Yosefu niye omusaala kwaamaho ebyaamo biingi, okwaama ebyaamo biingi nikuli aambi neende esulo y'amaachi amasaga kakwo katakalala ohwoola hu sida.

²³“Abasuku bae bamuseeta neende obwaalaba buungi muno, beecha baamufumita, mani baamuyira bubi muno;

²⁴nae oluyiingo lwae lwoomera mu mahono kae, mani amahono kae nikanyoola amaani ohutula mu mahono k'Owobunyala wa Yakobbo (mu liita ly'Omwaayi, Omuliindi wa Yisiraeli),

²⁵mu liita lya Nasaae wa lataao ochia ohuhuhoonya, mu liita lya Nasaae w'Obunyala bwoosi ochia ohuhuberesa ehabi neende ehabi chitula aakulu Muukulu, ehabi chitula aasi mu loba, ehabi ch'ohwiibula neende ohunuunia.

²⁶Ehabi cha lataao nyiingi muno ohuhira ehabi ch'engulu ch'endaalo choosi ohuhira ebilai by'obugulu bw'endaalo choosi; lehe ehabi echo chibe hu mutwe kwa Yosefu, neende hu bweeni bw'oyo owaawulwa ohutula hu bamwaanang'ina.”

²⁷“Bbenjamini niye eebbwe linyaka echuli, analichaanga ebiindu bi yeetere, haandi engoloobe, anakabanaangamo ebiindu bi ayaayire.”

²⁸Chino choosi nichio enono ehumi-na-chibiri cha Yisiraeli; haandi sino nisyo si laata yaabwe yababoolera naababeresa ehabi, buli muundu naamuberesa ehabi yimuhoyera.

²⁹Yakobbo yalagira abaana bae mani naababoolera ati, “Njia ohuyirwa mbe alala neende balaata yaange; mani musiihaanga alala neende balaata yaange mu ng'uungu yiri mu mukuunda kwa Efirooni Omuhiti,

³⁰Mu ng'uungu yiri mu mukuunda kwa Makipela okuli ebukwe wa Mamure, mu syaalo sya Kanani. Omukuunda ku Abburahamu yakula ohutula hu Efirooni Omuhiti kube abuundu w'ohusihaangamo abaandu.

³¹Eyo niyo yi basiiha Abburahamu neende omuhasi wae Saara; eyo niyo yi basiiha Yisaka neende omuhasi wae Rebbeka; haandi eyo niyo yi ndasiiha Leya.

³²Omukuunda neende eng'uungu yirimo, byakulwa ohutula hu muundu Muhiiti.”

³³Yakobbo niyamala ohulagira abaana bae basyaani, yeengisa amakulu kae mu buliri, mani yakwiisa omwooyo. Yayirwa yasiihwa alala neende balataang'ene.