Read saamia Ohuchaaka 5 Bible Online

Ohuchaaka 5 - saamia bible

Ohuchaaka 5

¹Luno nilwo olunyaali lw'abeechuhulu b'Adamu. Nasaae niyaloonga abaandu, yabahola mu fwaani yae.

² Omusaacha neende omuhasi, Nasaae yabaloonga yaababeresa ehabi, yabalaanga ati “Abaandu”.

³Adamu niyali n'amalire emyaaka emia ndala neende amahumi kadatu (130), yeebula omwaana musyaani omufwananira elalira, yaamulaanga Seeti.

⁴Adamu niyamala ohwiibula Seeti, yayiindira ohumala emyaaka emia chitaanu-na-chidatu (800). Adamu yeebula abaana baandi abasyaani neende abahaana.

⁵Adamu yayiindira ohumala emyaaka emia chitaanu-na-chine neende amahumi kadatu (930) naafwa.

⁶Nae Seeti niyayiindira ohumala emyaaka emia ndala neende kitaanu (105), yeebula Enosi.

⁷Seeti niyamala ohwiibula Enosi, yayiindira ohumala emyaaka emia chitaanu-na-chidatu neende kitaanu-na-kibiri (807), haandi yeebula abaana baandi abasyaani neende abahaana.

⁸Seeti yayiindira ohumala emyaaka emia chitaanu-na-chine neende ehumi neende kibiri (912) mani yaafwa.

⁹Enosi niyali n'amalire ohuyiindira ohumala emyaaka amahumi kataanu-na-kane, yeebula Kenani.

¹⁰Enosi n'amalire ohwiibula Kenani, yayiindira ohumala emyaaka emia chitaanu-na-chidatu neende ehumi neende kitaanu (815). Enosi haandi yeebula abaana baandi abasyaani neende abahaana.

¹¹Enosi yayiindira ohumala emyaaka emia chitaanu-na-chine neende kitaanu (905); mani yaafwa.

¹²Nae Kenani n'ayiindira emyaaka amahumi kataanu-na-kabiri (70) yeebula Mahalaleli.

¹³Kenani n'amalire ohwiibula Mahalaleli, yayiindira ohumala emyaaka emia chitaanu-na-chidatu neende amahumi kane (840). Kenani haandi yeebula abaana baandi abasyaani neende abahaana.

¹⁴Kenani yayiindira ohumala emyaaka emia chitaanu-na-chine neende ehumi (910); mani yaafwa.

¹⁵Mahalaleli niyayiindira ohumala emyaaka amahumi kasasaaba neende kitaanu, yeebula Jareedi.

¹⁶Mahalaleli n'amalire ohwiibula Jareedi, yayiindira ohumala emyaaka emia chitaanu-na-chidatu neende amahumi kadatu (830), mani haandi niyeebula abaana baandi abasyaani neende abahaana.

¹⁷Mahalaleli yayiindira ohumala emyaaka emia chitaanu-na-chidatu neende amahumi kataanu-na-kane neende kitaanu (895), mani yaafwa.

¹⁸Jareedi niyayiindira ohumala emyaaka emia ndala neende amahumi kasasaaba neende kibiri (162), yeebula Enoka.

¹⁹Jareedi n'amalire ohwiibula Enoka, yayiindira ohumala emyaaka emia chitaanu-na-chidatu (800), mani haandi yeebula abaana baandi abasyaani neende abahaana.

²⁰Yareedi yayiindira emyaaka emia chitaanu-na-chine neende amahumi kasasaaba neende kibiri (962), yaafwa.

²¹Enoka niyayiindira ohumala emyaaka amahumi kasaasaba neende kitaanu yeebula Metuseela.

²²Enoka n'amalire ohwiibula Metuseela, yakeenda neende Nasaae ohumala emyaaka emia chidatu (300), mani haandi yeebula abaana baandi abasyaani neende abahaana.

²³Enoka yayiindira ohumala emyaaka emia chidatu neende amahumi kasasaaba neende kitaanu (365).

²⁴Enoka yakeenda neende Nasaae ohwoola lu yakotao Nasaae n'amutusireo sa n'atamwiitire.

²⁵Metuseela yayiindira ohumala emyaaka emia ndala neende amahumi kataanu-na-kadatu neende kitaanu-na-kibiri (187), mani yeebula Lameki.

²⁶Metuseela n'amalire ohwiibula Lameki, yayiindira ohumala emyaaka emia chitaanu-na-chibiri neende amahumi kataanu-na-kadatu neende kibiri (782), mani haandi yeebula abaana baandi abasyaani neende abahaana.

²⁷Metuseela yayiindira ohumala emyaaka emia chitaanu-na-chine neende amahumi kasasaaba neende kitaanu-na-kine (969).

²⁸Lameki niyayiindira ohumala emyaaka emia ndala neende amahumi kataanu-na-kadatu neende kibiri (182), yeebula omwaana musyaani,

²⁹mani yaamulaanga Nowa, mani yaboola ati, “Ohutula mu loba li Omwaami yabwaaba, wuno niye ochia ohutuwuluusa mu mirimo kyeefwe neende muhudidiihana hw'emihono kyeefwe.”

³⁰Lameki n'amalire ohwiibula Nowa, yayiindira ohumala emyaaka emia chitaanu neende amahumi kataanu-na-kane neende kitaanu (595), mani yeebula abaana baandi abasyaani neende abahaana.

³¹Lameki yayiindira ohumala emyaaka emia chitaanu neende chibiri neende amahumi kataanu-na-kabiri neende kitaanu-na-kibiri (777) mani yaafwa.

³²Nowa niyayiindira ohumala emyaaka emia chitaanu (500), yeebula Seemu, Haamu, neende Yafeesi.