Read saamia Ohuchaaka 50 Bible Online

Ohuchaaka 50 - saamia bible

Ohuchaaka 50

¹Yosefu yalira muno mani yaakwa hu laatang'ene mu sirifu.

²Yosefu yalagira abahalaabani bae balesi batereese omulaambo kwa laatang'ene kuhaye ohubiiya. Abasao abo mani niboomya omulaambo kwa Yakobbo.

³Bamala endaalo amahumi kane niboomyaanga omulaambo okwo. Olwohuba chino nichio endaalo chali nichadahibwa ohwoomya omulaambo. Abamisiri bamala endaalo amahumi kataanu-na-kabiri nibaliraanga Yakobbo.

⁴Nae endaalo chohu mulira nichawa, Yosefu yalomaloma neende abomu nyuumba ya omutuki wa Misiri, yaboola ati, “Mbekweeda bulaanu endi, nihoyerwa mu moni weeng'we, mulomalome eyiri omutuki wa Misiri, nimumuboolera muti,

⁵Laata yaange yandechubira n'aboola ati, ‘Mbano ndi aambi ohufwa, mu ng'ani yaange yi mweene ndeeyabira mu syaalo sya Kanani, omwo nimwo mu ochia ohusiiha.’” Bulaanu sakira hwekweeda, leha njie siihe laata; mani niimala njia ohukobola.

⁶Omutuki wa Misiri yakobolamo ati, “Chia osiihe laatao, koti lu weechuba mu moni wae.”

⁷Yosefu yacha yaasiiha laatang'ene; Abahalaabani ba omutuki wa Misiri boosi, neende abeemirisi bomu nyuumba yae, alala neende abeemirisi bomu syaalo sya Misiri boosi bachia neende Yosefu ohusiiha laatang'ene.

⁸Abomu nyuumba ya Yosefu boosi, bamwaanang'ina, neende abomu nyuumba ya laatang'ene bosi nibachia ohusiiha laatang'ene; ohumalaho abaana baabwe, ebyaayo byaabwe neende eng'oombe chaabwe nibyo ebyadoonga mu syaalo sya Goseni.

⁹Ebigaari alala neende abeerusi b'efaraasi boosi bachia neende Yosefu ohusiiha laatang'ene. Syali esidiiyiha sihoongo muno.

¹⁰Niboola abuundu w'ohuwuuliramo engaano owa Atadi, ali n'obitiire Yorodaani, mani nibahubbira ao embuungu y'amaani muno, nibaba neende esibeera siingi muno. Yosefu mani yalira laatang'ene endaalo chitaanu-na-chibiri.

¹¹Nae Abakanani, abeene loba nibabona ohulira hwali Atadi yibawuulira engaano koti lu hwali, baboola bati, “Huno hulira hw'amaani muno eyiri Abamisiri.” Sakira abuundu ao alaangwa mbwe Abbeli-Misiraimu; ali noobitire Yorodaani.

¹²Mani abaana bae bamuholera koti lu yabalagira.

¹³Olwohuba abaana bae bamukiinga bamuyira mu syaalo sya Kanani, mani nibamusiiha mu ng'uungu yali mu mukuunda kwa Makipela, okuli ebukwe wa Mamure, ku Abburahamu yakula ohutula hu Efirooni Omuhiiti, mani kwaaba abuundu w'ohusiihangao abaandu.

¹⁴Yosefu niyamala ohusiiha laatang'ene, yakobolayo e Misiri, alala neende bamwaanang'ina, neende abaandu boosi ba yachia nabo ohusiiha laatang'ene.

¹⁵Nae bamwaanang'ina nibabona bati laata yaabwe amalire ohufwa, baboola bati, “Wiichuhana Yosefu yatwekaluuhanira, yachaaka ohutusyuula, mani niyetuunga hulw'ebibi byoosi bi hwamuhola.”

¹⁶Mani nibatumira Yosefu emboosi nibaboola bati, “Laatao n'asisiiri ohufwa yatulagira n'aboola ati,

¹⁷‘Muboolere Yosefu muti, hwekweeda, leheramo bamwaanamao omusaango neende esyonoono syaabwe, olwohuba bahuholera esiindu sibi muno.’ Bulaanu, huhwekweeda, leheramo omusaango kw'abahalaabani ba Nasaae wa laatao.” Yosefu yalira muno nibali nibalomaloma nae.

¹⁸Bamwaanang'ina bakwa mu moni wae, mani baboola bati, “Bona, efwe huli abawaambe bao.”

¹⁹Nae Yosefu yababoolera ati, “Mutatya daawe, ese haba siinyala ohweeberesa oluyaali lwa Nasaae.

²⁰Eng'we mwadaha ohuuholaho esibi; nae Nasaae naadaha situlemo esiindu silai, esy'ohuwonia obulamu bw'abaandu baangi, koti lu bali buti.

²¹Mani mutatya daawe; njia ohubaliinda, eng'we alala neende abaana beeng'we.” Mani Yosefu naboomiisa haandi naabagumia emyooyo.

²²Yosefu yemeeda ohumenya mu syaalo sy'e Misiri alala neende abomu daala lyae. Yosefu yafwa n'ali neende emyaaka emia ndala neende ehumi (110).

²³Yosefu yayiindira hu syaalo mani yaabona abaana ba Yifuraimu neende abeechuhulu bae. Abaana ba Makiri, omwaana wa Manaase bosi Yosefu yabaleraho.

²⁴Mani Yosefu yaboolera bamwaanang'ina ati, “Mbano ndi aambi ohufwa, nae Nasaae achia ohuba aambi naang'we, mani achia ohubatusa mu syaalo sino, abayire mu syaalo si yechubira eyiri Abburahamu, eyiri Yisaka, neende eyiri Yakobbo.”

²⁵Yosefu mani yeechubira eyiri abaana ba Yakobbo n'aboola ati, “Nasaae achia ohuba naang'we, mani mwahakiinge amakuumba kaange mukatuse mu syaalo sino.”

²⁶Yosefu yafwa naali neende emyaaka emia ndala neende ehumi (110). Boomya omubiri kwae, mani baakuta mu sanduuku mu Misiri.