Read saamia Ohuchaaka 6 Bible Online

Ohuchaaka 6 - saamia bible

Ohuchaaka 6

¹ Abaandu nibeebulana bemeeda ohuba abaangi hu syaalo, haandi nibeebula abaana bahaana,

²abaana basyaani ba Nasaae nibabonaho sa bati, abahaana b'abaandu babonehana ohuba abalai muno; mani nibachaaka ohubukulamo abaandi nibabadeehya koti lubadahaanga.

³Mani Omwaami n'aboola ati, “Haba siinjia hufukiirira abaandu ohubaao endaalo choosi daawe; bachia ohubechaanga abafwa sa. Ohutula buti ohwemeeda mu moni, haba sibachia huyiindiraanga ohubitaanga emyaaka emia ndala neende amahumi kabiri daawe.”

⁴ Mani mu ndaalo echo, neende mu ndaalo chiindi chaloondaho choosi, kyaliwo kirahula hu syaalo ki baana basyaani ba Nasaae beebulaanga mu bahaana b'abaandu. Bano nibo abali abaandu bahunuufu haandi abamanyihana muno mu ndaalo ehale echo.

⁵Nae Omwaami niyabona obubi bwa buli muundu hu syaalo koti lu bwali neende koti ebibaaso byaabwe byali ebibi buli siha,

⁶yabona obubi muno yeeyichulisa esyakera yaloonga abaandu yaabata hu syaalo.

⁷Omwaami mani yaboola ati, “Njia ohusihirisa abaandu bandaloonga boosi bawe hu syaalo, alala neende esolo choosi neende amayoni koosi, olwohuba ndeyichulisa lwasiina ndabiloonga.”

⁸Nae Nowa yaba omuluungifu mu moni w'Omwaami.

⁹Luno nilwo olukano ludiira hu Nowa. Nowa yali omuundu muluungifu muno, otaalihooho esibi syoosi mu luse lwae. Nowa yakeendaanga neende Nasaae.

¹⁰Nowa yali neende abaana basyaani badatu, Seemu, Haamu, neende Yafeesi.

¹¹Bulaanu, esyaalo syali nisiichuulemo obuliichaki mu moni wa Nasaae, haandi obusuku bwali bweechula mu syaalo syoosi.

¹²Nasaae yabona ati, esyaalo syali esiliichaki haandi buli siindu esyali hu syaalo syoosi syali esiliichaki.

¹³Mani Nasaae yaboolera Nowa ati, “Ndi omumaliirifu ohusihirisa abaandu boosi hu syaalo olwohuba abaandu bohu syaalo boosi bali beechuulemo obusuku; bona, mbao njia ohubasihirisa boosi alala neende esyaalo.

¹⁴Mani ewe webaachire elyaato niwehoonyera embaao ndai muno. Yoombahamo ebiseenge mani obiwomeho ewula mukati neende humukulu.

¹⁵Yino niyo engeri yoochia ohulibaachiramo: Obuleeyi bw'elyaato elyo buchia ohuba emiita emia ndala neende amahumi kadatu-na-chidatu (133), obubaambali buchia ohuba emiita amahumi kabiri-na-chibiri, nae obuleeyi ohuniina aakulu buchia ohuba emiita ehumi-na-chidatu.

¹⁶Yoombahiraho esirama nooleha endekeyi cha seetimiita amahumi kane-na-chine, taaho omulyaango mu lubafu lulala lw'elyaato elyo. Haandi yoombahamo egoroofa chidatu, eyaamberi, eyohubiri neende eyohudatu.

¹⁷Olwohuba bona, njia ohuleeta amaachi k'ofwomboole hu syaalo ohusihirisa buli siindu silamu siyeera esiri aasi w'ekulu; buli siindu siri hu syaalo syoosi sichia ohufwa.

¹⁸Nae njia ohutao endagaano akatikaati waange naawe; mani ewe ochia ohwiingira mu lyaato elyo, ewe neende abaana bao, omuhasi wao, abahasi b'abaana bao abali alala naawe.

¹⁹Nae hu buli siindu silamu, ochia ohudolaangaho bibiri-bibiri, esisaacha neende esihasi, mani obite mu lyaato obiliinde biwonere alala naawe.

²⁰Mu buli mayoni ka buli ngeri, haandi mu bisolo bya buli ngeri, neende ebiindu byambaaka bya buli ngeri, ochia ohudolaangamo bibiri-bibiri obiwonie.

²¹Bukula buli syohulya sy'engeri yoosi mani osibiihe; ebyo nibyo ebichia ohuba ebyohulya byeeng'we alala neende ebiindu byoosi ebiri mu lyaato.”

²²Nowa yahola buli siindu si Nasaae yamulagira ohuhola.