Read saamia Ohuchaaka 7 Bible Online

Ohuchaaka 7 - saamia bible

Ohuchaaka 7

¹Ao Omwaami yaboolera Nowa ati, “Yingira mu lyaato, ewe neende abomu nyuumba yao, olwohuba mbweene endi mu syaalo syoosi, ewe niiwe omuluungifu mu moni waange.

²Bukula ebisolo byalabiswa bibiri-bibiri amahabi kataanu-na-kabiri esisaacha neende esihasi ebya buli ngeri neende ebisolo bibiri-bibiri eby'omusiro, esisaacha neende esihasi,

³haandi bukula amayoni kabburuha kabiri-kabiri amahabi kataanu-na-kabiri kosi, esisaacha neende esihasi, okawonie kabe hu syaalo.

⁴Olwohuba mu ndaalo chitaanu-na-chibiri ohutula buti, njia ohulehuula efula yikwe hu syaalo endaalo amahumi kane, neende ebiro amahumi kane; mani buli siindu silamu syoosi si ndaloonga njia ohusisihirisa situle hu syaalo.”

⁵Nowa yahola buli siindu si Omwaami yamulagira.

⁶Nowa yali neende emyaaka emia chisaasaba eky'obuhuluundu (600) amaachi k'ofwomboole nikakwa hu syaalo.

⁷Nae Nowa neende abaana bae neende omuhasi wae, neende abahasi b'abaana bae abali alala nae beengira mu lyaato, ohuwona amaachi k'ofwomboole.

⁸Mu bisolo byalabiswa, neende mu bisolo eby'omusiro, neende mu mayoni neende mu buli siindu esyambaaka hu loba,

⁹bibiri-bibiri, esisaacha neende esihasi, byeengira mu lyaato neende Nowa koti lu Nasaae yali alagiire Nowa.

¹⁰Mani endaalo chitaanu-na-chibiri nichabitao, amaachi k'ofwomboole kachaaka ohubbwomooha hu syaalo.

¹¹Nowa niyoosa emyaaka emia chisaasaba (600) eky'obuhuluundu, mu mwoosi kwohubiri, hu ludaalo lwa ehumi na chitaanu-na-chibiri olw'omwoosi, hu ludaalo olwo esulo ch'amaachi choosi cheekuha chahulukusa haandi neende amaachi k'aakulu muukulu kosi keekuha mani nikabbwomooha.

¹²Efula yakwa hu syaalo ohumala endaalo amahumi kane neende ebiro amahumi kane.

¹³Ludaalo lweene olwo, Nowa neende abaana bae badatu Seemu, Haamu neende Yafeesi, neende omuhasi wa Nowa neende abahasi badatu b'abaana ba Nowa abali alala nabo beengira mu lyaato.

¹⁴Bano neende buli sisolo sy'engeri yoosi, neende ebyaayo by'engeri yoosi, neende buli syambaaka sy'engeri yoosi hu syaalo, neende buli yoni ly'engeri yoosi, neende eyoni lya buli ngeri.

¹⁵By'engira mu lyaato alala neende Nowa, bibiri-bibiri bya buli siindu silamu esiri hu syaalo.

¹⁶By'engira mu lyaato esisaacha neende esihasi bya buli siindu, by'engira koti lu Nasaae yali alagiire Nowa; Omwaami mani n'amwiikaliramo.

¹⁷Amaachi k'ofwomboole kemeeda ohubbwomwooha hu syaalo endaalo amahumi kane, amaachi kemeeda ohwiingiya hu syaalo mani elyaato lyachaaka ohubeenga hu maachi.

¹⁸Amaachi kadoong'a nikemeeda ohumira esyaalo; nae elyaato lyabeenga hu maachi.

¹⁹Amaachi kadoong'a nikechulana hu syaalo, kaamira kata neende engulu ndeeyi muno echali hu syaalo syoosi.

²⁰Amaachi kemeeda sa ohwiichula ohwoola lu koola aambi w'emiita chitaanu-na-chibiri aakulu w'engulu choosi.

²¹Buli siindu silamu syali hu syaalo syafwa: Amayoni, ebyaayo, ebisolo byomu siino, buli siindu siloonge esyali hu syaalo, neende buli muundu.

²²Buli siindu syohu syaalo esyali esilamu nisiyeera syafwa.

²³Nasaae yasihirisa buli siindu silamu esyali hu syaalo syoosi, abaandu neende ebisolo neende ebiindu byambaaka neende amayoni kabburuha; bino byoosi byasihiriswa byaawa hu syaalo. Ohutusaho Nowa yeeng'ene niye owadoong'ao neende abo abali nae mu lyaato.

²⁴Amaachi kadoong'a hu syaalo ohumala embaka y'endaalo emia ndala neende amahumi kataanu (150).