Read saamia Ohuchaaka 8 Bible Online

Ohuchaaka 8 - saamia bible

Ohuchaaka 8

¹Nasaae yechulisa Nowa neende ebisolo byoosi neende ebyaayo byoosi, ebyali nae mu lyaato. Nasaae yaleeta omuyaka kw'amaani ohuwuucha hu syaalo amaachi kaachaaka ohuhama.

²Esulo ch'amaachi ech'aasi neende amaachi katula aakulu muukulu kosi kachaaka ohwaakama, mani efula niyaakama ohukwa.

³Amaachi kemeeda ohuhama nikawa hu syaalo. Endaalo emia ndala neende amahumi kataanu (150) nichawa, amaachi kali kachaakire ohuhama hu syaalo.

⁴Nae mu mwoosi kwohutaanu-na-kibiri, hu ludaalo lw'ehumi neende chitaanu-na-chibiri, elyaato lyachia lyegeeng'a hu lugulu lwa Araraati.

⁵Amaachi kemeeda ohuhama ohwoola mu mwoosi kw'ehumi; hu ludaalo lutaangira mu mwoosi kw'ehumi, engulu chachaaka ohubonehana.

⁶Endaalo amahumi kane nichawa, Nowa yeekulao edirisa lyohu lyaato,

⁷mani yaalehuula eyoni lilaangwa “ehoofwa”, lyaabburuha nilichia haandi nilikobola, ohwoola lu maachi kahamira hu syaalo.

⁸Nowa yalehuula eyoni lilaangwa “eguugu” ohuchia ohubona amaachi nikahamire.

⁹Nae haba silyanyoola abuundu woosi owohukwa mani nilikobola eyiri elyaato olwohuba amaachi kali nikasisiiri hu syaalo. Nowa yatusa omuhono erwaanyi w'elyaato mani yaadiira eguugu elyo yaaliingisa mu lyaato.

¹⁰Nowa haandi yaliinda endaalo chiindi chitaanu-na-chibiri ohubitao, haandi yaatuma eguugu ohutula mu lyaato.

¹¹Mani eguugu nilikobola engoloobe, nae bone, lyali nilikiingire hu munwa esaga ly'omuseituuni ebisi. Ao Bulaanu Nowa yamanya ati, amaachi kali kamalire ohuhama hu syaalo.

¹²Nowa yaliinda endaalo chiindi chitaanu-na-chibiri ohubitao; haandi yaatuma eguugu ohutula mu lyaato. Ehabi lino, eguugu lyaakamirayo elalira lyaahaya ohukobola mu lyaato.

¹³Nowa niyoosa emyaaka emia chisaasaba neende mulala (601) hu ludaalo lutaangira lw'omwoosi kwaamberi, amaachi kahamira elalira hu syaalo. Nowa bulaanu yabwiihula esirama sy'elyaato, yaleengeesera erwaanyi. Nae bone, eloba lyoomu lyali libonehana hu syaalo.

¹⁴Hu ludaalo lw'amahumi kabiri neende chitaanu-na-chibiri olw'omwoosi kwohubiri, esyaalo syoosi syali simalire ohubalakala.

¹⁵Nasaae bulaanu yaboolera Nowa ati,

¹⁶“Tula mu lyaato, ewe neende omuhasi wao neende abaana bao neende abahasi b'abaana bao abali naawe.

¹⁷Tusa buli siindu silamu syoosi sy'oli nasyo: Amayoni neende ebisolo neende buli siindu syoosi esyambaaka hu syaalo, binyale ohwiibulanira hu syaalo, biibulane mani biiyihe hu syaalo.”

¹⁸Nowa yatula mu lyaato, alala neende abaana bae, neende omuhasi wae neende abahasi b'abaana bae abali nae.

¹⁹Ebisolo byoosi neende amayoni koosi byatula mu lyaato mu buli mikaanda kyaabyo kyeene.

²⁰Nowa yoombahira Omwaami alutaari, yaabukula hu buli sisolo syalabiswa neende hu buli yoni lyalabiswa, yaabiyaana koti ebiyaanwa bisaambwa hu alutaari eyo.

²¹Nae Omwaami niyawulira esaami yiwunya bilai eyo, yasangaala mani yaboola mu mwooyo kwae ati, “Haandi haba sindahabwaabe esyaalo ehabi liindi daawe ohweema hu biholwa by'omuundu; olwohuba ebibaaso biri mu mwooyo kw'omuundu haba si bilai ohutulira elalira mu huloongwa hwae; haandi siinjia ohusihirisa buli siloonge silamu koti luu holere endi.

²²Esyaalo nisisisiiriwo etaaka neende eekesa, esiruumbi neende etoocho, esiminyu neende omunyiti, esideete neende esiro, haba sibichia huwaao.”