Read saamia 2 Samueli 10 Bible Online

2 Samueli 10 - saamia bible

2 Samueli 10

¹Bulaanu, esiha siindi luunyuma, Omutuki Naahasi owa Abaamooni yafwa, mani omwaana wae Hanuni yaaba omutuki mu bweyaango bwae.

²Omutuki Daudi yaboola ati, “Ese hoyeere ohuchia ndeekesa obwiicha bwa obutiiririrwa eyiri Hanuni, koti lu Naahasi laatang'ene yesi yaholaanga yiindi.” Daudi yatuma bawamwaanda ohuchia ohumweekesa esasaakisi lyae. Nabo niboola mu Abaamooni,

³abeemirisi b'Abaamooni baboolera omutuki oyo bati, “Ewe obeere okaala oti mbwe ni ohweema hu luyaali lwali olwa lataao, mbwe Daudi yoolere ohutuma abasaacha bano ohwiicha ohweekesa esasaakisi lyae yooli? Ngaandi haba daawe! Abatumire ohwiicha ano koti abahemeresi sa, ohulaambuula esiko sino, hu bulaanu anyale ohwiicha atuyiingire sa!”

⁴Hanuni yawaamba bawamwaanda ba Daudi abo, mani yaababekaangaho ebirefu olwaande lulala, haandi n'aheengaanga engubo chaabwe ohuchaakira mu sibuno, mani naabaseebula nibawaao.

⁵Abasaacha abo esoni chaabadiira muno mani byaabahaya ohukobola batyo engo waabwe. Daudi niyawulira esyali nisiholehaane esyo, yabalakiirisira emboosi yiboola yiti badoong'e sa mu Yeriko, mani batateemaho ohukobola engo eyo ohwoola lu birefu byaabwe birihulira haandi.

⁶Abaamooni bano bamanya bati bamalire ohuhola Daudi ohubeera elalira omusuku waabwe, mani bapaangisa abasaacha balwaani ba Siria elifu amahumi kabiri (20,000) amalaamba ohutula mu Bbeterehoobbu neende mu Soobba, abasaacha elifu ehumi neende chibiri (12,000) enaamba ohutula mu Tobbu, haandi omutuki wa Maaka nae neende abasaacha elifu ndala (1,000) enaamba.

⁷Daudi niyawulira atyo, yatuma Yoabbu ohubaseeta n'achia neende eye lyoosi.

⁸Abaamooni bano bahuumba baatula erwaanyi mani baachia bediirira obweyaango bwaabwe bw'ohulwaaniramo mu mulyaango kwiingira mu Rehobbu, esiko syaabwe sihuluundu, nae abaandi, Abasiria alala neende abasaacha baandi ohutula mu Tobbu neende mu Maaka, beliindira mu syaalo silafu peengere.

⁹Nae Yoabbu yabona ati awuundi, amaye masuku kanyala ohumuseeta nikatulira emberi wae, nae akaandi nikatulira emukoongo wae, mani nae yedooleramo Abaisiraeli balwaani bahiramo obulai, mani naamala naabata mu bweyaango butingaalire Abasiria.

¹⁰Yatekeha abalwaani bae badoong'ereo mu bunyala bwa Abbisai mwanaang'ina, owachia yaabatekeha abuundu atingaalire Abaamooni.

¹¹Bulaanu Yoabbu yamuboolera ati, “Ewe noobona oti Abasiria bali koti abali ohuhuyiingira, wiicha mani wahoonyaho, nae Abaamooni nibaba nibali koti ohuhuyiingira, ese syesi mba ndeecha mani huhoonye.

¹²Yomiira mani ogume omwooyo! Leha hulwaanire abaandu beefwe neende amaani koosi, haandi neende hulw'ebiko bya Nasaae weefwe. Mani ohudaha hwa Nasaae mweene huhoya hwaaba nihwo ohuholehana!”

¹³Yoabbu neende abasaacha bae batula ohuchia ohuseeta, nae Abasiria nabo beeyiruhira sa.

¹⁴Abaamooni nibabona Abasiria nibeeruha nibawaao, bosi bachaaka sa ohwiiruha Abbisai mani nibeseendera mu siko syaabwe. Yoabbu yakobola engo naatula mu hulwaana neende Abaamooni, naamala n'akobolayo mu Yerusalemu.

¹⁵Abasiria bamanyira elalira bati hane bamalire ohuyiingirwa neende Abaisiraeli, mani nibalaangana nibahung'aania alala amaye kaabwe koosi.

¹⁶Omutuki Hadadeseri yatuma yalaanga Abasiria abali nibasisiiri hu lwaande lw'ebukwe w'Omwaalo kwa Ewufuraate, mani nibeecha mu Helaamu aasi w'obunyala bwa Sobbaki, owali naahulira eye lya Omutuki Hadadeseri owa Soobba.

¹⁷Mani haandi Daudi niyawulira atyo, yesi yahung'aania amaye ka Yisiraeli akali nikali engereha w'Omwaalo Yorodaani, mani nibahuumba nibachia mu Helaamu, yi Abasiria bali nibediriire obweyaanga bwaabwe nibamutingaalire. Ohulwaana hwachaaka,

¹⁸Abaisiraeli beerusa Abasiria nibabakobosa enyuma. Daudi alala neende abasaacha bae beeta abeerusi b'ebigaari by'efaraasi emia chitaanu-na-chibiri (700), haandi neende abalwaaniraanga hu faraasi elifu amahumi kane (40,000), haandi baanyala ohunyaala Sobbaki, omusuku muhoongo, owafwiira mu biita bweene omwo.

¹⁹Abatuki bali nibali aasi wa Hadadeseri nibamanya bati hane bamalire ohuyiingirwa neende Abaisiraeli, batekeha abeeo omuleembe nabo, mani haandi bafukiirira ohuba aasi waabwe. Abasiria batiira elalira ohuhoonyaanga Abaamooni.