Read saamia 2 Samueli 15 Bible Online

2 Samueli 15 - saamia bible

2 Samueli 15

¹Luunyuma lwasino ohuwa, Abbusalomu yetekehera esigaari sy'efaraasi, alala neende efaraasi, alala neende abagoobi abasaacha amahumi kataanu amalaamba.

²Yasiingiraanga echuli-chuli muno yachichaanga mani niyeema aambi neende engira ena siruwa sy'esiko. Buli muundu yeesi yeechaanga yoola abweene ao, naali neende omusaango kwoosi, naadaha omutuki amukayeenge, Abbusalomu yamulangaanga mani amuteeba yi yabeechaanga naatula. Omuundu oyo niyamalaanga ohumuboolera enono yi yalichiingi naatulamo,

³Abbusalomu yaboolaanga ati, “Bonaho, byooli ohwekanyiirisa bilai sa haandi byadyeeri; nae abulao oyo yeesi owateebwao neende omutuki ohutekeeresaanga omusaango kwao daawe.”

⁴Haandi yamedaangaho ati, “Mba mbwe ni neese omukayi! Buli oyo yeesi owahabeerenge neende omusaango, oba syaadaha syoosi, yahechereenge yi ndi sa, mani muheengera koti lu biba nibihoyera.”

⁵Omuundu yeesi niyachichaanga eyiri Abbusalomu ohwiinama mu moni wae, Abbusalomu yatulaangayo amudiira, mani amukwa mu sirifu.

⁶Abbusalomu yaholaanga atyo buli Muisiraeli yeesi, owechaanga eyiri omutuki ati bamuwosese omusaango, mani naanyala ohubaholaanga nibamwiisamo oluyaali muno.

⁷Luunyuma lw'emyaaka kine ohuwa, Abbusalomu yaboolera Omutuki Daudi ati, “Omuhuluundu, ndehe njie mu Hebburoni mani njoserese esisuubise si ndahola eyiri Omwaami.

⁸Koti lu ndali nindamenya mu Gesuri mu Siria, ndasuubisa Omwaami endi naalinyala ohuungobosa mu Yerusalemu, mba ndahachie ndamwiinamiraho mu Hebburoni.”

⁹Omutuki oyo yaboola ati, “Ewe weweereo sa mu muleembe.” Abbusalomu yawaao yaachia mu Hebburoni.

¹⁰Nae omutuki oyo yatuma bawamwaanda baachia mu nono choosi echa Yisiraeli ohuboola bati, “Nimwiicha mani mwaawulira ekono ly'eturumbete nilyuubba, nimwehuuma muti, ‘Eng'we mbao Abbusalomu yeeholere omutuki wa Hebburoni!’ ”

¹¹Nae yaliyo abasaacha emia chibiri abali nibalaangirwe ohutula mu Yerusalemu nibachiire nae; haba sibali nibamanyireho esiindu syoosi esidiira hu luhobo olwo, mani nibachiire sa neende omwooyo mulai batyo.

¹²Abbusalomu niyali mbwe hu ayaanayo ebiyaanwa byae, haandi yachia mu siko sya Giilo esy'Ahitofeeli, owali naali mulala hu abakeraki ba Omutuki Daudi. Olukwe lwali niluchooma omutuki oyo lwanyoola amaani amaangi muno, mani abaloondi b'Abbusalomu bemeeda mu buungi.

¹³Bulaanu, wamwaanda wuundi yaboolera Daudi ati, “Mbao Abaisiraeli bali bulaanu ohweeyamaanga ohwiisa oluyaali mu Abbusalomu!”

¹⁴Daudi yaboolera abahoongo bae boosi abali nibali nae mu Yerusalemu ati, “Eng'we, efwe huhoyere ohwaanguyaho ohutula muno, nikali mbwe hunyala ohudaha ohweeyiba ohutula hu Abbusalomu! Yanguyeho! Ataali ao, achia ohwaanguya ohwoola ano atulwaanie atuyiingire, mani anyale ohutwiita buli muundu yeesi oli mu siko muno!”

¹⁵Bosi baboola bati, “Eee, Ewe ow'Oluyaali. Efwe huli sa abeetekefu ohuhola buli siindu syoosi sy'oboola.”

¹⁶Omutuki oyo yatula yawaao, naali alala neende edaala lyae lyoosi, haandi neende abahoongo bae boosi, ohutusaho abahasi b'erwaanyi bali bae bala ehumi boong'ene, bayaleha enyuma, ohuba nibali nibo abaliindire edooho.

¹⁷Koti lu mutuki oyo alala neende abasaacha bae boosi bali hu batula mu siko omwo, beemaho aambi neende enyuumba yimaliirihayo.

¹⁸Abasaacha bahoongo bae beema nibamusibiraaneho koti abaliindi b'edooho bali nibamubita mu moni wae. Abasaacha balwaani emia chisaasaba enaamba abali nibamuloondere ohutula mu Gaati bosi bamubitaho,

¹⁹omutuki oyo yaboolera Yitaai omwiimirisi waabwe ati, “Lwasiina ewe wesi oli ohuchia naafwe? Ewe kobolayo engo mani wiihale neende omutuki muyaaha. Ewe mbao oli walukeendwa, omwiiruhi watula mu syaalo syao syeene.

²⁰Ewe mbao wahamenyaho muno hu lw'esiha sidiidi muno, mani esiindu siina syeene syahakera ese ndaahuhola wachaaka ohung'alaalaanga sa naange? Ese mweene syesi haba siimanyireho abuundu yiinjia ohuchia daawe. Ewe wekobolere sa engo alala neende abaandu bao boosi, Omwaami ahoya yaahukwiira esisa, haandi yaahuholera obweesikwa.”

²¹Nae Yitaai yakobolamo sa ati, “Ewe ow'Oluyaali, ese ndeechuba yooli mu liita ly'Omwaami endi, ese njia ohuchichaanga naawe eyo yoosi yoochia ohuchichaanga, kata neende nibichia ohudahisa ohufwa hweene.”

²²Daudi nae yakobolamo ati, “Silai! Huumba mani n'ochianakana!” Yitaai yemeeda ohuchaana nabo alala neende abasaacha bae boosi neende abaandu babaliindaanga mu madaala kaabwe.

²³Abaandu boobba wuuwi lukali muno koti lu baandu bali nibaloonda hu Daudi bali nibawaao. Omutuki oyo mani yaanyala ohwaambuha ahaalo ha Kidironi, abasaacha bae nibamuloondaho, mani alala nibatula nibachooma mu sichiimi.

²⁴Abbiataari omulaamisi yesi yali naali abweene ao, haandi alala nae yali naali neende Abaleefi, nibakiingire Esanduuku ly'Endagaano lyoolerefu. Balidwiihula aasi, mani nibahaya ohulikiinga haandi, ohwoola abaandu boosi nibali nibamalire ohutula mu siko omwo. Haandi kata neende Abbiataari omulaamisi yesi yali abweene ao.

²⁵Omutuki oyo yaboolera Sadoki ati, “Ewe bukula Esanduuku ly'Endagaano elyo mani omale olikoboseyo mu siko omwo. Nikali mbwe Omwaami ali omusaangaafu naange, ludaalo luundi aba achia ohunyala ohuleha ese haandi ngobole ndiboneho alala neende obweyaango libunamenyeengemo.

²⁶Nae nikali mbwe hane haba siyasaangaalire, silai sa, mani lehe omweene yaahole esyo syoosi syaaba niyaandahisa.”

²⁷Haandi yeemeeda ohuboolera Sadoki ati, “Bonaho, ewe bukula Ahimaasi omwaana wao wuno, alala neende Yonatani omwaana wa Abbiataari oyo, mani mukoboleyo mu siko omwo neende omuleembe.

²⁸Nae esiha syeene esyo, ese mba njia ohuliindirira ali buli syaambuhiro syoosi esy'omwaalo kuno, haandi mu sichiimi muno ohwoola lu njia ohunyoolera amakeni katula yooli.”

²⁹Sadoki neende Abbiataari babukula Esanduuku ly'Endagaano elyo mani baalikiinga baalikobosayo mu Yerusalemu, mani haandi nibamenya ebweene eyo.

³⁰Daudi nae bulaanu yaniina hu Lugulu lw'Emiseituuni n'alira; yali ali makulu-mahaya, haandi n'abwiihiriire omutwe kwae ohweekesa esibeera. Abo boosi abali nibamuloondereho bosi babwiihirira emitwe kyaabwe bosi bachaaka ohulira nae.

³¹Daudi niyaboolerwa ati Ahitofeeli yali n'amalire ohweyambaania neende ohujeema hwa Abbusalomu, yalaama ati, “Nookanya, ewe Omwaami, kaluuhania amakerako k'Ahitofeeli kabe obusiru buhaya!”

³²Daudi niyoola aakulu bweene ow'olugulu olwo, eyali niyiri abuundu w'ohulaamiranga, Husaai omwiicha wae wali omweesikwa muno, owali Omuarikiite mani n'amubukaanira naali mu ngubo chitaanduhe-tanduuhe, haandi neende edosi hu mutwe kwae.

³³Daudi yamuboolera ati, “Ewe haba soochia ohuba neende obuhoonyi bwoosi yi ndi kata neende nihuchia naawe,

³⁴nae kata katyo ewe onyala wahoonyaho nikali mbwe onyala ohuungoboleraho mu siko omwo mani waaboolera Abbusalomu oti bulaanu ewe onyala ohuba n'omuhalaabanira neende obweesikwa bweene, koti sa lu wanyalaanga ohuhalaabanira owali laatang'ene wuno. Haandi onyaleenge ohuhola esinyaliha syoosi ohuyiinganianga engeraka yoosi yi Ahitofeeli anyala ohuba naakeraka.

³⁵Abalaamisi bano, Sadoki neende Abbiataari, boombi bachia ohubeechaangao; baboolereenge buli siindu syoosi syoochia ohunyalaanga ohuwulira esiba nisiri mu dooho ly'omutuki elyo.

³⁶Abo mbao bali neende Ahimaasi neende Yonatani abaana baabwe nibali nabo aambi, mani ewe onyala waabatumaanga yiindi nibali neende emboosi choosi ch'oba n'obuusireho.”

³⁷Husaai omwiicha wa Daudi, yakobolayo engo mu siko esiha si Abbusalomu yesi yali niyooleramo mu Yerusalemu.