Read saamia 2 Samueli 2 Bible Online

2 Samueli 2 - saamia bible

2 Samueli 2

¹Luunyuma lwa bino, Daudi yateeba Omwaami ati, “Mani ndahabukula obunyala bw'ohutuka esiko kata silala siti esya Yuda?” Omwaami yamukobolamo ati, “Eee.” Haandi Daudi yateeba ati, “Siko siina syeene mani?” Omwaami nae yaboola ati, “Ngaandi Hebburoni.”

²Mani Daudi yachia mu Hebburoni, alala neende abahasi bae boombi: Ahinoamu, owali naatula mu Yesireeli, neende Abbigaili, omukerama ohutula hu Nabbali, owali naatula mu Karimeeli.

³Haandi yachia neende abasaacha bae alala neende amadaala kaabwe koosi, mani baachia baamenya mu biko byali nibyebodoohaania Hebburoni.

⁴Mani abasaacha b'e Yuda bachia mu Hebburoni baachuha amafuta hu Daudi nibamwiihasa ohuba omutuki wa Yuda. Mani Daudi niyawulira ati, hane abaandu ba Yabbesi mu Gileadi bamalire ohusiiha Saulo,

⁵yatumayo abasaacha baandi neende ehuwa lino liti: “Omwaami ahoya yaababeresa ehabi olwohuba mwekeese obutiiririrwa bweeng'we eyiri omutuki weeng'we oyo neende ohunyala ohumusiiha.

⁶Mani bulaanu, Omwaami ahoya yabakwiira esisa, haandi yababeera omweesikwa yi muli. Ese syesi njia ohubaira bulai bweene, hulw'esiholwa esyo simuholere.

⁷Mwomiire haandi mube abalulu! Saulo omutuki weeng'we nguyo amalire ohufwa, nae abaandu ba Yuda mbao bosi bamalire ohwiihasa omutuki waabwe nibamuchuhaho amafuta.”

⁸Omuhoongo w'amaye ka Saulo, Abbuneeri omwaana wa Neeri, yali n'amalire ohuwiiruha niyeewonia alala neende Yisibboseti, omwaana wa Saulo, nibamalire ohwaambuha Yorodaani niboolere mu Mahanaimu.

⁹Ebweene eyo niyo yi Abbuneeri yeehasira Yisibboseti ohuba omutuki w'esituundu sy'esyaalo silaangwa mbwe Gileadi, Aseri, Yesireeli, Efuraimu, neende Bbenjamini, mani mubwadyeeri bweene, yatuka Yisiraeli yoosi.

¹⁰Omwaana oyo yali naali emyaaka amahumi kane ak'obuhuluundu, esiha sibamwiihasiramo ohuba omutuki wa Yisiraeli, yatuka hulw'embaka y'emyaaka kibiri kyoong'ene. Nae enono ya Yuda yosi yafukiirira ohutukwa neende Daudi,

¹¹haandi yatukira Yuda mu Hebburoni ohumala embaka y'emyaaka kitaanu-na-kibiri neende esituundu.

¹²Abbuneeri neende abahoongo ba Yisibboseti bachia baatula mu Mahanaimu baachia mu siko sya Gibbeoni.

¹³Yoabbu, yi ng'ina yali Seruya, neende abahoongo ba Daudi baandi bachia baabukaananira hu diba, yi boosi bachia mani beehala aasi, omukaanda mulala hu lwaande lulala lw'ediba, haandi omukaanda kuundi hu lwaande luundi olw'ediba elyo.

¹⁴Abbuneeri yaboolera Yoabbu ati, “Leha efwe hubeeho neende abaana bayere baandi, ohutula hu buli mukaanda, beeche batubaire hooho omubayo kw'ohulwaana ebiita.” Yoabbu yesi yamukobolamo ati, “Sihoyera muno.”

¹⁵Mani abasyaani ehumi neende babiri, abeemerera Yisibboseti alala neende enono ya Bbenjamini, nibo abalwaania abasyaani ehumi neende babiri ba Daudi.

¹⁶Buli musaacha yadiraanga owaasye omutwe, mani atema owaasye oyo olugaanga muumbafu, mani boosi abasaacha amahumi kabiri neende bane bakwa nibafuumamaneho baafwa. Sakira, abuundu ao ali mu Gibbeoni yakulihwa mbwe “Esipaapi sy'Embaanga.”

¹⁷Bulaanu ebiita byaalaba byatulirao, mani Abbuneeri alala neende Abaisiraeli bayiingirwa neende abasaacha ba Daudi.

¹⁸Abaana ba Seruya badatu bosi bali nibali ebweene eyo: Yoabbu, Abbisai, neende Asaheeli. Asaheeli, owali naanyala ohwiiruha koti emboongo y'omusiino,

¹⁹yachaaka ohwiiruhania Abbuneeri, niyeeruha naamuchoomere tiiri.

²⁰Abbuneeri yoobba amahemo yaboola ati, “Oyo niye ewe Asaheeli sa?” Nae yamukobolamo ati, “Eee.”

²¹Abbuneeri yaboola ati, “Lehera ao ohuunjiruhania! Yiruhania sa omulwaani mulala, omale omunyuule syaaba naali nasyo.” Nae Asaheeli yemeeda sa ohumwoongaho.

²²Haandi ehabi lya habiri, Abbuneeri yaboola ati, “Ewe, lehera ao ohunjiruhania! Lwasiina oli ohuunjika oti hwiite? Mba njia ohweema mu moni wa Yoabbu mwaanamaao endye?”

²³Nae Asaheeli siyanyala ohulehera ao; mani Abbuneeri, niyehoonyera efumo ohumwiita makobosa enyuma, mani n'amwoosula enda, efumo lyaatulira emukoongo. Asaheeli yeehubba aasi mafumaame mani yaafwa, mani buli muundu owali niyeechere ao, yi yali n'alambaalire, yemaanga sa mani adoong'a abweene ao.

²⁴Nae Yoabbu neende Abbisai bachaaka ohukoonya Abbuneeri, mani elyuuba nilyali niliri ohukwa, boola hu sigulu sy'Ayama, esiri ebukwe wa Giya hu ngira yichiira ena sichiimi sya Gibbeoni.

²⁵Abasaacha ohutula mu nono ya Bbenjamini, bebuusa mani bebodoohania Abbuneeri haandi beehola omukaanda mulala mani beema aakulu w'esigulu esyo.

²⁶Abbuneeri yalaanga Yoabbu atuleyo ati, “Efwe huhoyere sa ohulwaakanaanga huti endaalo choosi? Ewe haba soonyala ohubonaho oti, muhumaliiriha siyicha ohubaao esiindu syoosi sihunanyoole ohutusaho ehiinda endulu yoong'ene? Efwe huli abeeho beeng'we. Wahalagire liina abaandu bao ohuleherao ohutwoongaangaho batyo?”

²⁷Yoabbu nae yamukobolamo sa ati, “Ese ndeechubira Nasaae mulamu, endi tabula ewe waalomaloma otyo, abaandu baange baba nibemeedere sa ohuboongaangaho ohwoola muchuli echuli.”

²⁸Mani Yoabbu yoobba eturumbete koti ahalolero eyiri abasaacha bae ohulehera ao ohwiiruhania Abaisiraeli; mani ohulwaana nihwaakamira ao.

²⁹Abbuneeri neende abasaacha bae bahuumba nibaambuha Ehooho lya Yorodaani, esiro syeene esyo; baambuha Omwaalo Yorodaani, mani nibamala ohuhuumbaanga ohwoola echuli yaloondaho, boola engo mu Mahanaimu.

³⁰Mani Yoabbu niyalehana neende ohwoonganaho ohwo, yabuusa alala abasaacha bae, yaabona ati ehumi neende bataanu-na-bane bali nibabulaho, n'omeeda hu Asaheeli.

³¹Abasaacha ba Daudi hane bali nibamalire ohwiitaho abasaacha b'Abbuneeri emia chidatu neende amahumi kasaasaba (360), ohutula mu nono ya Bbenjamini.

³²Yoabbu neende abasaacha bae, babukula omubiri kw'Asaheeli, mani baachia baakusiiha mu ng'ani yaabwe y'edaala mu Bbetilehemu. Bachaaka ohuhuumba esiro syoosi, nibwali hu buhya, boola engo mu Hebburoni.