Read saamia 2 Samueli 21 Bible Online

2 Samueli 21 - saamia bible

2 Samueli 21

¹Mu ndaalo ch'obutuki bwa Daudi enjala yabaao muno, eyamala emyaaka kidatu emilaamba. Mani Daudi yachia ohweteebaho eyiri Omwaami ebidiira hu njala yeene eyo, mani Omwaami yaboola ati, “Saulo neende edaala lyae lyoosi bali neende omusaango kw'ohwiita; yeeta abaandu ba Gibbeoni.”

² (Abaandu ba Gibbeoni haba sibali Abaisiraeli daawe; bali nibali omukaanda mudiidi muno okw'Abaamoori, ba Abaisiraeli bali nibasuubisa ohuliindaanga, nae Saulo yali niyateemaho ohubasihirisa hulw'esiruwi si yali nasyo eyiri abaandu ba Yisiraeli neende aba Yuda.)

³Daudi yalaanga abaandu ba Gibbeoni yaababoolera ati, “Siina syeene siinyala ohubaholera? Ese mbeere ndaha ohutuungao ebyonoono byabaholwaho, hu munyale ohuberesa abaandu b'Omwaami ehabi.”

⁴Nabo bamukobolamo bati, “Efwe obusoolo bweefwe neende Saulo alala neende edaala lyae, sibunyala ohuyenjeeswa neende efeesa oba esaabbu, oba kata sa haba sihudaha ohwiitaho Omuisiraeli kata mulala daawe.” Daudi nae yateeba ati, “Siina syeene si mudaha mbaholere?”

⁵Nabo bakobolamo bati, “Saulo yali naadahire ohutusihirisa sa, mani abuleo oyo odoong'a hoo omulamu daawe mu Yisiraeli muno mwoosi.

⁶Tubereseho abeechuhulu bae b'esisaacha bataanu-na-babiri, huchie hubamikire mu moni w'Omwaami mu Gibbeya, esiko sy'engo syeene sya Saulo, omutuki mudoole w'Omwaami.” Omutuki oyo nae yakobolamo ati, “Haanjiche mbaleete mbadiise eng'we beene.”

⁷Nae ohweema hu sisuubise syoolerefu si omweene oyo alala neende Yonatani bali nibaberesaanie, Daudi yoola ohuleha ohwiita Mefibboseti omwaana wa Yonatani, omwiichuhulu wa Saulo.

⁸Kata katyo, yaabukula Arimooni neende Mefibboseti, abaana ba Risipa omuhaana wa Aya yali niyeebulira Saulo; haandi yaabukula abaana bataanu ba Merabbu omuhaana wa Saulo, yi yali niyeebulira Adirieli omwaana wa Bbarisilai, owali Omumeholaati.

⁹Daudi yabadiisa abaandu ba Gibbeoni, ababamikira hu lugulu mu moni w'Omwaami abo boosi bataanu-na-babiri bafwiira alala batyo. Byali nibiri esiha si toocho yali niyichia ohuweeramo, muhuchaaka ekesa lya amabere masuungu, nibeetwa.

¹⁰Risipa omudya wa Saulo, omuhaana wa Aya, yehoonyera engubo ch'amagunia yaholamo esiiniha syae hu lwaanda yi milaambo ekyo kyali nikiri, mani naamenya abweene ao ohutulira elalira muhuchaaka hw'ekesa ohwoola efula y'esiha sibafu yachaakira ohukwichaanga. Esideete yakayiraanga amayoni katoola hu milaambo, nae esiro yakikairiraanga ohuliibwa neende ebisolo biteende.

¹¹Daudi niyawulira bi Risipa yali n'aholere,

¹²yachia yaabukula amakuumba ka Saulo neende aka Yonatani omwaana wae yaakatusa hu baandu ba Yabbesi mu Gileadi. (Bali nibakeeba ohutula mu sipaapi sya buli muundu esyali mu Bbetisani, yi Abafilisiti bamikira emilaambo ekyo hu ludaalo lu beeteraho Saulo hu Lugulu lwa Gilibboa.)

¹³Daudi yabukula amakuumba ka Saulo neende Yonatani, haandi yabuusa alala amakuumba k'abasaacha bala bataanu-na-babiri abali nibamikwa.

¹⁴Basiiha amakuumba ka Saulo neende Yonatani mu ng'ani ya Kisi, laatang'ene Saulo, mu Sela mu situundu sya Bbenjamini, nibahola byoosi bi mutuki yali n'alagiire. Mani ebyo nibyawa, Nasaae yakobolamo amasaayo kaabwe akadiira hu syaalo esyo.

¹⁵Yabaayo haandi ebiita biindi, akatikaati w'Abafilisiti neende Abaisiraeli, mani Daudi alala neende abasaacha bae bachia baalwaana neende Abafilisiti. Mu biha by'ebiita biindi, Daudi yajoong'a muno.

¹⁶Kurahula kulala okulaangwa mbwe Yisibbibbenobbi, okwali nikukiingire efumo ly'omugasa elyali niliri neende obusito bw'ekiloguraamu chidatu neende esituundu, haandi okwali nikweeboyereho olugaanga luyaaha, kwecha kwakaala kuti kunyala ohwiita Daudi.

¹⁷Nae Abbisai omwaana wa Seruya yahoonya Daudi ohuseeta rahula okwo, mani yakwiita. Daudi yasuubisa abasaacha bae ati, haandi s'alichia nabo mu biita biindi daawe. Nabo baboola bati, “Ewe niiwe esuubi lya Yisiraeli, mani haba sihudaha huhufwiirwe daawe.”

¹⁸Bino nibyawa, haandi yabaao ebiita biindi neende Abafilisiti mu Gobbu, mu Sibbekai ohutula mu Huusa yeeterao kurahula kwali nikulaangwa Safi.

¹⁹Yabaao haandi ebiita biindi neende Abafilisiti mu Gobbu, mani Elihanani omwaana wa Yairi ohutula Bbetilehemu yeetera Goliati mu Gaati, yi fumo lyae lyali neende olubaango lwali oluhomefu koti omusaala kw'amanakaasi.

²⁰Yabaao haandi ebiita biindi mu Gaati, eyali rahula kuundi okwali nikwaheera ohulwaanaanga. Kwali neende enjala chisaasaba hu buli syaaba, haandi neende enjala ch'amakulu chisaasaba hu buli sikala sy'ohukulu.

²¹Kwachalaasa muno Abaisiraeli, mani Yonatani, omwaana wa Saama mwaang'ina Daudi, yakulwaania yaakwiita.

²²Kino kyoosi kyali ekiichuhulu kya kirahula kya Gaati, kyeetwa neende Daudi alala neende abasaacha bae.