Read saamia 2 Samueli 22 Bible Online

2 Samueli 22 - saamia bible

2 Samueli 22

¹Omwaami niyawonia Daudi ohutula hu Saulo, haandi neende hu basuku baandi, Daudi yeembera Omwaami olweembo luno:

²Omwaami niye omuliindi waange; oyo niye olukaka lwaange lwomiifu.

³Nasaae waange niye omuliindi waange, mani ni ndi nae mba ndi mu muleembe. Oyo yaangairira koti engabo; yanwaanirira mani yaniinda mu muleembe. Oyo niye omuwonia waange; oyo yanwaanilira, haandi yamonia ohutula hu bwaalaba.

⁴Ese nangaanga Omwaami, mani yaamonia ohutula hu basuku baange. Fumia Omwaami!

⁵Efwiinda ch'ohufwa chali nichiindebodohaanie; efwiinda ch'omusihiriro chaambitaho.

⁶Amasira k'ohufwa kali nikaandebodohaanie, eng'ani nayo yali niyiindekere omuteego.

⁷Mani ni ndi mu bidinyu omwo ndalaanga Omwaami; Ndalaanga Nasaae waange yahoonye. Niyali naali mu nyuumba yae, yawulira ekono lyaange; yatekeeresa amaliro kaange k'ohuhoonywa.

⁸Mani esyaalo syateenga syaadengaana; emisiingi ky'ekulu kyaaduluhana mani kyachwiila olwohuba Nasaae yali n'anyoleere!

⁹Omwoosi kwaniooha nikutula mu moolu kae, enjeserye chimamula alala neende amaanda kang'eng'eerere byatulira mu munwa kwae.

¹⁰Yataandula ekulu lyeekuha mani yeeha, naali neende esireesi simali esyali aasi w'amakulu kae.

¹¹Yabburuhira bwaangu hu mbaya hu omukerubbi wae; yakeendera hu mbaya ch'omuyaka.

¹²Yebwiiha esiirima; amaleesi madiraanu, akeechuulemo amaachi, kali nikamweebodohaanie;

¹³amaanda kang'eng'eerere katusira enjeserye mu mesu chali nichimwiimiriire.

¹⁴Omwaami yaduluhanira muukulu, mani ekono lya Nasaae w'Obunyala lyawuliirihana.

¹⁵Yalasa obusaale bwae mani bwaasalaania abasuku bae; neende ohumyeesuha hw'olumesu, yaboongaho embiro.

¹⁶Olwaalo lw'enyaanja lwoomerera kurururu, haandi emisiingi ky'esyaalo kyabwiihulwaho Omwaami niyanyekaanga abasuku bae haandi yabaalabira neende etima.

¹⁷Omwaami yeyeneeresa ohutula aakulu mani yaandiira; yaanyinulula ohutula mu lusiba lw'amaachi.

¹⁸Yaanunula ohutula eyiri abasuku baange b'amaani haandi ohutula eyiri abo abasyuula, bali ab'amaani ohuuhira.

¹⁹Nindali ni ndi mu bidinyu, baseeta, nae Omwaami yanwaanira.

²⁰Yahoonya ohutula mu masira; yaamonia olwohuba yali niyasaangaalira.

²¹Omwaami yamberesaanga esisiimo olwohuba ese holaanga ebihoyera; Yambeechaanga ehabi olwohuba ese mbulaho omusaango.

²²Ese funihiraanga amalako k'Omwaami; ese haba sindakabuhanaho neende Nasaae waange daawe.

²³Ese njoseresaanga amalako kae koosi; ese haba sinjeemeraangaho ebilagiro byae daawe.

²⁴Amanyire ati ese mbulaho esyonoono syoosi, ati ese ndeliinda obutaholaho esyonoono syoosi.

²⁵Mani sakira yamberesaanga esisiimo olwohuba ese holaanga ebihoyera, olwohuba amanyire ati, ese mbulaho omusaango.

²⁶Ewe Omwaami, oli omweesikwa eyiri abo abali abeesikwa yooli; haandi omulai mweene eyiri abo abali abweene.

²⁷Oli omuchweenufu eyiri abo abali abachweenufu, nae omwaalaba eyiri abo ababi.

²⁸Owonianga abo abeeyisa aasi, nae wiisa abo abeniinia.

²⁹Ewe, Omwaami, niiwe obulafu bwaange; ewe oduumusaangayo esiirima syaange.

³⁰Ewe wumberesaanga amaani ohuseeta abasuku baange haandi neende obunyala ohuyiingira obuliindi bwaabwe.

³¹Nasaae wuno, ebiholwa byae nga biichufu, emboosi chae nga ch'ohweesika! Oyo ali koti engabo eyiri abo boosi abakoonya obuliindi bwae.

³²Omwaami niye oli Nasaae yeeng'ene; Nasaae yeeng'ene niye obuliindi bweefwe.

³³Nasaae wuno niye obweyikamo bwaange bw'amaani; aholaanga engira chingeenderaho ohuba ech'endaalo choosi.

³⁴Akera ese niimba neende obweemero bwomiifu koti emboongo; yanindaanga mba mu muleembe ni ndi hu ngulu.

³⁵Yaanalisaanga ohulwaana ebiita, huunyale ohwehoonyera obuyiingo buhiramo amaani.

³⁶Ewe Omwaami, wunindaanga haandi wumonianga; obuhoonyi bwao bwakera ese ndaaba omuhunuufu.

³⁷Waniinda ndaahaya ohuwaambwa, mani haba singwichaangaho daawe.

³⁸Njiruhanianga abasuku baange mani mala mbayiingira; Haba siinyemaangaho ohwoola lu mbasihirisa.

³⁹Mbahubbaanga aasi, mani bibahaya ohusiingira beema; balambaalaanga sa mu moni waange nikabaweere.

⁴⁰Ewe niiwe owumbeechaanga amaani k'ohulwaana ebiita haandi ohuyiingira abasuku baange.

⁴¹Okeraanga abasuku baange nibaanjiruha bwiiruha; Sihirisaanga abo abasyuula.

⁴²Bakoonyaanga obuhoonyi, nae abulao onyala ohubawonia; balaangaanga Omwaami, nae haba saabakobolaangamo daawe.

⁴³Mbanyuhaanga, mani beehola koti olufu; mbaseenakiraanga koti edosi liri hu makira.

⁴⁴Waamonia ohutula hu baandu bajeemu mani womiisa obwiimirisi bwaange mu byaalo biingi; abaandu baatali nindamanya bulaanu beeholere abatukwa baange.

⁴⁵Abateende baanyinamira sa; nibaambuliraho sa nibaanjisamo oluyaali.

⁴⁶Bawaamo omwooyo mani nibateengereha nibatula mu ngoba chaabwe.

⁴⁷Omwaami wuno hane mulamu niye! Fumia omulwaanirisi waange! Laangirire obuhunuufu bwa Nasaae w'amaani owumonianga!

⁴⁸Yambeechaanga ohuyiingira abasuku baange; afwiinyiriraanga ebyaalo aasi waange

⁴⁹mani yaamonia ohutula hu baanyiima. Ewe Omwaami, niiwe owumbeechaanga ohuyiingira abasuku baange mani wungaya ohutula hu basaacha baalaba.

⁵⁰Mani sakira ese hufumisiriaanga mu byaalo biindi; hweemberaanga niihufumia.

⁵¹Nasaae aberesaanga obuyiingiri buhunuufu omutuki wae; yeekesaanga obuheeri bubitiirifu eyiri abo ba yadoola, eyiri Daudi, haandi neende abeechuhulu bae endaalo choosi pe.