Read saamia 2 Samueli 23 Bible Online

2 Samueli 23 - saamia bible

2 Samueli 23

¹Daudi omwaana wa Yese niye owali omusaacha yi Nasaae yahola yaaba omuhunuufu, haandi yi Nasaae wa Yakobbo yadoola ohuba omutuki, haandi oyo owali omufuumbusi w'enyembo nduunge echia Yisiraeli. Mani chino nicho echali emboosi chia Daudi chimaliirihayo:

²Mwooyo w'Omwaami alomalomeraanga mu ese; emboosi yae yiri hu minwa kyaange.

³Nasaae wa Yisiraeli yamala ohuboola; omuliindi wa Yisiraeli yamboolera ati: “Omutuki otuka naatakwiira, otuka naafunihira Nasaae,

⁴ali koti elyuuba liaaduha echuli-chuli yibulaho amaleesi, elyuuba likera obunyaasi bwamesamesana efula niyahamala ohukwa.”

⁵Eyo niyo engeri yi Nasaae achia ohuberesa ehabi abeechuhulu baange, olwohuba yamala ohuhola endagaano yitaakama naange, ohuwuliirisania hutalihalakwa daawe, esisuubise sitalikaluuhanisibwa daawe. Eyo niyo yi ese ndekoomba yoong'ene; eyo niyo eyichia ohuba obuyiingiri bwaange, ni Nasaae ohwoola achia ohukera byoole.

⁶Nae abaandu bataalimo obwa nasaae bali koti amawa kasukunwa sa eyale; abulao oyo yeesi onyala yakeegeeng'aho neende amahono mahaya.

⁷Ohoyere ohwehoonyera esy'ohwehoonyerwa sy'esichuma, oba efumo; nibiba bichia ohuyia biwe byoosi pe.

⁸Kano niko ameeta k'abalwaani bamanyihana aba Daudi: otaangira yali Yoseebbu Bbasebbeeti otula mu Takemooni, owali omwiimirisi wa “Badatu”; yehoonyera efumo mani yaalwaania abasaacha emia chitaanu-na-chidatu (800) mani yabeetera boosi esiha silala mu biita.

⁹Owali owohubiri mu humanyihana hu badatu abo yali Eliasaari omwaana wa Doodo, ow'enono ya Ahoohi. Oludaalo luundi omweene oyo neende Daudi balwaakania Abafilisiti abali nibebuusire alala ohulwaana ebiita. Abaisiraeli baandi boosi beeruha baakobola engo,

¹⁰nae yadoong'a n'alwaana mani yalwaania Abafilisiti ohwoola lu muhono kwae kwoomerana kwaahaya ohwefuumbulula kwalehuula olugaanga lwae. Omwaami yahira ohuyiingira huhunuufu muno hu ludaalo olwo. Mani ebyo nibyawa, Abaisiraeli bakobola yi Eliasaari yali, mani baamwaamulaho ebilwaaniso ohubitusa hu milaambo.

¹¹Owohudatu hu bamanyihana badatu abo yali Saama, omwaana wa Agee ohutula Harari. Abafilisiti bali nibebuusiire mu Lehi, eyali endalo y'eng'ooli ch'olaayo. Abaisiraeli beeruha baatula eyiri Abafilisiti,

¹²nae Saama yadoong'a n'alwaanira mu mukuunda okwo, yaakulwaanirira, mani yaanyala ohwiita Abafilisiti. Omwaami haandi yahira ohuyiingira huhunuufu muno oludaalo olwo.

¹³Aambi neende ohuchaaka esiha sya ekesa, badatu hu “b'Amahumi Kadatu” beeha baachia mu ng'uungu y'Adulaami, yi Daudi yali naali, omukaanda kw'Abafilisiti kuundi nakwo nikwoombaahe ekaambi mu Hoondo lya Refaimu.

¹⁴Esiha syeene esyo, Daudi yali naali hu sigulu syaliho olukaka, nae omukaanda kw'Abafilisiti kwali nikwingiire mu Bbetilehemu.

¹⁵Daudi mani yachaaka ohuwulira esyeyiingo sy'ohukobola engo mani yaboola ati, “Nga ndekoomba endi omuundu yeesi aba naanyala ohundeeteraho amaachi ka ohung'wa ohutula mu sulo yiri aambi neende esiruwa sya Bbetilehemu!”

¹⁶Abalwaani bamanyihana badatu bala, bachia beyiindikania baabita mu kaambi y'Abafilisiti, baachia badaya amaachi ohutula mu sulo eyo, mani nibakaleetera Daudi engo. Nae haba siyakwang'wa daawe; mu bweyaango bw'ohukang'wa, yakachuha-buchuha aasi koti esiyaanwa eyiri Omwaami

¹⁷yaboola ati, “Omwaami, ese mweene haba siinyala ndaang'wa kano maachi daawe! Mba ndi koti oyo oli ohung'wa amabaanga k'abasaacha bano abeyaanireyo obulamu bwaabwe batyo!” Mani atyo, yasira ohukang'wa. Ebyo nibyo ebyali ebiholwa by'amaani eby'abalwaani badatu bano abamanyihana muno.

¹⁸Abbisai mwanaang'ina Yoabbu (ng'inaabwe yali Seruya) yali omwiimirisi wa “Abamanyihana Amahumi Kadatu Abo.” Yalwaanisira efumo lyae abasaacha emia chidatu enaamba (300) mani yabeeta boosi baawa, mani yeehola owamanyihana muno mu “Mahumi Kadatu abo.”

¹⁹Wuno niye owali naahiramo ohumanyihana mu “Mahumi Kadatu Abo”; mani yeehola omwiimirisi waabwe, nae haba siyali niyamanyihana koti ba “Badatu Abo.”

²⁰Bbenaya omwaana wa Yehoyada ohutula mu Kabbuseeli yesi yali omulwaani wuundi owamanyihana muno; Yahola ebiholwa biingi muno ebyeekesa obululu, n'oteereho ohwiita abalwaani balulu bahunuufu babiri, Abamoabbu. Oludaalo luundi haandi yeehirira yaachia yeengira mu liina hu ludaalo lw'omunyiti, mani yeeta edalang'i.

²¹Haandi yali niyanyala ohwiita Omumisiri wuundi, owali okusaacha rahula kweene owali niyeliindiise efumo. Bbenaya yacha yaamuseeta neende esihooho, mani naamala nasihula efumo ohutula mu muhono kw'Omumisiri oyo, mani naamala namwiitira elyeene elyo.

²²Ebyo nibyo ebiholwa bilulu bya Bbenaya, owali mulala hu “Mahumi Kadatu abo.”

²³Wuno niye owali obahiramo, nae haba siyali niyamanyihana koti ba “Badatu abo.” Mani Daudi yaamuta muhwiimirira abaliindi bae boosi.

²⁴Asaheeli mwanaang'ina Yoabbu yali mulala hu Mahumi Kadatu bala; Elihanani omwaana wa Doodo owa Bbetilehemu,

²⁵Saama owa Harodi, Elika owa Harodi,

²⁶Helesi Omupaliti, Yira omwaana wa Yikesi owa Tekoa,

²⁷Abbieseeri, owa Anatooti, Mebbunai Omuhuusa,

²⁸Salimoni Omuahoohi, Maharai owa Netoofa,

²⁹Helebbu omwaana wa Bbaana wa Netoofa, Yitai omwaana wa Ribbai owa Gibbeya w'Ababbenjamini,

³⁰Bbenaya owa Piratoni, Hidai ow'amadiba ka Gaasi,

³¹Abbi-Alibbooni Omuaribbaati, Asimafeesi owa Bbahuriimu,

³²Eliabba owa Salibbooni, abaana ba Yaseni, Yonatani,

³³Saama Omuharaari, Ahiamu omwaana wa Sarari Omuharari,

³⁴Elifeleti omwaana wa Ahasibbai owa Maaka, Eliamu omwaana wa Ahitofeeli owa Giilo,

³⁵Hesiro owa Karimeeli, Parai Omuaribbi,

³⁶Yigali omwaana wa Natani owa Soobba, Bbani Omugaadi,

³⁷Seleki Omuamoni, Naharai owa Bberooti, omukiingi w'ebilwaaniso wa Yoabbu omwaana wa Seruya,

³⁸Yira Omuitiiri, Garebbu Omuitiiri,

³⁹Wuria Omuhiiti: amahumi kadatu neende bataanu-na-babiri boosi alala.