Read saamia 2 Samueli 3 Bible Online

2 Samueli 3 - saamia bible

2 Samueli 3

¹Ohulwaanakana akatikaati w'amaye kali nikakwiira edaala lya Saulo neende ako akali nikakwiira Daudi, hwahiindao muno. Kata katyo, esiha syeene esyo, Daudi yali niyemedaanga ohunyoola amaani, nae abali nibamuyiingania nabo nibemeedaanga ohukatayala.

²Mani abaana basyaani ba Daudi basaasaba bano, nibaloondehana ohweema hu hwiibulwa hwaabwe, beebulwa Daudi naali mu Hebburoni. Nibo bano mbwe: Amunooni, yi ng'ina yali Ahinoamu, ohutula mu Yesireeli;

³Kileabbu, yi ng'ina yali Abbigaili, owali omuhasi mufwiirwe wa Nabbali, ohutula mu Karimeeli; Abbusalomu, yi ng'ina yali Maaka, owali omuhaana w'Omutuki Talimai wa Gesuri;

⁴Adonija, yi ng'ina yali Hagiti; Sefatia, yi ng'ina yali Abbitaali;

⁵Yitireamu, yi ng'ina yali Egila. Abaana bano boosi beebulirwa mu Hebburoni.

⁶Mani koti lu biita byali nibichiiririra akatikaati w'amaye ka Daudi neende ako akali nikeesa oluyaali mu daala lya Saulo, Abbuneeri yesi yemeeda ohunyola obuhunuufu mu baandu bali nibakwiira Saulo.

⁷Mani ludaalo luundi, Yisibboseti, omwaana wa Saulo, yali neende omuhasi w'erwaanyi, yasitaaka Abbuneeri hulw'ohuyiranaanga neende Risipa, omuhasi w'erwaanyi wa Saulo, haandi owali omuhaana wa Aya.

⁸Sino syanyoolesa Abbuneeri muno. Mani yaateeba ati, “Ewe obaasa oti ese nyala ndaahoba Saulo? Ewe mubwadyeeri bweene obaasa oti ese ndi ohuhalaabaniraanga Yuda?” Haandi yaboola ati, “Ohutulira elalira mu njaako, ese mbeechaanga sa ni ndi aasi wa buli sichiiririrwa sya Saulo laatao, bamwaanang'ina, haandi neende abeecha bae, mani mbonaanga sa endi ewe haba siwoola wayiingirwa neende Daudi; nae ohwoola enyaanga yino ochaakire ohuumbonera obubi hulw'omuhasi wuno sa!

⁹Mani Nasaae ahoya yaahola atyo Abbuneeri, haandi ohuhiraho ao, yaaholaho obubi nitanyala ohwoseresera Daudi esyo si Omwaami mweene yamwechubira ohumuholera,

¹⁰ohukaluuhania obwaami ohubutusa hu nyuumba ya Saulo, mani naamala naata esisaala sy'obutuki sya Daudi mu Yisiraeli, haandi neende mu Yuda, ohutulira elalira hu Daani ohwoola hu Bbeerisebba.”

¹¹Yisibboseti yatya muno Abbuneeri byoola ohumuhaya kata ohutumbulaho emboosi yoosi daawe.

¹²Abbuneeri yeemao yaatuma bawamwaanda eyiri Daudi, owali esiha syeene esyo naali mu Hebburoni, ohuboola bati, “Mbwe naanu mweene ochia ohutuka esyaalo sino? Mani hola endagaano naange, mani mba njicha ohuhuhoonya oyiingire Yisiraeli yoosi yikwe mu mahono kao.”

¹³Daudi yakobolamo ati, “Eee, esyo silai muno! Njia ohuhola endagaano naawe, hu mboosi ndala yiti yoong'ene: ohoyere ohuchia mani weecha neende Mikaali omuhaana wa Saulo oyo yiindi, nooba n'ochia ohwiicha haandi wuumboneho.”

¹⁴Haandi Daudi yesi yatuma bawamwaanda baandi eyiri Yisibboseti ohuchia baboole bati, “Mani ewe wesi ngobosere Mikaali omuhasi waange oyo. Ese ndali nindamutuungiraho ebihoba bihebwa eby'Abafilisiti emia ndala, hu nyemeo nyale ohumudeehya.”

¹⁵Yisibboseti yakera omuhasi oyo yaang'uulwa hu Palitieli omwaana wa Laisi owali naali wamwe.

¹⁶Palitieli yesi yamuloondaho ohwoola hu siko sya Bbahuriimu, n'alira n'akeenda. Nae kata katyo, Abbuneeri niyamuboolera ati, “Ewe kobola sa engo wao,” yesi yawulira mani yaahola sa atyo.

¹⁷Abbuneeri yachia eyiri abahuluundu ba Yisiraeli yaababoolera ati, “Eng'we, hulw'embaka endeeyi muno, mwekoomba muno Daudi ohuba omutuki weeng'we.

¹⁸Bulaanu mbano yino niyo ehabi yeeng'we. Yichulise muti Omwaami yaboola ati, ‘Ese njia ohwehoonyera Daudi omuhalaabani waange ohununula Yisiraeli abaandu baange ohutula hu Abafilisiti, haandi neende ohutula hu basuku baabwe boosi.’ ”

¹⁹Abbuneeri haandi yaboolera abaandu b'enono ya Bbenjamini, mani yaamala atyo yawaao yaachia mu Hebburoni ohuboolera Daudi ebiindu bi baandu ba Bbenjamini neende aba Yisiraeli bali nibafukiriire ohuhola.

²⁰Abbuneeri niyoola eyiri Daudi, mu Hebburoni naali neende abasaacha amahumi kabiri amalaamba, Daudi yabaholera esidyaalo.

²¹Abbuneeri yaboolera Daudi ati, “Ese bulaanu njia ohuchia mani hole Yisiraeli yoosi yifukiirire ohuba mu bunyala bwao. Bachia ohuhufukiirira ewe ohuba omutuki waabwe, mani onyoole buli siindu syooba noodaha, haandi onyale ohutuka esyaalo syoosi ohuyirira alala.” Daudi yesi yaberesa Abbuneeri obwomiifu bw'ohumuliinda neende omuleembe, mani naamala naamuta hu ngira ohukobola ewae.

²²Luunyuma lweene, Yoabbu alala neende abahoongo ba Daudi baandi, bakobola nibatula ohuseeta, nibakiingire ebiindu bipeeye biingi muno. Abbuneeri nae, yali n'amalire ohutula mu Hebburoni alala neende Daudi, olwohuba Daudi yali n'amalire ohumuseebula namwomisiire ohuliindwa bulai.

²³Nae Yoabbu alala neende abasaacha bae niboola ango, yaboolerwa mbwe Abbuneeri yali n'amalire ohwiicha eyiri Omutuki Daudi, haandi n'amalire hale ohuseebulwa naweereo neende obwomiifu bw'ohumuliinda endaalo choosi.

²⁴Yoabbu yachia eyiri omutuki mani yaamuboolera ati, “Ewe siina syeene sino sy'oholere? Mbwe Abbuneeri yeechere yooli; nae lwasiina olehere yawaao sa atyo?

²⁵Oyo yeechere sa ano ohuhubachirisa, haandi ohubona buli siindu syoholaanga, haandi neende eyo yoosi yochiraanga. Mubwadyeeri bweene ngaandi wesi omanyire sa otyo!”

²⁶Luunyuma lwae ohutula eyiri Daudi, Yoabbu yatuma bawamwaanda baandi ohuchia ohudiira Abbuneeri, mani nibachia nibamukobosa enyuma nibamutusira hu sulo ya Sira; nae Daudi haba siyali naamanyireho atyo daawe.

²⁷Abbuneeri haandi niyoola mu Hebburoni, Yoabbu yamubukula yaamuyira endulo ena siruwa, koti odaha ohumumoonyeseraho esiindu nibali boong'ene, mani nibali niboolere ebweene eyo, yamwoosula amala. Eyo niyo engeri yi Abbuneeri yeeterwamo, mbwe hulwohuba yali naali niye oweeta Asaheeli owali mwanaang'ina Yoabbu.

²⁸Daudi niyawuliraho hu makeni kano, yaboola ati, “Omwaami niye omanyire ati abaandu baange boosi alala neende ese omweene, hubulaho omusaango kwoosi hu hufwa hwa Abbuneeri.

²⁹Esibonereso sy'ohufwa hwae syoosi, sihoya syaakwa hu Yoabbu alala neende abaandu b'edaala lyae boosi! Mu buli luse, yihoya yabeechaangayo omusaacha mulala mu daala elyo, olwaala eruumbu oba kata sa esikuhu, oba oyo onyala ohuholaanga emirimo ky'esihasi kyoong'ene, oba ochia yeeterwa mu biita, oba oyo otanyala ohunyolaanga ebimumala ohulichaanga daawe!”

³⁰Yoabbu alala neende Abbisai mwanaang'ina, beetuungira hu Abbuneeri olwohwiitira Asaheeli omwaana waabwe mu biita mu Gibbeoni.

³¹Daudi yalagira Yoabbu alala neende abasaacha bae boosi ohutaandulaanga engubo chaabwe, mani nibefwalaanga amagunia, haandi nibahola amasika k'Abbuneeri. Hu masika bweene ohwo, Omutuki Daudi omweene yagooba omulaambo okwo n'akeenda n'aloonda hu sanduuku emukoongo.

³²Abbuneeri yasiihwa mu Hebburoni, mani omutuki yaalira nachereenjesera lukali muno hu ng'ani, mani abaandu boosi baahola batyo.

³³Daudi yeembera Abbuneeri olweembo lw'amasika luti: “Abbuneeri akeenda atye yaafwa sa koti omuundu musiru?

³⁴Amahono kae haba sikali nikaboyeerwe daawe, Haandi amakulu kae kosi sikali nikaliichirwe daawe; Nae yeetwa sa koti oyo oweetwa neende abatemo!” Haandi abaandu batuunduha ohumulira ehabi liindi.

³⁵Oludaalo lwoosi, abaandu bateemaangaho ohukera Daudi alyeeho hu siindu syoosi, nae yechubaanga sa n'asuubisa ati, “Nasaae ahoya yaanjitirao sa, ese omweene ninjichuhana ndahoombaho hu syohulya syosi-syoosi, oludaalo luno nilutaawa!”

³⁶Abaandu badiira esiindu sino, mani baasaangaala. Mubwadyeeri bweene, buli siindu si mutuki oyo yaholaanga syasangasaanga sa abaandu boosi.

³⁷Abaandu ba Daudi boosi haandi neende abaandu ba Yisiraeli boosi, bamanya bati hane omutuki oyo haba siyaliho neende esiindu si yali naamanyire esidiira hu hwiitwa hw'Abbuneeri daawe.

³⁸Omutuki oyo bulaanu yaboolera abahoongo bae ati, “Eng'we haba simubonaho muti, oludaalo luno, omwiimirisi muhunuufu muno mu Yisiraeli niye ofwiire daawe?

³⁹Olwohuba, kata neende ese ni ndi omutuki wadoolwa neende Nasaae, ndi ohwewulira koti oli omujoong'u muno enyaanga yino. Obwaalaba bw'abaana ba Seruya bano buumbitiriise ese omweene. Mani Omwaami ahoya yaaboneresa abeeti bano boosi koti lu beene bahoyera!”