Read saamia 2 Samueli 7 Bible Online

2 Samueli 7 - saamia bible

2 Samueli 7

¹Omutuki Daudi yoomiira mu dooho lyae, mani Omwaami yaamuliinda endaalo choosi ohutula hu basuku bae.

²Mani omutuki wuno yaboolera omunabbi Natani ati, “Ese ano mbano ndamenya mu nyuumba yoombahwa neende embaao ch'emiseengese, nae Esanduuku ly'Endagaano ya Nasaae lyabiihwa sa mu Yeema!”

³Nae Natani yamukobolamo ati, “Ewe hola sa esyo syoosi syooli nasyo mu bibaaso, olwohuba Omwaami ali sa naawe.”

⁴Nae esiro syeene esyo, Omwaami yaboolera Natani ati,

⁵“Ewe chia oboolere Daudi omuhalaabani waange oyo oti ese ndi ohumuboolera endi, ‘Ewe haba siniiwe ohoyeere ohunyoombahira enyuumba yoohumenyamo daawe.

⁶Ohutulira elalira mu siha sindanunuliramo abaandu ba Yisiraeli ohutula mu Misiri ohwoola bulaanu buti, ese haba siimenyaangaho mu nyuumba daawe; ese ndahakeendanaanga nindamenya mu Yeema sa.

⁷Mu ngeendo chaange choosi alala neende abaandu ba Yisiraeli, ese haba sindateebaangaho omwiimirisi yeesi yindadoolaanga esyakeraanga bahaya ohunyoombahiraho enyuumba yaange ey'emiseengese daawe.’

⁸“Sakira ewe ohoyere ohuchia waboolera Daudi omuhalaabani waange oyo oti ese Omwaami w'Obunyala Bwoosi, ndi ohumubooleraanga endi, ‘Ese ndahutusa mu hwayaanga amakoondi mu mikuunda mani ndaahuhola waaba omwiimirisi wa Yisiraeli abaandu baange.

⁹Ese mweene mbereenge naawe eyo yoosi yi wanyalaanga ohwoola, mani ndaanyala ohuyiingira abasuku bao boosi buli yi wachiraanga. Mani ese njia ohuhuhola omanyihane muno koti abeemirisi bahunuufu abomu syaalo muno.

¹⁰Haandi njia ohudoolera Yisiraeli abaandu baange abuundu, mani njiche mbataakemo, banyale ohumenyaho abuundu waabwe weene, mani bahaye ohunyaaswaho kata nabudiidi; haandi abaandu baalaba bahaye ohubachuuniaho kata nabudiidi, koti lu byalichiingi hale,

¹¹ohutulira elalira mu biha bi ndadooleramo abakayi batuke Yisiraeli abaandu baange; haandi ese njia ohuhuberesa obuwuluuhiro ohulehana neende abasuku bao boosi. Haandi kata katyo, Omwaami alaangirira ewe ati, Omwaami niye ochia ohuhwoombahira ewe enyuumba.

¹²Ewe nooba noochia ohufwa, mani omale osiihwe koti bakuukao bali, ese njia ohuhola mulala hu basyaani bao ohuba omutuki, haandi njia ohuliinda obwaami bwae budoong'e nibuli obwomiifu muno.

¹³Oyo niye ochia ohuunyoombahira enyuumba yaange, mani njia ohwomiisa endi obutuki bwae obwo buchia ohwemeeda ohubeechaangao endaalo choosi pe.

¹⁴ Ese njia ohuba laatang'ene, nae omweene achia ohuba omwaana waange. Naahola esiindu sidoondobanu, njia ohumuboneresa sa koti laatang'ene muundu asaandyaanga omwaana wae.

¹⁵Nae kata katyo ese haba siinjia ohumumalaho obuhoonyi bwaange daawe, koti lu ndahola hu Saulo, yi ndoola ndaamalayo hu ewe onyale ohuba omutuki.

¹⁶Ewe ochia ohumenya ebiha byoosi nooli neende abeechuhulu, haandi njia ohuhola obwaami bwao bubeeo endaalo choosi pe. Obutuki bwao haba sibuchia ohubaaho neende enjakamo daawe.’ ”

¹⁷Natani yaboolera Daudi buli siindu syoosi si Nasaae yali namwiikuliireo ohumanya.

¹⁸Bulaanu Omutuki Daudi yachia yeengira mu Yeema ly'Ohubaao hw'Omwaami, naamala niyeehala aasi, mani nalaama ati, “Ewe Omwaami w'Obunyala bwoosi, ese haba siihoyera ebiindu bi wahamala ohuuholera, haandi neende ohuholera edaala lyaange daawe.

¹⁹Nae kata katyo mbano osyemeeda sa ohuhola ebiindi bihirao, ewe Omwaami w'Obunyala bwoosi; wamala ohuhola ebisuubise ebiingi ebidiira hu beechuhulu baange mu myaaka kiicha mu moni. Mani haandi waahola omuundu sa yaanyala ohubona sino, ewe Omwaami w'Obunyala bwoosi!

²⁰Siindu siina siindi si ese nyala ohwemeeda ohuhuboolera! Ewe wuumanyire bulai bweene, ese omuhalaabani wao.

²¹Hwali ohudaha hwao ewe omweene, haandi neende esichiiririrwa syao ewe omweene, ebyakera waahola sino; ewe wahola ebiindu bihunuufu bino byoosi hwoonyale ohuumba elyeeko.

²²Nga oli omuhunuufu muno, ewe Omwaami w'Oluyaali lwoosi! Abulao oyo yeesi oli koti ewe; haandi efwe hwali nihwamanya sa ebiha byoosi mbwe ewe niiwe oli Nasaae weeng'ene.

²³Yibulayo esyaalo syoosi esiri hu syaalo huno esiri koti Yisiraeli daawe, yi wanunula ohutula mu buwaambe ohubahola babe abao weeng'ene. Ebiindu bihunuufu neende ebiwuukisa bi wabaholera byamala ohusalaania obulai bwao mu syaalo syoosi. Werusaanga ebyaalo biindi neende banasaae baabwe, koti lu baandu bao bemeedaanga ohuchia mu moni, abaandu abo ba ewe omweene waboolola ohutula mu Misiri banyale ohuba abao weeng'ene.

²⁴Ewe wamala ohuhola Yisiraeli ohuba abaandu bao weeng'ene endaalo choosi pe, haandi ewe Omwaami, wamala ohweehola ohuba Nasaae waabwe.

²⁵“Bulaanu, Omwaami Nasaae, yoseresera ebiha byoosi, ebisuubise bi wahola ebindiiraho neende ebidiira hu beechuhulu baange, ohole buli siindu si waboola oti ochia ohuhola.

²⁶Obulai bwao buba buchia ohuba obuhunuufu bw'elalira, mani abaandu baba bachia endaalo choosi ohuboolaanga bati, ‘Omwaami w'Obunyala niye Nasaae wa Yisiraeli.’ Haandi oba ochia ohunyala ohuliinda obutuki bwaange bubeeo ebiha byoosi.

²⁷Omwaami w'Obunyala, Nasaae wa Yisiraeli! Ese ndi neende amaani kalaama nikasaba yooli, olwohuba ewe wamala ohumbwiihulira bino byoosi, ese omuhalaabani wao, haandi wamala ohumboolera oti ewe ochia ohuhola abeechuhulu baange ohuba abatuki.

²⁸“Mani bulaanu, ewe Omwaami w'Obunyala, niiwe Nasaae; wooseresaanga buli sisuubise syao, nihaandi wamala ohuuholera esisuubise siwukisa sino.

²⁹Mani ndi ohuhusaba oberese abeechuhulu baange ehabi, hu banyale ohwemeeda ohwehoyeraanga mu hubakwiira hwao. Ewe Omwaami w'Obunyala, wamala ohusuubisa sino syeene, mani ehabi chao chichia ohubeechaanga hu beechuhulu baange boosi endaalo choosi pe.”