Read saamia 2 Samueli 8 Bible Online

2 Samueli 8 - saamia bible

2 Samueli 8

¹Esiha siindi luunyuma, Omutuki Daudi yachia yaseeta Abafilisiti ehabi liindi, yaabayiingira, mani yaakamisira elalira obutuki bwaabwe hu syaalo ohwo.

²Haandi yayiingira Abamoabbu. Yahola abadiire boosi baakonaanga aasi hu buloba mani yeetaanga babiri hu buli badatu. Mani Abamoabbu beehola abatukwa bae bachaaka ohumutuungaanga omusolo.

³Haandi yayiingira omutuki w'esituundu sya Siria mu syaalo sya Sobba, Hadadeseri omwaana wa Rehobbu koti lu Hadadeseri oyo yali naali hu lukeendo lwae n'achia ohukobosao obunyala bwae hu situundu sy'esyaalo siri emukulu w'Omwaalo kwa Ewufuraate.

⁴Daudi yawaamba abalwaani b'efaraasi, elifu ndala neende emia chitaanu-na-chibiri (1,700), haandi abalwaani bohu makulu elifu amahumi kabiri (20,000). Yeelehesera efaraasi chinyala ohuhweesa ebigaari emia ndala (100), nae echadoong'ao choosi n'achinyaala.

⁵Nae Abasiria ba Damasiko nibayirayo eye ohuhoonya Omutiki Hadadeseri, Daudi yaliseeta, mani yeeta abasaacha elifu amahumi kabiri neende chibiri (22,000).

⁶Yoombaha ekaambi ch'amaye mu situundu sy'esyaalo syaabwe esyo, mani nibeehola abatukwa bae nibachaaka ohumutuungaanga omusolo. Omwaami yahola Daudi yaanyala ohuyiingiraanga buli yi yachiraanga yoosi.

⁷Mani Daudi yaanyala ohuwaamba engabo ch'esaabbu echakingwaanga neende abahoongo ba Hadadeseri, mani naamala naachiyira mu Yerusalemu.

⁸Yayira obuungi bw'omugasa ohutula mu Bbeeta neende mu Bberotai, ebiko byali nibyatukwa neende Hadadeseri.

⁹Omutuki Toi owa Hamati yawulira ati Daudi yali n'amalire ohuyiingira eye lya Hadadeseri lyoosi.

¹⁰Mani yaatuma Yoramu omwaana wae ohuchia ohuheesaho Omutuki Daudi, haandi neende ohumubuluusayo hulw'ohuyiingira Hadadeseri, yi Toi yali niyalwaaniaho amahabi maangi hale. Yoramu yayirira Daudi ebiyaanwa ebyaholwa ohutula mu esaabbu, efeesa, neende omugasa.

¹¹Omutuki Daudi wuno bulaanu yabibukula yabiyaanayo byehoonyerweenge mu hwiinamiraanga Nasaae, alala neende efeesa neende esaabbu yi yali niyatusa mu byaalo bi yali niyayiingira

¹²Edomu, Moabbu, Abaamooni, Filisiti, neende Amaleki, haandi neende esituundu siindi ohutula hu biindu bi yali ni yapeeya ohutula hu Hadadeseri.

¹³Daudi yemeeda ohumanyihana muno lu yoola yaanyala ohukobola naatula ohwiitira Abaedomu elifu ehumi neende chitaanu-na-chidatu (18,000) mu Hoondo y'Omuunyu.

¹⁴Yoombaha ekaambi ch'amaye mu Edomu mwoosi, mani abaandu bali nibamenya mu bweene omwo nibeehola abatukwa bae. Omwaami yahola Daudi yayiingiraanga buli yi yachiraanga yoosi.

¹⁵Daudi yatuka Yisiraeli yoosi mani yomiisa ati abaandu bae boosi bayirwaanga bulai muno haandi koti lu bihoyera ataali ohukwiira abaandi daawe.

¹⁶Yoabbu, yi ng'ina yali Omuseruya, niye owali omuhoongo w'eye elyo; Yehosafati omwaana wa Ahiluudi niye owali naali mu bunyala bw'ohuliinda ebyaliwo ebyandiikwa;

¹⁷Sadoki, omwaana wa Ahituubbu, haandi neende Ahimeleki omwaana wa Abbiataari nibo abali nibali koti abalaamisi; Seraya niye owali omusaati w'ekooti;

¹⁸Bbenaya, omwaana wa Yehoyada niye owali naafunaanibwa neende abaliindi ba Daudi; haandi neende abaana baandi ba Daudi baanyala ohuholaanga koti abalaamisi.