Read saamia 1 Abatuki 1 Bible Online

1 Abatuki 1 - saamia bible

1 Abatuki 1

¹Esiha sino Omutuki Daudi yali bulaanu naali omukofu muno, nae kata katyo abahalaabani bae bamubwiihaanga neende amabburuungete, haba siyanyalaanga ohubala omubiri daawe.

²Mani abahoongo bae beemao baamuboolera bati, “Ewe ow'Oluyaali, leha hunyooleyo omuhasi omuyere ati, onamenyaanga naawe, mani ahulindeenge. Achia ohukonaanga aambi naawe anyale ohuhubasaangaho omubiri.”

³Bakeenda mu Yisiraeli yoosi nibakoonya omuhaana w'esiiso, mani niboola mu Sunemu mu banyoola omuhaana wali n'alaangwa Abbisaagi, mani nibamuleetera omutuki.

⁴Omuhaana wuno yali ow'esiiso silai muno, mani yafukiirira yachia yaliindaanga omutuki oyo naamuhalaabaniraanga, nae omutuki oyo haba siyabaaho nae koti omuhasi wae daawe.

⁵Bulaanu, Adonija omwaana wa Hagiti yeniinia muno n'aboola ati, “Ese niise ochia ohuba omutuki” mani yeeholera ebigaari by'efaraasi, neende abalwaani b'efaraasi, neende abasaacha baandi amahumi kataanu abohwiiruhiraanga mu moni wae.

⁶Simwaana haba siyali niyamunyoolesaho esiha syoosi n'amuteeba ati, “Lwasiina oholere otyo haandi oti?” Haandi yali omusaacha ow'esiiso silai muno; muhwiibulana, yali akwa Abbusalomu hu mukoongo.

⁷Mani yaalomaloma neende Yoabbu (yi ng'ina yali Seruya) haandi neende Abbiataari omulaamisi, mani nibafukiirira ohusiira esichiiririrwa syae sino.

⁸Nae Sadoki omulaamisi, Bbenaya omwaana wa Yehoyada, Natani omunabbi, Simei, Rei, neende Abaliindi ba Daudi bosi haba sibali hu lwaande lw'Adoniija.

⁹Mani ludaalo luundi Adonija niyachia yayaana esiyaanwa sy'amakoondi, esurusi, alala neende emoosi chaliiswa chaakina echali hu Lwaanda lw'Enjuha, aambi neende esulo ya Enirogeeli. Yalaaliha abaana baandi b'Omutuki Daudi neende abahoongo b'omutuki abali nibatula mu Yuda beeche mu muholo kwae kw'ohuyaana ebiyaanwa ebyo,

¹⁰nae haba siyalaaliha Solomooni mwaanang'ina wuundi, kata sa neende Natani omunabbi, oba Bbenaya oba abaliindi b'omutuki daawe.

¹¹Natani yachia eyiri Bbatiseebba, ng'ina Solomooni, yaamuteeba ati, “Ewe haba sowuliireho oti Adonija omwaana wa Hagiti amalire ohweeyihasa ohuba omutuki? Nae Omutuki Daudi haba saamanyireho esiindu syoosi esidiira hu syeene sino daawe!

¹²Noodaha ohuwonia obulamu bwao, haandi neende obulamu bwa Solomooni omwaana wao oyo, ese hukerakira endi,

¹³siingiriramo mani ochie eyiri Omutuki Daudi omusabe oti, ‘Ewe ow'Oluyaali, ewe haba siwanjwichwiisa niwasuubisa oti Solomooni omwaana waange wuno niye ochia ohuhukobola mu makulu koti omutuki? Nae bulaanu siba sitye siti, Adonija niye omalire ohweehola omutuki?’”

¹⁴Haandi Natani yesi yameedaho ati, “Mani, ewe noonaba n'osilomalomaanga neende Omutuki Daudi, ese mba njia ohwiicha nyingiririremo ao mani nyomiise olukano lwao olwo.”

¹⁵Mani atyo, Bbatiseebba yeemao yeengira ohubona omutuki mu siseenge sikonwamo. Yali naali omukofu muno, mani Abbisaagi, omuhasi muhaana muyere ohutula mu Suneemu, yali naali niye owamulindaanga.

¹⁶Bbatiseebba yeecha mani yaguunama aasi bweene mu moni w'omutuki, mani omutuki yaamuteeba ati, “Siina syeene syoodaha?”

¹⁷Nae yakobolamo ati, “Ewe ow'Oluyaali, ewe waasuubisa haandi waachwichwiisa mu liita ly'Omwaami Nasaae wao oti Solomooni omwaana waange niye ochia ohuba omutuki luunyuma lwao.

¹⁸Nae Adonija amalire ohweehola ohuba omutuki, ewe nootamanyireho esiindu syoosi esisidiiraho daawe.

¹⁹Amalire ohuyaana esiyaanwa sy'esurusi nyiingi, amakoondi, alala neende emoosi nyiingi echaliiswa enginu, mani alaange abaana bao, neende Abbiataari omulaamisi, neende Yoabbu omuhoongo w'eye hu muholo okwo, nae haba salangire Solomooni omwaana wao wuno.

²⁰Ewe ow'Oluyaali, abaandu boosi aba Yisiraeli batingaalire sa ewe ohubaboolera oyo mweene ochia ohuhukobola mu makulu kao koti omutuki.

²¹Mani nootahola otyo, esiha syeene syoochia ohuba nofwiriiremo, Solomooni omwaana wao alala neende ese mweene huchia ohuyirwa koti abahobi.”

²²Yali nasiilomalomaanga atyo, ni Natani yoola mu dooho elyo.

²³Omutuki yaboolerwa ati omunabbi yali n'amalire ohwoola abweene ao, Natani yeengira mani yaguunama aasi bweene mu moni w'omutuki.

²⁴Mani yaboola ati, “Ewe ow'Oluyaali, ewe niiwe olaangiriire oti Adonija niye ochia ohuhukobola mu makulu kao koti omutuki kose?

²⁵Mani enyaanga yino, yeechere yaahola esiyaanwa sy'erusi nyiingi, amakoondi, alala neende emoosi chaliiswa chaakina. Alaliihe abaana bao boosi, Yoabbu omuhuluundu w'eye lyao, neende Abbiataari omulaamisi, mani bulaanu buti bali ohulya emideeho nibehuuma bati, ‘Ewe Omutuki Adonija Oyiindire!’

²⁶Nae haba siyandaliiheho daawe, ewe omuhuluundu, kata sa neende Sadoki omulaamisi yesi, kata sa neende Bbenaya oba Solomooni.

²⁷Ewe ow'Oluyaali, mani niiwe osiimire bino byoosi ohuba biti, nae kata n'otabooleraho abahoongo bao oyo ohoyere ohuhukobola mu makulu kao koti omutuki daawe?”

²⁸Nae Omutuki Daudi yeemao yaboola ati, “Sabaho Bbatiseebba akobole yeengireho muno haandi” mani Bbatiseebba yeecha yeema mu moni wae.

²⁹Yaboolera Bbatiseebba ati, “Ese husuubisa neende Omwaami mulamu, owanunulaanga ohutula mu madinyu kaange koosi,

³⁰endi enyaanga yino yeene, ese njia ohwooseresa esisuubise si ndahuholera mu liita ly'Omwaami, Nasaae wa Yisiraeli, endi Solomooni omwaana wao oyo niye ochia ohuungobola mu makulu kaange koti omutuki.”

³¹Bbatiseebba yaguunama aasi bweene yaboola ati, “Omwaami waange omutuki ahoya yayiindira endaalo choosi pe!”

³²Omutuki Daudi yalaanga Sadoki, Natani, neende Bbenaya. Mani nibeecha nibeengira mukati,

³³mani omutuki yaababoolera ati, “Muchie neende abahoongo baange bomu lwaanyi lwaange muno; muhole Solomooni omwaana waange oyo aniine hu suhiri njere yaange yeene eyo, mani mu mugoobe yeehirire achie hu Sulo Gihoni,

³⁴yi Sadoki neende Natani baba bachia ohumuchuhiraho amafuta koti omutuki wa Yisiraeli yoosi ayaakiriire.” Mani bamale boobbe eturumbete haandi behuume bati, Omutuki Solomooni ayiindire!

³⁵Mumuloondeho naakobola muno naaba niyeecha ohwiihaswa hu sisaala syaange sy'obutuki. Oyo niye ochia ohuungobola mu makulu kaange koti omutuki, olwohuba oyo niye yi ese omweene ndedooleere ohuba omwiimirisi wa Yisiraeli neende Yuda.

³⁶Bbenaya yakobolamo ati, “Nilwo sa lu sichia ohweehola,” haandi yaboola ati, “haandi Omwaami Nasaae wao ahoya yomiisa atyo!

³⁷Mani koti lu Omwaami yabechaanga naawe, Ewe ow'Obunyala, lwoosi ahoya yabechaanga neende Solomooni mani yaholaanga obwaami bwae bwaahulaahulanaanga ohuhiraho neende obwao bwalichiingi.”

³⁸Mani Sadoki, Natani, Bbenaya, neende abaliindi bomu dooho bachia baniinia Solomooni hu suhiri njere y'Omutuki Daudi, nibamala nibamugooba hu Sulo Gihoni.

³⁹Mani Sadoki niyeecha n'abukula esikiingiro sy'amafuta k'emiseituuni si yali niyeechere nasyo ohutula mu Yeema ly'Ohubaao hw'Omwaami, naamala naakachuha hu Solomooni. Beecha boobba eturumbete, abaandu boosi bahuumula bati, “Omutuki Solomooni, ayiindire!”

⁴⁰Beecha boosi haandi baamuloondaho naakobolayo engo, nibehuuma neende esangaalo, haandi niboobba amalere, nibihola esiyoka sya anyala ohuhola eloba lyateengerehaanga sa.

⁴¹Koti lu Adonija alala neende abakeni bae boosi lu bali nibamaliirisa bati omuholo okwo, baawulira esiyoka. Mani Yoabbu niyeecha yaawulira eturumbete, yateeba ati, “Mahuluundu siina keene akali mu siyoka esyo syoosi esiri mu siko?”

⁴²Niyali nasiilomalomaanga, Yonatani, omwaana w'Abbiataari omulaamisi yoola yi bali nibali. Adonija yaboola ati, “Ewe weeyingirire sa. Ewe oli omusaacha mulai, ohoyere ohuba nooli ohuleeta emboosi ndai.”

⁴³Yonatani nae yakobolamo ati, “Ese haba si tiireho daawe.” Ow'Oluyaali Omutuki Daudi mbao hane yehaase Solomooni ohuba omutuki.

⁴⁴Yeechere yaatuma Sadoki, Natani, Bbenaya, alala neende abaliindi b'omutuki ohumugooba. Beecha baanyala ohumuhola yakeendera hu suhiri njere y'omutuki,

⁴⁵mani Sadoki neende Natani beecha baamuchuhaho amafuta ohuba omutuki mu Sulo Gihoni. Mani nibeengira mu siko, nibehuuma neende esangaalo, nae abaandu nibakoteere mu sihu. Esyo nisyo esiyoka si wahawuliraanga.

⁴⁶Bulaanu Solomooni niye omutuki.

⁴⁷Haandi ohwemeeda hu bweene ohwo, abahalaabani b'omutuki bachiire mani beengira mukati ohuyaana oluyaali lwaabwe eyiri Ow'Oluyaali Omutuki Daudi, nibaboola bati, “Nasaae wao ahoya yaahola Solomooni yaahiraho ewe ohumanyihana, haandi obutuki bwa Solomooni buhoya bwahira obwao ohuhula-hulana.” Omutuki Daudi yesi yenaame hu buliri bwae niyeenamira Nasaae

⁴⁸niyekweeda n'aboola ati, “Lehe hufumie Omwaami, Nasaae wa Yisiraeli, enyaanga yino oholere mulala hu beechuhulu baange ohuungerama ohuba omutuki, haandi owakera syesi ndabaao omulamu ohwoola lu syesi omweene ndeboneereho neende emoni chaange!”

⁴⁹Mani abakeni ba Adonija baatya muno, boosi nibasiingira nibeema nibeweerao, buli otula n'adiira engira yae hu bwae.

⁵⁰Mani Adonija, naali mu buti obuungi muno naatya Solomooni, yaachia yeengira mu yeema ly'Ohubaao hw'Omwaami, yaachia yediira hu soonda choosi echa alutaari.

⁵¹Omutuki Solomooni yeecha yaboolerwa ati, Adonija yali namutiire muno, mani yali niyediirire hu soonda ch'alutaari haandi n'aboolere ati, “Ohutaangira hweene ndaaha Omutuki Solomooni oyo yaandeyamire ati, haba saachia ohuhola ese njitwe daawe.”

⁵²Solomooni nae yeecha yaakobolamo ati, “Nikali mbwe yaanjisamo oluyaali, abulao kata olwooya lw'efwiiri lyae liri hu mutwe kwae elichia ohugeeng'waho daawe; nae nataali atyo, achia ohufwa-bufwa.”

⁵³Mani Omutuki Solomooni yalaanga Adonija yeeche, naadaha ati bamunaanulule yaakulwe atule hu alutaari. Adonija yaachia eyiri omutuki niyeenama aasi bweene mu moni wae, mani omutuki naamuboolera ati, “Ewe maya akekobolera engo wao.”