Read saamia 1 Abatuki 10 Bible Online

1 Abatuki 10 - saamia bible

1 Abatuki 10

¹Omuhasi mutuki wa Seebba yawulira akadiira hu bulai bwa Solomooni, yasiingira yachaaka olukeendo luchia Yerusalemu ohumuhema n'amuteeba ebiteebo bidinyu muno.

²Yachia neende omukaanda muhoongo muno okw'abahalaabani bae, alala neende engamia nyiingi echikiingire ebiluungiro, ebiindu byesyaaywa, alala neende esaabbu nyiingi muno. Mani niyeecha yabukaanana neende Solomooni, yanyala ohumuteeba ebiteebo byoosi bi yali naanyala ohubaasaho.

³Nae Solomooni yaanyala ohubikobolamo byoosi bulai bweene; syaabulao esiindu syoosi esyamwoomera ohulomalomaho.

⁴Mani omuhasi mutuki wa Seebba wuno yaanyala ohwewulirira omweene hu bukesi bwa Solomooni haandi neende ohweebonera omweene hu dooho li Solomooni yali niyeyoombahira.

⁵Yabona ebyohulya byakabulwa hu meesi yae, obumenyo bw'abahoongo bae, endekeha yali mu bahalaabani bomu dooho, haandi neende ebyefwaalo by'emirimo bibafwalaanga, abahalaabani bamukabulaanga naali hu sidyaalo, haandi neende ebiyaanwa bi yayanaanga mu Nyuumba ya Nasaae. Bino byoosi byanyala ohuhola omutuki muhasi wuno yadoong'a sa naweere amaani haandi nang'ang'aalire sa.

⁶Yeecha yaboolera Omutuki Solomooni ati, “Bi ndali ndahuwuliraho ni ndi mu syaalo syaange, haandi neende obukesi bwao byoosi byadyeeri by'elalira!

⁷Nae ndali nindahaya ohubifukiirira ohwoolera elalira lu njichire mani ndeeboneraho omweene byoosi koti lu biri. Nae kata katyo, hane ndali sindanyala ohuwuliraho kata esituundu syaabyo daawe; obukesi bwao, alala neende emyaandu kyao bibitiirira eyale muno ebyo bi ndali nindaboolerwa sa.

⁸Mani abahasi bao nga bali neende ehabi! Kata abahalaabani bao bosi nga bali neende ehabi, abamenya esiha syoosi mu moni wao mani banyoola ehabi y'ohuwuliraanga emboosi chao ch'amakesi!

⁹Omwaami afumisibwe Nasaae wao oyo! Yamala ohweekesa esangaalo lyae yooli naahuhola nooba omutuki wa Yisiraeli. Olwohuba mbwe obuheeri bwae eyiri Yisiraeli bwoolubeerera, yahuhola waaba omutuki waabwe hwoonyale ohwomiisa amalako alala neende obuhoyera.”

¹⁰Yeecha yaatusira Omutuki Solomooni ebiyaanwa bi yali n'aleetere: Ekiloguraamu elifu chine (4,000) ech'esaabbu, haandi neende ebiluungiro neende ebyesyaayo bibitiirifu. Obuungi bw'ebiluungiro bi yamuberesa byali bihirira eyale elalira bi yanyoola ehabi lala liti lyoong'ene.

¹¹(Omukaanda kw'abaandu ba Hiramu okwali nikwaleeta esaabbu ohutula mu Ofiri, haandi kwosi nikwo okwaleeta embaao cha junipeeri enyiingi muno alala neende ebyesyaayo.

¹²Solomooni yali niyehoonyera embaao echio ohwoombaha ereerwe echomuukati w'Enyuumba ya Nasaae, haandi neende edooho lyeene, haandi neende ohuhola obuhana alala neende amaduungu eby'abeembi. Chino nichio embaao cha junipeeri chihiramo obunyirifu hu cheengiswaho mu Yisiraeli; chibulao echiindi haandi chityo echabonehanaho haandi nabuti.)

¹³Omutuki Solomooni yakaba muhasi mutuki wa Seebba buli siindu si yali naamusabire, n'otabaliireho ebiyaanwa biindi bihoyerwa mu bwiibulanwa bi yali n'amalire ohumutuulira hale.

¹⁴Mani buli mwaaka Omutuki Solomooni yanyolaanga ekiloguraamu elifu amahumi kabiri-na-chidatu (23,000)

¹⁵ohumeeda hu misolo ekyatooswaanga hu bachurusi bahoongo, engaanga yatulaanga hu buchurusi, haandi neende emituulu kyatungwanga neende abatuki b'Abaaraabbu neende bagafana abatukaanga disiturikiti ch'Abaisiraeli.

¹⁶Solomooni yanyala ohwitaanya engabo ehoongo muno emia chibiri (200), mani haandi yaahola chaabodoohanisibwa buli yitula neende olukohobero lw'ekiloguraamu ech'esaabbu.

¹⁷Haandi Musa yaahola ehuumba chiindi emia chidatu (300), buli yitula nga yikohoobwe neende ekiloguraamu chibiri ech'esaabbu. Yali yata engabo chino choosi mu Nyuumba Yibuuchirwamo ey'Esichaha sya Lebbanooni.

¹⁸Haandi yahola esisaala sy'obutuki esihoongo muno. Oluwaande lwasyo lwali nilwabwiihwaho ameeno k'enjofu nae olwaande ludoong'ere lwoosi lwali nilwabwiihwaho neende esaabbu enyirifu muno.

¹⁹Esisaala sy'Obutuki sino syaliho neende engaasi chisaasaba nae emukoongo w'esisaala esyo yaliyo esifwaanani sy'omutwe kw'emoosi, haandi hu buli lwaande hwaliho ebiyikiha amahono, haandi neende edalang'i chibiri echeemere huundulo wa buli siyikiha omuhono,

²⁰nae edalang'i ehumi neende chibiri nicheemere abweene ao, buli yitula niyeemere hu buli ngaasi yi yiweera hu ngaasi echio chisaasaba. Abulao esiindi esifwaanaho sityo esyanyala ohuholwaho mu bwaami bwoosi daawe.

²¹Ebikoombe byoosi bi Solomooni yang'weerangamo byali byaholwa mu saabbu ehaya, nae haandi ebyehoonyerwa byoosi ebyali mu nyuumba yohuubbiramo embaha ey'Esichaha sya Lebbanooni byoosi byali ebyaholwa mu saabbu njereere. Yibulayo kata efeesa yosi eyali niyehoonyerwaho daawe, koti lu yali niyitayirwa koti eyiri neende engaanga yoosi mu ndaalo cha Solomooni.

²²Yali neende esidiiyiha sy'emeeri chisyaabala hu nyaanja hunuufu nichisyaabala neende emikaanda ky'abaandu ba Hiramu. Buli myaaka kidatu omukaanda okwo kwakobolaanga, nikwiicha neende esaabbu, efeesa, ameeno k'enjofu, enguke, alala neende eheembo.

²³Omutuki Solomooni yali omunyali, haandi omukesi ohuhiraho abatuki baandi boosi,

²⁴haandi esyaalo syoosi syekombaanga sa ohunyala ohwiicha ohuwuliraho amakesi ka Nasaae yali niyamuberesa.

²⁵Mani buli muundu yeesi owechaanga ohumubona yamuleeteraanga ebiyaanwa, ebiindu byaholwa mu feesa neende mu saabbu, amaganjuula, ebilwaaniro, ebiluungiro, efaraasi, neende esuhiri njere. Bino byali nibyalumiirira sa bityo buli mwaaka.

²⁶Mani Solomooni yaanyala ohuhola eye ly'ebigaari byoola elifu ndala neende emia chine (1,400), neende efaraasi nwaani elifu ehumi neende chibiri (12,000). Yabihaanga echiindi mu Yerusalemu nae echiindi achita mu biko biindi bikabuhaane.

²⁷Mu ndaalo ch'obutuki bwae, efeesa yeecha yaadiba mu Yerusalemu koti sa amakina magu, haandi embaao ch'emiseengese chali embitiirifu muno koti sa ech'emihuyu mu nandaalira w'engulu cha Yuda.

²⁸Bawamwaanda b'omutuki wuno nibo ababechaanga nibahulira ohuchurusa efaraasi ohutusa mu Misiri neende mu Silisia,

²⁹haandi neende mu huchurusa ebigaari ohutusa mu Misiri. Bakusaanga abatuki b'Abahiiti neende ab'Abasiria efaraasi alala neende ebigaari byahwo, haandi nibakusaanga ebigaari ebyohu seende choola ebituundu by'efeesa emia chisaasaba (600) buli situla nae efaraasi hu seende choola 150 buli yitula.