Read saamia 1 Abatuki 18 Bible Online

1 Abatuki 18 - saamia bible

1 Abatuki 18

¹Endaalo nichabitao hooho, mu mwaaka kwa hadatu okw'esiminyu, Omwaami yaboolera Elija ati, “Ewe chia mani weeyekese eyiri Omutuki Ahabbu, mani ese njiche ndeete efula yikwe.”

²Mani Elija yasiingira yachaka olukeendo. Esiminyu esyali mu Samaria syali esibitiirifu,

³mani Ahabbu yaachia eyiri Obbadia, owali omuliindi w'edooho elyo. (Obbadia wuno yali omwiinamiri w'elalira w'Omwaami,

⁴mani Yesebbeeli naali ohwitaanga abanabbi b'Omwaami, Obbadia wuno yabukulaanga hu banabbi abo emia ndala (100), mani abakisa mu ng'uungu mu mikaanda ky'abaandu amahumi kataanu buli mulala, haandi yaababeresaanga ebyohulya alala neende amaachi k'ohung'wa.)

⁵Ahabbu yaboolera Obbadia ati, “Lehe huchie hubaliire hu buli sulo, haandi neende buli lwaalo lw'omwaalo ebiri mu syaalo omwo mwoosi, ohubona nikali mbwe hunyala ohunyoola olwaayiro lumala efaraasi alala neende esuhiri njere cheefwe chabaao enamu. Awuundi hunyala hwaahaya ohuyiikwa ohwiitaho kata silala hu bisolo byeefwe bino.”

⁶Beecha baafukiirisania olwaande lw'esyaalo esyo lu bali nibachia ohulambuula, mani beeta hu olukeendo ohukoonya nibakabuhaanemo emyaanda.

⁷Mani Obbadia niyali naali hu lukeendo lwae, yechuhana ni yeduuyire hu Elija. Yanyala ohumumanyirisa, mani yaguunama aasi mu moni wae, yaamuteeba ati, “Mani ewe niiwe omuhuluundu, kose?”

⁸Nae yakobolamo ati, “Eee, ngaandi ese niise Elija. Ewe chia oboolere omuhoongo wao, omutuki oyo oti ese mbano malire ohwoola ano.”

⁹Obbadia nae yakobolamo ati, “Siina syeene si ese holere, esikera ewe nokiiya ohuunda mu masira ak'ohunjitisa Omutuki Ahabbu?

¹⁰Obwadyeeri bw'Omwaami mulamu, Nasaae wao, ese ndeelaira endi omutuki amalire ohuhukoonya mu buli lubeka lw'esyaalo sino syoosi. Mani buli lu buli mwiimirisi wa buli situundu sy'esyaalo sino yanyalaanga ohuboola ati ewe haba soli mu situundu syae, Ahabbu yaholaanga buli mwiimirisi oyo ohweelairaanga ati ewe haba si walichiingi n'onyaliirwe ohunyolehanamo daawe.

¹¹Bulaanu ewe oli ohudaha otye, oti ese njie muboolere endi ewe oli ano?

¹²Nae biba binaba bitye nikali mbwe Mwooyo w'Omwaami achia ohuhukiinga mani ahumaleo ahuyire abuundu atamanyihaaneho, nindahamala sa endi ohuwaao? Mani ese haandi ndaamala ndaachia mani ndaboolera Ahabbu endi ewe hane oli ano, nae haba saanyala yeecha omweene ano mani yahunyoolao, ngandi aba achia ohuunjita-bwiita. Ewe ohoyere ohwiichulisaho oti ese ndi omwiinamiri mweene w'Omwaami ohuchaaka koti lu ndali nisisiiri omwaana-bu-syaani.

¹³Ewe haba sowuliraangaho oti Yesebbeeli yali naali ohwiitaanga abanabbi b'Omwaami, mani ese naange ndanyala ohukisa abanabbi boola emia enaamba mu ng'uungu, ni mbakabuulemo emikaanda ky'abaandu amahumi kataanu buli mukaanda, haandi ni ndanyala ohubayiriraanga ebyohulya alala neende amaachi?

¹⁴Mani katyo, ewe naawe onyala otye ohuunjika oti ese njie mani mboolere omutuki oyo endi ewe hane oli sa ano oti? Ngaandi aba achia sa ohuunjitirao!”

¹⁵Elija nae yakobolamo ati, “Koti lu Omwaami ali omulamu, oyo yi ese halaabaniraanga, husuubisa endi njia ohweeyira omweene eyiri omutuki oyo enyaanga yino yeene.”

¹⁶Mani Obbadia yeemao yasiingira yaachia eyiri Omutuki Ahabbu oyo yanyala ohumuboolera atyo, Ahabbu yesi yasiingira yaachia yaabukaanana neende Elija.

¹⁷Mani Ahabbu ni yamuubbyaho sa emoni chae ati, yaboola ati, “Ao mbao niiwe ow'esiya ohiramo obubi mu Yisiraeli mwoosi!”

¹⁸Elija nae yakobolamo ati, “Ese haba si ndi ow'esiya daawe, ewe niiwe ow'esiya, ewe alala neende lataao. Ewe niiwe oli ohujeemera ebilagiro by'Omwaami, haandi nimuli ohwiinamiraanga ba Bbaali.

¹⁹Mani ewe bulaanu yika abaandu boosi aba Yisiraeli bachie babukaananire naange aambi neende esigulu Karimeeli. Yicha neende abanabbi emia chine neende amahumi kataanu (450) aba Bbaali, neende abanabbi ba Asera nasaae muhasi emia chine (400), abasiirwaanga neende Yesebbeeli Omutuki muhasi.”

²⁰Mani Ahabbu yeemao yalaaliha Abaisiraeli boosi, alala neende abanabbi ba Bbaali ohuchia ohubukaanira hu sigulu Karimeeli.

²¹Elija yeemao yasiingira yaachia eyiri abaandu abo mani yaababoolera ati, “Eng'we mwahahiinde mwaamala embaka yaaka yitye hu mwaanyala ohuheengao esy'ohuhola? Nikali mbwe Omwaami wuno ali niye Nasaae mweene, mumwiinamireenge; nae nikali mbwe Bbaali wuno niye Nasaae mweene, mu mwinamireenge oyo!” Nae abaandu haba sibakobola hoomo emboosi kata ndala daawe.

²²Mani Elija yeemao yaboola ati, “Ese niise omunabbi w'Omwaami osidoong'ereo, nae baliwo abanabbi ba Bbaali emia chine neende amahumi kataanu (450).

²³Muleete ano esurusi chibiri; mani lehe abanabbi ba Bbaali babukule ndala, bayiite, bayidonyedonyemo ebituundu, babyaale hu hwi echio, nae bahaye ohutubulamo omuliro. Ese syeesi njia ohuhola endyo neende eng'oombe yinaaba niyidoong'ereo eyo.

²⁴Mani lehe abanabbi ba Bbaali basabe nasaae waabwe oyo, mani syeesi sabe Omwaami wuno, mani oyo oba naachia ohunyala ohukobolamo esaala echio neende ohuleeta ohutubula omuliro hu ng'oombe chino, oyo niye oba naachia ohuba naali Nasaae mweene ow'elalira.” Abaandu boosi behuuma ohusiima hwaabwe.

²⁵Bulaanu Elija yaboolera abanabbi ba Bbaali abo ati, “Koti eng'we muli abaangi muno, niing'we ababa mutaangire ohubukula esurusi yeeng'we, mani mu yitekehe mutyo mberi. Musabe nasaae weeng'we, nimutatubuule omuliro hu hwi cheeng'we echo.”

²⁶Bachia baabukula esurusi yali ni yibabeereswe, mani nibayitekeha bulai, mani nibachaaka ohusaba Bbaali ohwoola esideete akati. Beehumaanga nibaboola bati, “Tukobolemo, Bbaali!” Mani nibeedinya ohuhina amahina nibebodoohania alutaari yaabwe eyo yi bali nibombaahe. Nae abulao esikobolamo syoosi esyeecha daawe.

²⁷Mani esideete akati, Elija yatuunduha yachaaka ohubakachuliraho n'aboola ati, “Eng'we ngaandi mwehuume lukali muno sa! Ngandi muti oyo niye nasaae! Awuundi ali ohwelootera esideete sino, awuundi achiire ohwehoonyaho, awuundi asamuule olukeendo lw'eyale muno! Awuundi anyala ohuba omweene naali ohufuruuta endoolo, mani muhoyere ohumusimusa asiingire mberi!”

²⁸Abanabbi abo baanyala ohwehuuma muno nibachaaka neende ohweheengaanga abeene neende amahaande neende engeso, ohuloondakana neende emiduunga kyaabwe, ohwoola lu mabaanga kachaaka ohuhulukusaanga sa.

²⁹Bemeeda sa ohusamachuha neende ohwetyaacha ohwoolera elalira esideete nisyali aambi ohuwa; nae abulao esikobolamo esyeecha syoosi daawe, kata sa ohuwuliraho ekono lyoosi ohuwuliirihanaho.

³⁰Bulaanu Elija yeemao yaboolera abaandu abo ati, “Eng'we musude mwebuusire ano yi ndi,” mani bosi bebuusa bamweebodoohaniaho. Yachaaka ohutekeha alutaari y'Omwaami eyali ni yalikulwa ni yaweera aasi.

³¹Yabukula amakina ehumi neende kabiri, buli litula nilihiihirira buli nono yihola enono ehumi neende chibiri echakulihwa ameeta ohweema hu meeta k'abaana basyaani ba Yakobbo, omusaacha yi Omwaami yali niyakuliha eliita mbwe Yisiraeli.

³²Mani niyeehoonyera amakina kano kati, yanyala ohwoombaha buyaaha alutaari yohwiinamiraangamo Omwaami. Yayaba olwangaacha yayebodoohania, oluhoongo lu nyala ohuliinda amaachi kaera elita ehumi neende chine.

³³Yaala eehwi hu alutaari eyo, mani yaadonyadonya esurusi eyomu bituundu, mani nabyaala hu hwi echo. Yeemao yaboola ati, “Yichuse amapipa kane ak'amaachi mani muchie mu chuhe amaachi ako koosi hu siyaanwa esyo alala neende eehwi echio.” Bosi bachia mani baahola sa batyo,

³⁴yaboola ati, “Haandi muchie muloondemo ohuhola mutyo ehabi liindi, mani bosi baachia baahola batyo.” Haandi yaboola ati, “Haandi muloondemo ehabi liindi” mani bosi baahola sa batyo.

³⁵Amaachi kahulukusa kaabodoohania alutaari, mani nikeechusa olwangaacha olwo.

³⁶Mu siha sy'esiyaanwa sy'esideete, omunabbi Elija yatulayo mani yaasuda aambi neende alutaari yaasaba n'aboola ati, “Ewe Omwaami, Nasaae wa Abburahamu, Yisaka, neende Yakobbo, yomiisa bulaanu buti oti ewe niiwe Nasaae wa Yisiraeli, haandi oti ese niise omuhalaabani wao mani onyale ohuhola sino ohweema hu hulagira hwao.”

³⁷Ngobolemo, Omwaami, ngobolemo, hu baandu bano banyale ohumanya bati ewe, Omwaami niiwe Nasaae, haandi bati ewe niiwe oli ohubeekobosera omweene.

³⁸Omwaami yeesa omuliro, mani kwaasaamba ohumala esiyaanwa esyo, eehwi cheene choosi, alala neende amakina neende kala ehumi neende kabiri, haandi kwasaamba eloba mani kwaahamya neende amaachi kali nikali mu lwangaacha olwo.

³⁹Abaandu nibabona bati, banyala ohw'ehubba aasi eminyiha nibaboola bati, “Hane Omwaami wuno niye oli Nasaae mweene; Omwaami yeeng'ene niye Nasaae!”

⁴⁰Elija yeemao yaalagira ati, “Mukwe hu banabbi ba Bbaali abo; mutakanya kata mulala yeeruha daawe!” Abaandu bakwa hu banabbi abo boosi, Elija yabeesa hu Mwaalo Kisoni mani n'abeeterayo.

⁴¹Bulaanu, Elija yeemao yaboolera Omutuki Ahabbu ati, “Bulaanu, ewe chia mani omale olye. Ese mbano ndi ohuwulira ohuduma hw'efula niyiicha.”

⁴²Ahabbu niyali naachiire ohulya, Elija yaniina aakulu w'olugulu lwa Karimeeli, yi yoola mani yeenama hu buloba, omutwe kwae nikuli mu makulu kae.

⁴³Yaboolera omuhalaabani wae ati, “Ewe mani obaliire ena nyaanja.” Omuhalaabani oyo yachia mani yaakobola mani yaboola ati, “Ese haba siinyalire ohubonaho esiindu syoosi daawe.” Amahabi kataanu-na-kabiri, Elija yalumiirira sa ohumubooleraanga ati achie yewuunjeho haandi.

⁴⁴Ehabi lya hataanu-na-habiri yakobola mani yaboola ati, “Ese mbweneho ahaleesi ahadiidi kata ahataaka neende omuhono kw'omuundu, nihasiingira nihatulira mu nyaanja.” Elija yalagira omuhalaabani wae oyo ati, “Ewe chia eyiri Omutuki Ahabbu mani omuboolere yeengire mu sigaari sy'efaraasi syae, mani akobole engo wae, efula yitanyala ohumwiikalira.”

⁴⁵Esiha esidiidi syeene, ekulu lyoosi lyali nilimalire ohwiichula amaleesi mamali, haandi omuyaka nikuchaakire ohuwuucha, mani efula y'amaani niyirikuluha. Ahabbu yeengira mu sigaari syae mani yachaka ohwekobolera mu Yesireeli.

⁴⁶Obunyala bw'Omwaami bweeha hu Elija; yafuundiha engubo chae chomiira mu sibuno mani yeeruha niyemiriire Ahabbu olukeendo lwoosi ohwoola mu Yesireeli.