Read saamia 1 Abatuki 2 Bible Online

1 Abatuki 2 - saamia bible

1 Abatuki 2

¹Daudi niyali naali aambi ohufwa, yalaanga Solomooni omwaana wae yaamuberesa ebilagiro byae bimaliirihayo bino:

²“Esiha syaange sy'ohufwa syoolere. Ewe ba sa omwomiifu haandi omumaliirifu,

³mani onyale ohuholaanga buli siindu si Omwaami Nasaae wao ahulagira ohuhola. Londaanga amalako kae koosi neende ebilagiro byae byoosi, koti lu biba nibyandiikwa mu Malako ka Musa, hu bulaanu buli yooba nochiira onyale ohubitaangamo bulai mu buli siindu syonaholaanga.

⁴Noochia ohubechaanga omweesikwa eyiri Omwaami oyo aba achia ohwooseresaanga esisuubise si yahola koti lu yamboolera ati, abeechuhulu baange nibo abachia ohwimiriraanga Yisiraeli, nibanabechaanga nibadoong'a nibali abehaliirisa ohwooseresaanga ebilagiro byae abweene, neende emyooyo kyaabwe kyoosi, haandi neende obulamu bwaabwe bwoosi.

⁵ “Haandi aliwo esiindu siindi syosi. Ewe yichulisa esiindu si Yoabbu yahola niyeeta abeecha babiri abali abahoonyi b'amaye ka Yisiraeli, Abbuneeri omwaana wa Neeri neende Amasa omwaana wa Yeteri. Yichulisa koti lu yabanieega boombi mu siha sy'omuleembe mbwe niyetuunga ohufwa hu baleetao mu ndaalo ch'ebiita. Oyo yeeta abaandu bali nibabulaho omusaango kwoosi daawe; sakira ese bulaanu niise oli neende obufunaanibwa bw'ebiindu bi yahola ebyo mani ndi ohuchuunisibwa neende ebyeema hu bweene ohwo muno.

⁶Mani ewe mbao omanyire bulai bweene esiindu syohoyere ohuhola bulaanu; otakanyaho omweene oyo yaafwa efwa ya buli nyaanga daawe.

⁷ “Nae, ewe chia mani weekese esisa abaana ba Bbarisilai abatula mu Gileadi mani obaliinde bulai, olwohuba abeene abo nibo bangwiira esisa koti lu ndali niinjiruuhe Abbusalomu omwaana weeng'we.

⁸ “Eyo haandi yiriyo Simei omwaana wa Gera, ohutula mu siko sya Bbahuriimu mu Bbenjamini. Oyo yambwaaba ebilulu muno hu ludaalo lu ndachiiraho mu Mahanaimu, nae niyeecha yaabukaananira naange hu Mwaalo Yorodaani, ndaamusuubisira elalira mu liita ly'Omwaami endi, siinja hukanya yeetwe daawe.

⁹Nae ewe haba sookanyaho yeebalula ohubonereswa. Ewe omanyire bulai bweene esiindu syoohoyere ohuhola; ohoyere ohumanya oti ohwoola lu yesi yeetwa.”

¹⁰Mani Daudi yeemao yaafwa yasiihwa mu Siko Sihuluundu sya Daudi.

¹¹ Yali n'amalire ohuba omutuki wa Yisiraeli ohumala embaka y'emyaaka amahumi kane, n'atukiire emyaaka kitaanu-na-kibiri mu Hebburoni, neende emyaaka amahumi kadatu-na-kidatu naali mu Yerusalemu.

¹² Solomooni wuno yali n'amalire ohukerama Daudi laatang'ene koti omutuki, alala neende obunyala bwae bw'obutuki mani yali ahoyere ohumanya ati, buno bwali nibuhoyere ohwomiira bulai muno.

¹³Bulaanu, Adonija, yi ng'ina yali Hagiti, yeemao yaachia eyiri Bbatiseebba, owali naali ng'ina Solomooni mweene. Bbatiseebba oyo nae yaamuteeba ati, “Obukeni buno bw'obwiicha, kose?” Adonija nae yamukobolamo ati, “Eee, nilwo lu buli.”

¹⁴Haandi yameedaho ati, “Ese ndiho neende esiindu siindaha ohuhweteebaho.” Haandi Bbatiseebba yaamuteeba ati, “Ni siindu siina syeene esyo?”

¹⁵Nae Adonija yamukobolamo ati, “Ewe omanyire bulai bweene oti obutuki bwali obwaange nibwo, haandi oti, buli muundu oli mu Yisiraeli yesi yali n'asisuubira ati niise ochia ohutuka. Nae ebiindu buundi sa, mani obutuki bwaaba obwa mwaanama, olwohuba ohwo nihwo ohwali ohudaha hw'Omwaami.

¹⁶Mani bulaanu ese ndi neende esiteebo silala syoong'ene siindaha ohuhuteeba; nae ewe otateemaho ohuungisa daawe.” Bbatiseebba nae yeemao yaamuteeba ati, “Siina syeene nisyo?”

¹⁷ Nae Adonija yaamukobolamo ati, “Fukiirira a oteebeho Omutuki Solomooni, ese koti lu manyire endi, oyo haba saachia ohuhukisa daawe, naakanya ese ndaha yaamberese Abbisaagi, omuhasi muhaana oyo otula mu Suneemu, ohuba omuhasi waange.”

¹⁸Nae omuhasi oyo yaakobolamo ati, “Ese njia ohuhulomalomera eyiri omutuki hulwao.”

¹⁹Mani, Bbatiseebba yeemao yaachia eyiri omutuki Solomooni ati anyale ohulomaloma nae hulw'Adoniija. Mani omutuki oyo yaasiingira ohuheesa ng'ina, mani yaamwiinamaho. Mani yeecha hu sisaala syae sy'obutuki, haandi yaasaba esiindi syosi siingiswe mu nyuumba omwo, mani ng'ina asiihalireho hu muhono muluungi kwae.

²⁰Ng'ina oyo yaboola ati, “Ese ndiho neende ehabi endiidi hooho ohuhuteebaho esiindu silala; mani nookanya, otaangisa daawe.” Nae omutuki Solomooni oyo yaamuteeba ati, “Ewe maama, siindu siina syeene esyo? Ese haba siinjia ohuhukisa daawe.”

²¹Ng'ina oyo yaakobolamo ati, “Ewe leha Adonija mwaanamaao ayire Abbisaagi ohuba omuhasi wae.”

²²Omutuki oyo nae yateeba ati, “Ewe, siina syeene esikera ewe ni wuusaba oti muberese Abbisaagi?” Ngaandi ewe oli sa aambi haandi ohuusaba oti muberese neende esisaala sy'obutuki syoosi. Ngaandi koti lu ali mwaanama muhuluundu, haandi Abbiataari omulaamisi alala neende Yoabbu bosi bali ohumukwiira!

²³Mani bulaanu, Solomooni yeecha yaahola esisuubise syomiifu mu liita ly'Omwaami ati, “Nasaae ahoya yaanjitirao nitaachia ohubona endi Adonija atuunga obulamu bwae hulw'ohuusaba esiindu sino!”

²⁴Omwaami nguno amalire ohunyomiisira hu sisaala sy'obutuki sya Daudi laata; yooseresa esisuubise syae, mani niyaamberesa obwaami bwae neende abeechuhulu baange. Mani ese ndairira Omwaami waange mulamu endi Adonija achia ohufwa enyaanga yino yeene!

²⁵Omutuki Solomooni naatusa ebilagiro eyiri Bbenaya, owatulaniramo yaachia yeeta Adonija.

²⁶ Omutuki Solomooni yaboolera Abbiataari omulaamisi ati, “Ewe kobolayo engo mu syaalo mu Anatooti. Ewe ohoyera ohufwa, nae haba siinjia ohukanya wiitwe enyaanga yeene yino daawe, olwohuba ewe niiwe owali neende obunyala hu Sanduuku ly'Endagaano niwali nooli neende laata yaange, mani waanyala ohukabaniraho alala nae mu madinyu kae koosi.”

²⁷ Solomooni yeerusa Abbiataari ohutula mu huhalaabana koti omulaamisi w'Omwaami, yaanyala ohwooseresa abweene obwadyeeri bu Omwaami yali niyaboolera naali mu Silo ebidiira hu mulaamisi Eli alala neende abeechuhulu bae.

²⁸Yoabbu yawulira ebyali nibikwiireo. (Yali n'akwiiraanga Adonija, ataali ohukwiira Abbusalomu.) Mani yeeruhira eyiri Eyeema ly'Ohubaao hw'Omwaami, mani yediira yoomera hu soonda ch'alutaari.

²⁹Mani emboosi nichoolera Omutuki Solomooni mbwe Yoabbu amalire ohwiiruhira ena Yeema ly'Ohubaao hw'Omwaami, mbwe amalire ohwoola hu alutaari, Solomooni yatumayo wamwaanda eyiri Yoabbu, ohuchia ohumuteeba esiindu syeene esyakera yeeruhira eyiri alutaari. Yoabbu nae yaakobolamo ati, yali niyeeruhiire ena Yeema ly'Ohubaao hw'Omwaami olwohuba yali n'atiire Solomooni. Mani Omutuki Solomooni yeemao yaatuma Bbanaya ohuchia ohwiita Yoabbu.

³⁰Yachia ena Yeema ly'Ohubaao hw'Omwaami, yaboolera Yoabbu ati, “Omwaami ali ohuhulagira ohutula omwo.” Yoabbu nae yakobolamo ati, “Haba. Ese njia ohufwiira abweene ano.” Bbenaya yeemao yesi yaakobalayo eyiri omutuki, yaamuboolera bi Yoabbu yali n'aboolere.

³¹Solomooni nae yakobolamo ati, “Ewe hola sa buli siindu si Yoabbu aboola.”

³²Omwaami niye ochia ohusaandya Yoabbu hulw'obwiiti obwo bu yahola Daudi laata yaange nataamanyire daawe. Yoabbu yali niyeeta abasaacha babiri abataaliho omusaango kwoosi abali abasaacha balai ohumuhira omweene oyo, bali: Abbuneeri, omuhoongo w'eye lyoosi elya Yisiraeli, neende Amasa, owali omuhoongo w'eye lyoosi elya Yuda.

³³Mani esibonereso sichaana neende ohwiitwa hwaabwe abo boombi sichia ohuba hu Yoabbu, haandi neende hu beechuhulu bae endaalo choosi pe. Nae Omwaami esiha syoosi achia ohuberesaanga abeechuhulu ba Daudi ohubitaangamo mu biindu bi bahola, abo abanabechaanga nibehaale hu sisaala sy'obutuki syae.

³⁴Bbenaya yachia ena Yeema ly'Ohubaao hw'Omwaami, naamala niyeeta Yoabbu, yasiihwa mu daala lyae mu syaalo siyanjakalafu.

³⁵Mani omutuki oyo yaahola Bbenaya ohuba omuhoongo w'eye, mu bweyaango bwa Yoabbu, haandi yaata Sadoki owali omulaamisi mu bweyaango bwa Abbiataari.

³⁶Omutuki Solomooni oyo yalaanga Simei, n'amuboolera ati, “Ewe yicha weeyoombahire enyuumba yao mu Yerusalemu muno. Menya mu bweene muno, mani ohaye ohutula hoomo.

³⁷Nae noolitula hoomo mani waachia waduuma Oluuchi Kidironi, oba ochia ohufwa, nihaandi ewe mweene niiwe oba ochia ohubaaho omusaango.”

³⁸Simei nae yakobolamo ati, “Ewe ow'Oluyaali, nilwo sa lu bichia ohuba. Ese njia ohuhola esyo sy'oboola.” Mani yaamenya mu Yerusalemu esiha esihoongo muno.

³⁹Kata katyo, luunyuma lw'emyaaka kidatu ohuwa, bawaambe ba Simei babiri beecha baanyala ohumwiiruhaho baachia eyiri omutuki wa Gaati, Achisi omwaana wa Maaka. Simei niyeecha yaawulira ati hane abahalaabani bawaambe abo bali nibali mu Gaati,

⁴⁰yaniina hu suhiri yae yaachia eyiri Omutuki Achisi mu Gaati, ohukoonya bawaambe bae abo. Yabakaana yaabakobosa engo.

⁴¹Nae Solomooni niyawulira esiindu si Simei yali naaholere,

⁴²yamulaanga mani yaboola ati, “Ese ndahuhola woola ohuhola esisuubise mu liita ly'Omwaami obutatulaangaho mu Yerusalemu. Mani ndaahulabula endi noolisiholaho, ochia bwadyeeri bweene ohufwa. Ewe okaana oti haba wesi siwafukiirira otyo, waamala waboola oti ochia ohuumbuliraanga?

⁴³Siina syeene, mani esikerere waahalaka endagaano yao elyo mani waahaya ohuwulira esilagiro syaange?

⁴⁴Ewe omanyire bulai bweene ebyonoono byoosi bi wahola Daudi laata yaange. Omwaami achia ohuhusaandya hulw'ebyeene ebyo.

⁴⁵Naange achia ohuumberesaanga sa ehabi, haandi achia ohuliindaanga sa obwaami bwa Daudi bubeeo mu muleembe endaalo choosi pe.”

⁴⁶Bulaanu omutuki Solomooni yeemao yaaberesa Bbenaya ebilagiro, yaachia yeeta Simei. Bulaanu Solomooni yomiisa bulai obwaami bwae bwoosi.